བོད་ཨ་མདོ་བསང་ཆུ་རྫོང་ཁོངས་སུ་རང་ལུས་མེར་སྲེག་གི་རྒྱ་རྒོལ།

ཟླ་འདིའི་ཚེས་༡༦ ཉིན་གྱི་སྔ་དྲོ་བོད་མདོ་སྨད་བླ་བྲང་ཨ་མཆོག་ཡུལ་ཚོའི་རྒྱ་གཞུང་ཉེན་རྟོག་ལས་ཁུངས་སྒོ་འགྲམ་དུ་བོད་མི་སངས་རྒྱས་མཁར་ཟེར་བ་ཞིག་གིས་རང་ལུས་མེར་སྲེག་གིས་རྒྱ་ནག་ལ་ངོ་རྒོལ་བྱས་ཏེ་སྐུ་གྲོངས་ཡོད་འདུག

དེ་ཡང་འབྲེལ་ཡོད་ནས་གནས་ཚུལ་བརྗོད་གསལ་ལྟར་ན། ཕྱི་ཚེས་༡༦ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༩ པ་ཡས་མས་སུ་བོད་མདོ་སྨད་ཀན་ལྷོ་ཁུལ་བླ་བྲང་བསང་ཆུ་རྫོང་། ཨ་མཆོག་ཁྱུང་རུ་ཐང་ཡུལ་ཚོ་ནས་ཡིན་པའི་ཕ་དབང་ལོ་དང་། མ་གཡུ་སྒྲོན་གཉིས་ཀྱི་བུ་སངས་རྒྱས་མཁར་གྱིས་ཨ་མཆོག་ཡུལ་ཚོའི་ཉེན་རྟོག་ལས་ཁུངས་སྒོ་འགྲམ་དུ་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ་སྐུ་གྲོངས་ཡོད་འདུག

སངས་རྒྱས་མཁར་གྱིས་རང་ལུས་མེར་སྲེག་བཏང་རྗེས་ས་གནས་རྒྱ་གཞུང་ཉེན་རྟོག་པས་ཁོང་གི་ཕུང་པོ་བཙན་འཕྲོག་བྱས་ཡོད་པ་མ་ཟད།  ས་གནས་གང་དུ་ཁྱེར་ཡོད་མེད་ཀྱང་ཤེས་རྟོགས་བྱུང་མེད་ན་ཡང་། ས་གནས་མི་མང་ཚོས་ཉེན་རྟོག་པས་ཁོང་གི་ཕུང་པོ་བསང་ཆུ་རྫོང་དུ་ཁྱེར་ཡོད་པའི་ཚོད་དཔག་བྱེད་བཞིན་ཡོད་པ་རེད། སངས་རྒྱས་མཁར་ནི་ད་ལྟ་རང་ལོ་ ༣༤ ཡིན་པ་དང་ཁོང་ལ་བུ་མོ་གཉིས་ཡོད་པའི་གནས་ཚུལ་འདུག །
ལྷོ་ཕྱོགས་གསར་འགོད་པ་ཐུབ་བསྟན་བཀྲ་ཤིས།