ཁོར་ཡུག་གཙང་བཟོའི་ལས་འགུལ།

ཕྱི་ཟླ་༩ ཚེས་༢༩ ཉིན་རྒྱ་གར་ལྷོ་ཕྱོགས་སྦེལ་ཀོབ་ས་གནས་ལུགས་བསམ་བོད་མིའི་གཞིས་ཆགས་ཀྱི་ས་གནས་འགོ་འཛིན་ཀྱི་ཁྱབ་ཁོངས་ཀྱི་སེར་སྐྱ་གནད་ཡོད་མི་སྣ་ཁག་བསྐོང་འཚོགས་ཐོག ཁོར་ཡུག་གཙང་ན་འཕྲོད་བསྟེན་ལེགས་ཞེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་གནང་ཡོད་པ་རེད།

ཚོགས་འདུའི་ཐོག་སྐུ་མགྲོན་གཙོ་བོ་སེར་བྱེས་མཁན་རིན་པོ་ཆེའི་གཙོས་སྦེལ་ཀོབ་ས་གནས་འགོ་འཛིན་གཉིས་ཀྱི་ཁྱབ་ཁོངས་གདན་ས་གྲྭ་ཚང་ཁག་དང་མཉམ་འབྲེལ། རང་བདེན་ཚོགས་ཆུང་། གཞོན་ནུ་བུད་མེད་སོགས་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལས་སྣེ་བ་ཡོངས་མཉམ་ཞུགས་ཡོད་པ་རེད།

སྐབས་དེར་སྦེལ་ཀོབ་ས་གནས་སུ་ཁོར་ཡུག་གཙང་བཟོ་ཚོགས་ཆུང་ཞིག་གསར་འཛུགས་བྱས་ཡོད་པ་མ་ཟད། ཕྱི་ཟླ་༡༠ ཚེས་ ༢ ཉིན་སེར་སྐྱ་མི་མང་ནས་ཁོར་ཡུག་གཙང་མ་བཟོ་རྒྱུའི་ལས་གཞི་གཏན་འབེབས་བྱས་ཡོད་པ་རེད།

ཟླ་འདིའི་ཚེས་༢ ཉིན་གྱི་སྔ་དྲོ་རྒྱ་གར་ལྷོ་ཕྱོགས་སྦེལ་ཀོབ་ཏུ་ཁོར་ཡུག་གཙང་བཟོའི་ལས་འགུལ་ཞིག་སྤེལ་ཡོད་པ་དང་། ལས་འགུལ་ནང་མཉམ་ཞུགས་གནང་མཁན་སྦེལ་ཀོབ་ས་གནས་འགོ་འཛིན་རྣམ་གཉིས་དང་། ས་གནས་མཉམ་འབྲེལ་ཚོགས་གཙོས་མཉམ་འབྲེལ་གྱི་ལས་བྱེད་རྣམས། སེ་ར་དང་རྣམ་གྲོལ་གླིང་གཉིས་ཀྱི་གཙོས་གདན་ས་གྲྭ་ཚང་ཁག་གི་ལས་ཀྱི་སྣེ་མོ་བ་དང་སེར་སྐྱ་མི་མང་བཅས་མཉམ་ཞུགས་བྱས་ཡོད་པ་རེད།

སྐབས་དེར་འདི་གའི་གསར་འགོད་པས་སྦེལ་ཀོབ་ལུགས་བསམ་མཉམ་འབྲེལ་ཚོགས་གཙོ་པདྨ་བདེ་ལེགས་ལ་བཅར་འདྲི་བྱས་པར།རྩ་བའི་དེ་རིང་གི་ཁོར་ཡུག་གཙང་བཟོའི་ལས་འགུལ་འདི་ལྟར་སྤེལ་དོན་གཙོ་བོ་༧གོང་ས་མཆོག་གིས་བཀའ་དྲིན་རྗེས་དྲན་གྱི་ལོ་ལ་སྲུང་བརྩི་ཞུ་དགོས་སྐོར་རང་གཞུང་བཀའ་ཤག་གི་གཏན་འབེབས་ཞུས་དོན་བཞིན། ལས་འགུལ་འདི་གོ་སྒྲིག་བྱས་ཡོད་པ་དང་། ལྷག་པར་དུ་༧གོང་ས་མཆོག་གིས་དུས་ནས་དུས་སུ་འཛམ་གླིང་གི་ནང་ཁོར་ཡུག་གཙང་བཟོ་བྱེད་དགོས་སྐོར་བཀའ་སློབ་ལམ་སྟོན་གནང་མུས་སུ་ཡོད་པ་བཞིན། ང་ཚོའི་ངོས་ནས་༧གོང་ས་མཆོག་གི་བཀའི་ཆ་ཤས་ཙམ་བསྒྲུབ་ཐུབ་པའི་ཐབས་ཤས་འབད་བརྩོན་བྱས་པ་ཡིན་ལ།དེ་བཞིན་རྒྱ་གར་གྱི་སྲིད་བློན་ན་རནྜ་མིརྡི་ཡིས་རྒྱ་གར་རྒྱལ་ཡོངས་སུ་ཁོར་ཡུག་གཙང་བཟོ་དགོས་སྐོར་གྱི་བཀའ་སློབ་ལམ་སྟོན་ཕེབས་ནས། དེ་རིང་ཁོང་དངོས་སུ་ཕེབས་ནས་རྒྱ་གར་རྒྱལ་ཡོངས་ནང་ཁོར་ཡུག་གཙང་བཟོའི་ལས་འགུལ་འགོ་འཛུགས་བྱེད་ཀྱི་ཡོད་པ་རེད།ང་ཚོའི་ངོས་ནས་ལས་འགུལ་དེའི་ཐོག་མཉམ་ཞུགས་བྱེད་ཀྱི་ཡོད་པའི་རྣམ་པ་ཞིག་ཀྱང་སྟོན་གྱི་ཡོད་སྐོར་གསུངས་སོང་།

