བཙན་བྱོལ་བོད་མིའི་རིན་ཐང་ལྟ་བ།

བོད་ཀྱི་བང་ཆེན་སྤྱིའི་འདོན་ཐེངས་ ༥༡༧   ཕྱི་ལོ་ ༢༠༡༤/༡༡/༡༩

སྤྱིར་འཇིག་རྟེན་གྱི་ཁམས་འདིར་སེམས་ཅན་གྱི་ཁམས་དབང་མོས་པ་བསམ་བློའི་འཆར་སྒོ་སྣ་ཚོགས་ལ་བརྟེན་ནས་རིན་ཐང་གི་ལྟ་བ་གཅིག་མཚུངས་ཤིག་སླེབས་ཐུབ་ཐབས་གཏན་ནས་མེད་ལ། མིའི་འགྲོ་བ་གཅིག་པུའི་ངོས་ནས་བཤད་ཀྱང་ཅིག་ཤོས་ཀྱིས་ཡག་པར་འཛིན་པ་དེ་ཅིག་ཤོས་ཀྱིས་སྡུག་པར་བརྩི་བའི་གནས་ཚུལ་ནི་གྲངས་ཀྱིས་མི་ཆོད། ད་དུང་ཕ་གཅིག་མ་གཅིག་གི་སྤུན་མཆེད་ཡིན་ཡང་རིན་ཐང་གི་ལྟ་བ་འཛིན་སྟངས་མི་འདྲ་བ་སྣ་ཚོགས་ཤིག་ཡོང་གི་ཡོད་པ་ནི་ཆོས་ཉིད་ཀྱིས་གྲུབ་ཡོད། འོན་ཀྱང་རྒྱ་བལ་འབྲུག་གསུམ་དུ་ཡོད་པའི་བཙན་བྱོལ་བོད་པའི་སྤྱི་ཚོགས་ནང་གི་མི་ཕལ་མོ་ཆེའི་རིན་ཐང་གི་ལྟ་བར་ཧོབ་སྟེ་བལྟས་ན་གནད་དོན་གཅིག་གི་ཐོག་ལ་གཅིག་མཚུངས་ལྟ་བུར་གྱུར་ཡོད་པ་དེ་ཡོངས་གྲགས་རང་བཞིན་གྱི་གནས་བབས་ཤིག་ཏུ་གྱུར་ཡོད། དེ་ནི་བོད་མི་ཕལ་མོ་ཆེ་ནུབ་ཕྱོགས་ཀྱི་ཡུལ་གྲུ་ཁག་ཏུ་གནས་སྤོ་བྱ་རྒྱུ་དེ་ཕུགས་ཀྱི་རེ་བ་དང་འཆར་སྣང་གཙོ་བོ་ཞིག་ཏུ་འཛིན་བཞིན་པ་དེ་ཡིན་ཞིང། དེའི་ཐོག་ལ་འབད་བརྩོན་བྱེད་པ་ནི་ལས་དོན་དང་དམིགས་ཡུལ་གཞན་གང་གིས་ཀྱང་འགྲན་མི་བཟོད་པ་ཞིག་རེད།

ནུབ་ཕྱོགས་ཀྱི་ཡུལ་གྲུ་ཁག་ཏུ་འགྲོ་རྒྱུའི་དམིགས་ཡུལ་གཙོ་བོ་ནི་དཔལ་འབྱོར་གྱི་ཐོག་ནས་ཡར་རྒྱས་འགྲོ་བར་དམིགས་ཡོད་ལ། ཕྲུ་གུ་རྣམས་ནུབ་ཕྱོགས་ཀྱི་ཡུལ་གྲུ་ཞིག་ཏུ་འཚར་ལོང་བྱུང་སོང་ན་མདུན་ལམ་གྱི་ཐོག་ནས་རེ་བ་ཆེན་པོ་ཡོད་པ་ཞིག་ཏུ་བརྩི་བཞིན་ཡོད། ཕྱོགས་གཅིག་ནས་ཕ་མས་རང་ཉིད་བློས་བཏང་སྟེ་བུ་ཕྲུག་གི་མདུན་ལམ་ཐོག་ལ་རེ་བ་རྒྱག་པ་ནི་གཟི་བརྗིད་ཅིག་རེད་ཅེས་བརྗོད་ཆོག་ལ། ཕྱོགས་གཅིག་ནས་རིག་གཞུང་གི་ཁོར་ཡུག་གཏན་ནས་མི་གཅིག་ས་ཞིག་ནས་རང་ཉིད་ཀྱི་བུ་ཕྲུག་འཚར་ལོང་བྱུང་སོང་ན། མ་འོངས་པར་བོད་མི་རིགས་ཀྱི་ཁྲག་རྒྱུན་ཡོད་པ་ཙམ་ལས་བོད་པའི་གཤིས་ཀ་དང་རིག་གནས་གང་ཡང་མེད་པའི་རང་ཉིད་ཀྱི་རྒྱུད་འཛིན་པ་ཞིག་འཚར་ལོང་ཡོང་ངེས་རེད། དེ་ནི་རྒྱལ་ཁབ་དང་མི་རིགས་ཀྱི་གནད་དོན་ཁོ་ན་ཙམ་མ་ཡིན་པར། རང་ཉིད་དང་རང་གི་ནང་མི་སྤུན་མཆེད་ཁོ་ནའི་ངོས་ནས་བཤད་ཀྱང་ངོ་ཚ་ཁ་སྐྱེངས་ཀྱི་གནད་དོན་ཞིག་ལས། འདོད་པ་ཁེངས་ངེས་ཤིག་རེད་ཅེས་སུས་ཀྱང་ཁ་ཚོན་བཅད་ནས་བཤད་མི་ཐུབ།

