རྒྱ་ནག་ནང་གི་འགྲོ་བ་མིའི་ཐོབ་ཐང་གླེང་སློང་དགོས།

ཕྱི་ཟླ་༡༠ ཚེས་༣༠ ཉིན་རྒྱལ་སྤྱིའི་ཐོག་ནས་འགྲོ་བ་མིའི་ཐོབ་ཐང་ཚོགས་པ་དགུ་མཉམ་འབྲེལ་གྱིས་ཨ་རིའི་སྲིད་འཛིན་ཨོ་བྷ་མ་ཕྱི་ཟླ་༡༡ ནང་རྒྱ་ནག་ཏུ་ཕེབས་སྐབས། འགྲོ་བ་མིའི་ཐོབ་ཐང་སྐོར་ལ་གླེང་སློང་དགོས་པའི་སྙན་ཞུ་ཞིག་ཕུལ་ཡོད་པ་རེད།

དེ་ཡང་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཕྱི་ཟླ་༡༡ ཚེས་༡༢ ཉིན་ཨ་རིའི་སྲིད་འཛིན་ཨོ་བྷ་མ་རྒྱ་ནག་དུ་རྒྱལ་དོན་མཚམས་གཟིགས་ལ་ཕེབས་ཀྱི་ཡོད་པ་དང་། རྒྱ་ནག་གི་སྲིད་འཛིན་ཞི་ཅིང་ཕིང་དང་པེ་ཅིང་ནས་མཇལ་འཕྲད་གནང་རྒྱུ་ཡིན་པས། འགྲོ་བ་མིའི་ཐོབ་ཐོང་ཚོགས་པ་ཁག་དགུ་ཙམ་གྱིས་ཨ་རིའི་སྲིད་འཛིན་ཨོ་བྷ་མར་རྒྱ་ནག་དུ་སྤྱི་དམངས་ཐོབ་ཐང་ཐོག་དྲག་གནོན་བྱེད་མུས་ཐད་རྒྱ་གཞུང་གི་དཔོན་རིགས་མཉམ་དུ་གླེང་སློང་དགོས་པའི་ཡོངས་ཁྱབ་སྙན་ཞུ་ཞིག་ཕུལ་ཡོད་པ་རེད།

སྙན་ཞུའི་འདི་ནང་རྒྱ་ནག་གི་བཙོན་འོག་ཏུ་ཡོད་པའི་སྤྲུལ་སྐུ་བསྟན་འཛིན་བདེ་ལེགས་དང་། ནོ་སྦེལ་ཞི་བདེའི་གཟེངས་རྟགས་བཞེས་མཁན་རྒྱ་རིགས་ལིའུ་ཞོ་པའོ་དང་། ཁོང་གི་བཟའ་ཟླ་ལི་ཞཱ། ཡུལ་གུར་བའི་མཁས་དབང་ཨེ་ལམ་ཏོ་ཏུའུ། རྒྱ་ནག་གི་འགྲོ་བ་མའི་ཐོབ་ཐང་ཁྲིམས་རྩོད་པ་ཀའོ་ཌི་ཧྲིན་རྒྱ་ནག་གི་བཙོན་ཁང་དུ་ཡོད་པའི་དཔེ་མཚོན་དུ་བཀོད་དེ། ཁོང་ཚོ་གློད་གྲོལ་ཡོང་ཐབས་སུ་རྒྱ་ནག་ལ་གནོན་ཤུགས་སྤྲོད་དགོས་སྐོར་འཁོད་ཡོད་པ་རེད།

དེ་བཞིན་རྒྱ་ནག་གིས་སྤྱི་དམངས་ཐོབ་ཐང་ཐོག་རྡོག་རོལ་གཏོང་བཞིན་པའི་བྱ་སྤྱོད་དེ་ཨ་རི་དང་རྒྱ་ནག་བར་གྱི་ཕུན་ཚུལ་འབྲེལ་ལམ་གྱི་འགག་རྩ་ཞིག་ཡིན་པ་སྲིད་འཛིན་ཨོ་བྷ་མས་གསལ་འདོན་གནང་དགོས་པ་བརྗོད་ཡོད་པ་རེད།
སྙན་ཞུ་ཕུལ་མཁན་གྱི་ཚོགས་པ་རྒྱལ་སྤྱིའི་ནག་ཉེས་གུ་ཡངས་ཚོགས་པ་དང། འགྲོ་བ་མའི་ཐོབ་ཐང་ལྟ་ཞིབ། རྒྱལ་སྤྱིའི་བོད་དོན་ལས་འགུལ་ཁང། རྒྱ་ནག་སྐོར་གྱི་འགྲོ་བ་མིའི་ཐོབ་ཐང། ཡུ་གུར་གྱི་འགྲོ་བ་མིའི་ཐོབ་ཐང་སྐོར་གྱི་ཚོགས་པ་སོགས་ཡིན་པ་རེད།།
གསར་འགོད་པ་ཆོས་ཉིད་འོད་ཟེར།