སྤྲུལ་སྐུ་བསྟན་འཛིན་བདེ་ལེགས་ཀྱི་འཁྲུངས་སྐར་སྲུང་བརྩི།

ཟླ་འདིའི་ཚེས་༡༣ ཉིན་གྱི་སྔ་དྲོ་སྤྲུལ་སྐུ་བསྟན་འཛིན་བདེ་ལེགས་ཞབས་ཞུ་ཚོགས་པའི་གོ་སྒྲིག་འོག སྤུལ་སྐུ་བསྟན་འཛིན་བདེ་ལེགས་དགུང་གྲངས་༦༥ ལ་ཕེབས་པའི་སྐུའི་འཁྲུངས་སྐར་སྲུང་བརྩིའི་མཛད་སྒོ་ཞིག་རྒྱ་གར་ལྷོ་ཕྱོགས་མོན་གྷོ་རུ་འཚོགས་ཡོད་པ་རེད།

སྤྲུལ་སྐུ་བསྟན་འཛིན་བདེ་ལེགས་ནི་རྒྱ་ནག་གཞུང་གིས་འབར་རྫས་གས་འཐོར་སོགས་ཀྱི་ཉེས་མིང་འོག་བཙོན་བཅུག་བྱས་ནས། ལོ་༡༢ འཁོར་གྱི་ཡོད་པ་རེད།

དེ་ཡང་འཁྲུངས་སྐར་སྲུང་བརྩིའི་མཛད་སྒོའི་ཐོག་གདན་ས་དགའ་འབྲས་གཉིས་ཀྱི་གཙོས་གྲྭ་ཚང་ཁག་དང་བཙུན་དགོན་བྱང་ཆུབ་ཆོས་གླིང་བཅས་སུ་བཞུགས་ཡོད་པའི་བླ་སྤྲུལ་དགེ་བཤེས་རྣམ་པའི་གཙོས་རིན་པོ་ཆེའི་སློབ་འབངས་རྣམས་མཉམ་ཞུགས་བྱས་ཡོད་པ་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྐུ་གེགས་དང་ཐུན་མོང་སྣང་ངོར་གྲུབ་པའི་མི་འདོད་པའི་ཉེར་འཚེ་མཐའ་དག་ཞུ་ནས་སྐུ་ཚེ་མི་འགྱུར་རྡོ་རྗེས་ཁམས་སུ་བརྟན་པ་དང་། མགྱོག་ནས་མྱུར་དུ་རྒྱ་གཞུང་གིས་མ་ཉེས་ཁ་གཡོག་ནས་བཙོན་གྲོལ་ཐོབ་བའི་ཆེད་དུ། སྐུའི་ཞབས་རིམ་གསོག་སྒྲུབ་དང་བསང་གསོལ་རླུང་རྟ་བསྒྲེངས་འཛུགས་སོགས་ཆོས་ཕྱོགས་ཀྱི་མཛད་སྒོ་སྟབས་བདེ་ཞིག་འཚོགས་ཡོད་པ་རེད།

གཞན་ཡང་ཟླ་འདིའི་ཚེས་༡༧ ཉིན་ལི་ཐང་སྤྲུལ་སྐུ་བསྟན་འཛིན་བདེ་ལེགས་འདི་ལོར་དགུང་གྲངས་༦༥ ལ་ཕེབས་ཀྱི་ཡོད་པ་དང་། འཛམ་གླིང་གི་ཡུལ་གྲུ་གང་སར་བཞུགས་ཡོད་པའི་ཁོང་གི་སློབ་འབངས་དང་འབྲེལ་ཡོད་རྣམས་ཀྱིས་རིན་པོ་ཆེའི་འཁྲུངས་སྐར་སྲུང་བརྩི་ཞུ་འཆཪ་ཡོད་ལ། ལྷག་པར་དུ་འདི་ལོར་དཔལ་ལྡན་འབྲས་སྤུངས་སྒོ་མང་ཧར་གདོང་ཝ་ཤུལ་མི་ཚན་ནང་དུ་རིན་པོ་ཆེ་གང་ཉིད་ཀྱི་སྐུའི་འཁྲུངས་སྐར་ཟབ་རྒྱས་ཤིག་སྲུང་བརྩི་ཞུ་འཆར་ཡོད་སྐོར་སྤྲུལ་སྐུ་བསྟན་འཛིན་བདེ་ལེགས་ཞབས་ཞུ་ཚོགས་པས་འགྲེལ་བརྗོད་གནང་སོང་། །
ལྷོ་ཕྱོགས་གསར་འགོད་པ་ཐུབ་བསྟན་བཀྲ་ཤིས།