ཡུ་རོབ་ཏུ་བོད་མི་ཚང་མ་མཉམ་རུབ་ཀྱི་ལས་འགུལ་སྤེལ་འཆར།

དེ་ཡང་ཡུ་རོབ་བོད་དོན་ལས་འགུལ་ཆེན་མོ་ནི་ཕྱི་ལོ་༢༠༡༣ ལོར་ཡུ་རོབ་བོད་རིགས་སྤྱི་མཐུན་ཚོགས་པ་ཐུན་མོང་མཉམ་རུབ་ཀྱིས་ཡུ་རོབ་སྤེལ་རྗམ་གྱི་རྒྱལ་སར་བྷིར་སུར་ལ་སུམ་བཅུའི་དུས་དྲན་དང་སྟབས་བསྟུན། བོད་དོན་ལས་འགུལ་ཆེན་མོ་འགོ་འཛུགས་བྱས་ཡོད་པ་རེད།

དེ་ཡང་ཡུ་རོབ་ཀྱི་རྒྱལ་ཁབ་ཡོངས་རྫོགས་ནང་ལོ་རེ་བྱས་ནས་ལས་འགུལ་སྤེལ་ཐུབ་པ་ཡིན་ན་དགེ་མཚན་ཆེན་པོ་ཡོད་པ་དང་ལྷག་པར་དུ་ཡུ་རོབ་ནང་གནས་སྡོད་བྱེད་མཁན་ཁ་འཐོར་བོད་མི་མང་པོ་ཡོད་པ་རེད། བོད་མི་ཡོངས་ལས་འགུལ་གཅིག་གིས་ཐོག་མཉམ་འཛོམས་བྱེད་ཐུབ་པ་བྱུང་ན། མི་འབོར་མང་པོ་ཡོད་པ་དང་ལས་འགུལ་ཡིན་ན་ཡང་ཚགས་ཚུད་པོ་དང་རྒྱ་ཆེ་རུ་འགྲོ་ཐུབ་པའི་དམིགས་ཡུལ་བཟུང་བའི་ཐོག་ནས་ཡུ་རོབ་བོད་རིགས་སྤྱི་མཐུན་ཚོགས་པ་ཡོངས་དང་། ཡུ་རོབ་བོད་མིའི་སྤྱི་འཐུས། སྐུ་ཚབ་དོན་གཅོད་རྣམ་པ་བཅས་མཉམ་འཛོམས་ཐོག་ལས་འགུལ་དེ་ལྟར་སྤེལ་རྒྱུའི་ཐག་གཅོད་བྱུང་བ་ཞིག་ཡིན་པ་རེད། ༢༠༡༥ ལོར་ཧྥ་རན་སིའི་རྒྱལ་སར་བོད་དོན་ལས་འགུལ་ཆེན་མོ་འདི་ཉིད་སྤེལ་གཏན་ཁེལ་བ་ཙམ་དུ་མ་ཟད། འབྱུང་འགྱུར་ཡང་མུ་མཐུད་ནས་བོད་དོན་བདེན་མཐའ་མ་གསལ་བར་དུ་ཡུ་རོབ་ནང་བོད་མི་གནས་སྡོད་བྱེད་ས་དག་གིས་མཚོན་པའི་ཡུ་རོབ་རྒྱལ་ཁབ་ཁག་གི་ནང་ལས་འགུལ་དེ་བཞིན་ལོ་ལྟར་རེས་མོས་བྱས་ནས་སྤེལ་འཆར་ཡོད་པ་རེད་ཅེས་འབྲེལ་ཡོད་ཀྱིས་འགྲེལ་བརྗོད་བྱས་སོང་།