ཁོར་ཡུག་དང་མཐུན་རྐྱེན་གང་ཐད་ནས་ད་ལྟའི་ཆར་ནུབ་ཕྱོགས་ཀྱི་ཡུལ་གྲུ་ཁག་ལ་ཕྱིའི་དངོས་པོའི་ཐོག་ནས་སྔོན་ཐོན་གྱི་རང་བཞིན་ཡོད་པ་གསལ་པོ་ཡིན་ཡང། ནུབ་ཕྱོགས་ཀྱི་མི་ཡོད་ཚད་ཕྱུག་པོ་དང་འབྱོར་ལྡན་མིན་པ་དང། ནུབ་ཕྱོགས་སུ་འགྲོ་ཐུབ་པ་ཙམ་གྱིས་ཕྱུག་པོར་འགྱུར་འགྲོ་བ་ཞིག་དེ་བས་ཀྱང་མིན། ནུབ་ཕྱོགས་སུ་ཡོད་མཁན་ཚང་མ་དཀའ་ལས་རྒྱག་མཁན་ཡིན་པ་དང། སྤྱིར་ངལ་རྩོལ་ལ་བརྟེན་ནས་འཚོ་བ་སྐྱེལ་མཁན་ནི་གཟི་བརྗིད་ཧ་ཅང་ཆེན་པོ་ཡིན་ནའང། དབུལ་དང་ཕྱུག་གི་གནས་སྟངས་དེ་རང་ཉིད་འཚོ་སྡོད་བྱེད་སའི་རྒྱལ་ཁབ་དང་ཡུལ་གྲུའི་དེའི་གནས་སྟངས་ལ་ལྟོས་ནས་བཤད་དགོས་པ་ལས། རྒྱ་གར་དུ་ཡོད་པའི་བོད་པའི་གནས་བབས་དང་བསྡུར་བ་དང། རང་ཉིད་ཀྱི་ཡོང་འབབ་དེ་རྒྱ་གར་གྱི་དངུལ་དུ་ཛ་བསྒྱུར་བྱས་ན་མང་ཙམ་མཐོང་སྲིད་ཀྱང། ཡུལ་ལུང་དེ་ནས་འཚོ་བ་སྐྱེལ་དགོས་དུས་ཡུལ་ལུང་དེའི་གནས་སྟངས་ཀྱི་ཐོག་ནས་རང་ཉིད་དབུལ་པོ་ཡིན་དང། ཕྱུག་པོ་ཡིན་པའི་གནས་སྟངས་དེ་གསལ་པོ་རྟོགས་ཐུབ་པ་ཞིག་རེད།