ཉེ་བའི་ཆར་སྦེལ་ཀོབ་ས་གནས་སུ་གསར་དུ་བཙུགས་པའི་ཁོར་ཡུག་གཙང་བཟོའི་ཚོགས་ཆུང་དེའི་དམིགས་ཡུལ་དང་གྲུབ་ཆ་བཅས་ཀྱི་སྐོར་ལ་བཅར་འདྲི་བྱས་པར། ཚོགས་ཆུང་དེའི་གྲུབ་ཆ་ཡོང་ཁོངས་སྦེལ་ཀོབ་ལུགས་བདེ་ས་གནས་འགོ་འཛིན་རྣམ་པ་གཉིས་དང། མཉམ་འབྲེལ་ཚོགས་གཙོ་རྣམ་པ་གཉིས་བཅས་ཁོར་ཡུག་གཙང་བཟོའི་ཚོགས་ཆུང་གི་སློབ་སྟོན་པ་དང་། ཚོགས་མི་ཕྱི་ལུགས་དང་ནང་ལུགས་ཀྱི་འཕྲོད་སྟེན་སྨན་པ་གཉིས་དང་གཞོན་ནུ་དང་བུད་མེད་ཀྱི་སྐུ་ཚབ། དགོན་པ་གྲྭ་ཚང་ཁག་གི་སྐུ་ཚབ་དགེ་འདུན་པ་གཉིས། གྲོང་སྡེ་གསར་རྙིང་གཉིས་ཀྱི་ནང་སྐུ་ཚབ་གཉིས་དང་། གཞན་ཡང་ཁོར་ཡུག་ཐོག་དམིགས་བསལ་ཆེད་ལས་པ་དབྱངས་ཅན་བཅས་ལས་གྲུབ་པའི་ཁོར་ཡུག་གཙང་བཟོ་དང་འབྲེལ་བའི་ཚོགས་ཆུང་ཞིག་བཙུགས་ཡོད་སྐོར་དང་།   དེ་རིང་ཁོར་ཡུག་གཙང་བཟོའི་ལས་འགུལ་ནང་སེར་སྐྱ་མི་མང་བརྒྱ་ཆ་བདུན་ཅུ་ཙམ་ཕེབས་ནས་སྦེལ་ཀོབ་ས་གནས་ཀྱི་དགེ་སྡེ་གྲྭ་ཚང་དང་། གཞིས་གྲོང་ཁག་བཅས་ཀྱི་སོ་སོའི་ས་ཕྱོགས་ཁོར་ཡུག་ཡོངས་གཙང་བཟོ་བྱེད་བཞིན་འདུག་ལ། མ་འོངས་པར་༧གོང་ས་མཆོག་གི་ཞི་བདེའི་གཟེངས་རྟགས་འབུལ་བཞེས་ཀྱི་ཉིན་མོ་སྟེ་ཕྱི་ཟླ་༡༢ པའི་ཚེས་༡༠ ནས་བཟུང་སྦེལ་ཀོབ་ས་གནས་སུ་འགྱིག་ཤོག་བེད་སྤྱོད་གཏོང་མི་དགོས་པའི་ལས་འགུལ་འགོ་འཛུགས་ཞུ་རྒྱུ་ཡིན་ཞེས་དང་།   ཐེངས་འདིའི་ལས་འགུལ་སྦེལ་སྐབས་མི་མང་ལ་གྱོན་གོས་སྒྲིག་ཆས་སོགས་ཀྱི་མཐུན་རྐྱེན་ཡོངས་(Rotary Lhasa) ཞེས་པའི་ཚོགས་པས་མཐུན་འགྱུར་གནང་བ་མ་ཟད་ལས་འགུལ་སྣེ་ཁྲིད་པའི་ནང་མཉམ་ཞུགས་གནང་ཡོད་པ་རེད་ཅེས་སོགས་འགྲེལ་བརྗོད་གནང་སོང་།
ལྷོ་ཕྱོགས་གསར་འགོད་པ་ཐུབ་བསྟན་བཀྲ་ཤིས།