ཉེ་ཆར་ཁོང་ཚོས་གསལ་བསྒྲགས་ཤིག་སྤེལ་བའི་ནང་འཁོད་དོན།   ཡུ་རོབ་རྒྱལ་ཁབ་འདྲ་མིན་གྱི་ནང་དུ་གནས་བཞུགས་བོད་རིགས་སྤུན་ཟླ་ཡོངས་ཀྱི་སྙན་ལམ་དུ་ཆེད་ཞུ། ཚང་མའི་དགོངས་མངའ་བཞིན་བོད་ནང་ལ་རྒྱ་གཞུང་གིས་དྲག་པོའི་དཔུང་ཤུགས་ཁོ་ན་བེད་སྤྱོད་དབང་བསྒྱུར་འོག་ཏུ་ཚུད་པའི་གཞིས་ལུས་རྒྱ་ཆེའི་མི་མང་གི་ཆོས་སྲིད་རིག་འབྱོར་སོགས་ཀྱི་གནས་སྟངས་ཧ་ཅང་སྐྱོ་བའི་ཐོག་ད་ལྟའི་ཆར་ཕྱོགས་ཡོངས་ནས་ཛ་དྲག་ཆེ་རུ་འགྲོ་དང་འགྲོ་བཞིན་པའི་སྐབས་འདིར། ཡུ་རོབ་བོད་རིགས་ཚོགས་པ་རྣམས་ཀྱིས་མགྲིན་དབྱངས་གཅིག་གྱུར་གྱི་སྒོ་ནས་བོད་དོན་ལས་འགུལ་སྤེལ་འཆར་གྱི་གྲོས་ཆོད་བཞག་པ་གཞིར་བཟུང་གིས།   འཆར་ལོ་༢༠༡༥ ཟླ་བ་༣ ཚེས་༡༤ ཉིན་སྟེ་རེས་གཟའ་སྤེན་པའི་ཉིན་ཧྥ་རན་སིའི་རྒྱལ་ས་པེ་རི་སིའི་(Trocadero) ས་གནས་ནས་འགོ་འཛུགས་བྱས་ཏེ་ཡུ་རོབ་བོད་དོན་ལས་འགུལ་ཆེན་མོ་འདི་ཉིད་སྤེལ་རྒྱུ་གཏན་ཁེལ་བྱུང་བར་བརྟེན། ཡུ་རོབ་གླིང་ཆེན་དུ་གནས་གཞུགས་རྒྱ་ཆེའི་བོད་རིགས་སྤུན་ཟླ་མི་མང་ཡོངས་ཀྱིས་རང་དོན་རང་གཅེས་དང་གལ་ཆེན་དོན་ཆེན་དུ་བརྩིས་ཏེ་རང་ཉིད་ཀྱི་རྒྱལ་ཁབ་དང་མི་རིགས་བཅས་ཀྱི་རྩ་དོན་ཆེད་དུ་ལོ་རྒྱུས་རང་བཞིན་ལྡན་པའི་ཡུ་རོབ་བོད་དོན་ལས་འགུལ་ཆེན་མོའི་ནང་དུ་ཆ་ཤས་ངེས་པར་དུ་ལེན་ཐུབ་པར་འབད་རྩོན་གནང་རོགས་ཞེས་འཁོད་ཡོད་པ་རེད།

བོད་མི་ཚང་མས་སོ་སོའི་ལས་ཀ་ནས་གང་མགྱོགས་དགོངས་པ་ཞུ་ཕྱོགས་དང་། དུས་ཚོད་སྟབས་བསྒྲིགས་ཏེ་འགྲིམ་འགྲུལ་ལག་འཁྱེར་ཉོ་རྒྱུའི་མཚོན་གྲ་སྒྲིག་སོགས་ཚགས་ཚུད་ཡོང་ཆེད་ད་ལྟ་ནས་གསལ་བསྒྲགས་གཏོང་བཞིན་ཡོད་པ་ལགས་ན། སྐབས་དེར་ལས་འགུལ་ནང་མཉམ་ཞུགས་གནང་མཁན་བོད་མི་ཚང་མས་བོད་ཆས་གཙང་མ་གྱོན་ཏེ་ཡུ་རོབ་བོད་དོན་ལས་འགུལ་ཆེན་མོའི་ནང་བོད་མི་རང་ཉིད་ཕེབས་ཐུབ་པར་བྱ་རྒྱུ་ཙམ་མ་ཟད།   སོ་སོའི་ངོས་ཤེས་པའི་བོད་ཀྱི་གྲོགས་པོ་དང་ཡུལ་མི་གང་མང་མང་ཞིག་མཉམ་དུ་ཁྲིད་ཡོང་ཐབས་གནང་རོགས་ཞེས་གསལ་བསྒྲགས་སྤེལ་ཡོད་པ་རེད།།

ལྷོ་ཕྱོགས་གསར་འགོད་པ་ཐུབ་བསྟན་བཀྲ་ཤིས།