བོད་མི་གང་ཞིག་རྒྱ་གར་དུ་ཡོད་ཀྱང་རུང། ནུབ་ཕྱོགས་སུ་ཡོད་ཀྱང་རུང། རང་ཉིད་གནས་སྡོད་བྱེད་པའི་ཁོར་ཡུག་དེ་ནས་རང་ཉིད་ཀྱི་འཚོ་ཐབས་སྐྱོ་པོའི་གྲས་ཡིན་ཚེ་དཔལ་འབྱོར་ཁོ་ན་གཙོ་བོར་འཛིན་མཁན་ཞིག་གི་ངོས་ནས་དུས་ནམ་ཡང་སེམས་པ་སྐྱིད་པོ་ཡིན་པའི་ཚོར་སྣང་དེ་སླེབས་དཀའ་བ་ཞིག་རེད། གནས་སྟངས་དེ་ལས་རང་ཉིད་ཀྱི་བུ་ཕྲུག་གིས་རང་མི་རིགས་ཀྱི་སྐད་ཡིག་རིག་གནས་ཤེས་པ་དང། ནམ་ཞིག་གཞིས་བྱེས་ལྷན་འཛོམས་ཡོང་བའི་དུས་བཟང་ཞིག་འཆར་སྲིད་པའི་དབང་དུ་བཏང་ཡང་སྐབས་དེ་དུས་སྤུན་མཆེད་དག་གི་མདུན་ནས་ངོ་གནོངས་མི་དགོས་པ་ཞིག་ཏུ་གྱུར་ཡོད། འོན་ཀྱང་གོང་དུ་ནན་བརྗོད་བྱས་པ་བཞིན་གནད་དོན་འདི་དག་གླེང་བའི་སྐབས་སུ་རིང་ཐང་གི་ལྟ་བ་གཅིག་གྱུར་ཞིག་གཏན་ནས་སླེབས་ཐུབ་ཐབས་མེད་པ་དང། ད་ལྟའི་ཆར་ནུབ་ཕྱོགས་སུ་འགྲོ་རྒྱུའི་རེ་བ་དང་རྨི་ལམ་དེ་དཔལ་འབྱོར་གྱི་མཐུན་རྐྱེན་ཡོད་མེད་ཚང་མའི་སེམས་ནང་ཡོད་ཀྱང། ད་ནས་བརྩིས་པའི་ལོ་བཅུ་བཅོ་ལྔ་ཙམ་གྱི་རྗེས་སུ་ལྟ་སྟངས་དེ་ལ་རྦད་དེ་འགྱུར་བ་ཆེན་པོ་ཞིག་འགྲོ་མི་སྲིད་པའང་མ་རེད།

མདོར་ན་ད་ལྟའི་ཆར་གོང་གི་བླ་མ་མི་དཔོན་དང་དགེ་བཤེས་མཁན་པོ། ཤེས་འཇོན་གཉིས་ལྡན་དུ་བརྩི་བ་དག་གིས་ཀྱང་རེ་བ་ཉག་གཅིག་དེ་ནུབ་ཕྱོགས་སུ་བསྐྱོད་རྒྱུ་དེ་ཡིན་པས། མཐའ་གཅིག་ཏུ་ནོར་འདུག་ཅེས་བཤད་དགོས་ན་རང་ཉིད་རང་ལ་ཡིད་ཆེས་དཀའ་བ་ཞིག་ཏུ་གྱུར་ཡོད་ཀྱང། ཕུགས་རྒྱང་རིང་པོའི་ཐོག་ནས་བསམ་བློ་བཏང་ན་མི་རིགས་ཤིག་དང་མི་སྒེར་ཞིག་གི་ངོས་ནས་དཔལ་འབྱོར་ནི་ཡོད་ཚད་ཀྱི་ཡོད་ཚད་ཡིན་མི་སྲིད་པ་དང། ལྷག་པར་དུ་རང་གི་རིགས་རྒྱུད་འཛིན་མཁན་གྱི་བུ་ཕྲུག་དག་ལ་རང་ཉིད་ཀྱི་ཁྲག་རྒྱུན་ཙམ་ལས། བོད་ཀྱི་རིག་གནས་དང་ཡ་རབས་བཟང་སྤྱོད་ཀྱི་གཟུངས་གཞུུག་དེ་གཏན་ནས་མེད་པར་གྱུར་ན། རྒྱུ་ནོར་ཅུང་ཙམ་ཡོད་པའི་དབང་དུ་བཏང་ཡང་གཟུངས་གཞུག་མེད་པའི་འདམ་སྐུ་ལྟ་བུ་ཞིག་ལས་དམིགས་བསལ་རིན་ཐང་གང་ཡང་མེད་པ་ལྟ་བུར་གྱུར་ཡོད། ནམ་ཞིག་ནུབ་ཕྱོགས་སུ་སླེབས་པ་ཙམ་གྱིས་དཔལ་འབྱོར་ཕྱུག་པོར་འགྱུར་མི་སྲིད་པའི་གནས་ལུགས་བཅས་ལ་བདེན་ཁ་སྟེར་མཁན་གྱི་བོད་མི་གང་མང་ཞིག་ཡོང་ན། སྐབས་དེར་གཞི་ནས་རིན་ཐང་གི་ལྟ་བ་གསར་པ་ཞིག་སླེབས་ངེས་རེད།།