བོད་ཀྱི་རྒྱལ་དར་གྱིས་བོད་མི་ཚང་མ་ངོ་བོ་གཅིག་མཚོན་ཡོད།

བོད་རང་བཙན་སློབ་ཕྲུག་ཚོགས་པས་སྣེ་ཁྲིད་གོ་སྒྲིག་འོག བོད་རང་བཙན་གྱི་ཉིན་མོ་སྲུང་བརྩི་དང་འབྲེལ་བའི་བོད་ཀྱི་རྒྱལ་དར་བསྒྲེངས་འཛུགས་དང་འགྲེམས་སྟོན་གྱི་ལས་འགུལ་ཞིག་དྷ་རམ་ས་ལ་གཙོས་ས་ཆ་གང་སར་སྤེལ་འགོ་བཙུགས་ཡོད་པ་རེད།
དེ་ཡང་བོད་རང་བཙན་སློབ་ཕྲུག་ཚོགས་པའི་ངོས་ནས་༢༠༡༣ ལོར་རྒྱལ་དབང་སྐུ་འཕྲེང་༡༣ པས་བོད་རང་བཙན་བསྐྱར་ནན་གྱི་བསྒྲགས་གཏམ་སྤེལ་ཏེ། ལོ་༡༠༠ འཁོར་བའི་དུས་དྲན་སྲུང་བརྩི་ཞུས་པ་དང་། འདི་ལོའི་ཕྱི་ཟླ་༢ པའི་ཚེས་༡༣ ཉིན་དེ་བཞིན་བོད་རང་བཙན་གྱི་ཉིན་མོ་སྲུང་བརྩིའི་ཆེད་བོད་ཀྱི་རྒྱལ་དར་བསྒྲེངས་འཛུགས་དང་རྒྱལ་དར་འགྲེམས་བསྟོན་སོགས་བརྒྱུད་ལས་འགུལ་སྤེལ་འཆར་ཡོད་པ་རེད།
དེའི་སྐོར་བོད་རང་བཙན་སློབ་ཕྲུག་ཚོགས་པའི་གཞི་རིམ་ལས་འགུལ་འགན་འཛིན་ཚེ་ལྷས་འགྲེལ་བརྗོད་གནང་བ་ལྟར་ན། བོད་ཀྱི་རྒྱལ་དར་དེ་བོད་ཀྱི་འཐབ་རྩོད་ནང་གལ་ཆེན་པོ་ཡིན་པ་དང་། རྒྱལ་དར་དེས་བོད་མི་གཅིག་གྱུར་གྱི་ངོ་བོ་མཚོན་ཐུབ་པར་ངོས་འཛིན་བྱེད་ཀྱི་ཡོད་ལ། ༡༩༥༩ ལོ་ནས་༡༩༨༧ ལོ་དང་༢༠༠༨ ལོས་མཚོན་རྒྱ་ནག་ལ་ངོ་རྒོལ་ལས་འགུལ་རིམ་པས་ནང་བོད་ཀྱི་རྒྱལ་དར་དེ་འཕྱར་ཡོད་པ་རེད། བཙན་བྱོལ་ནང་ད་ལོ་དམིགས་བསལ་གྱིས་བོད་རང་བཙན་ཉིན་མོ་སྲུང་བརྩིའི་ཆེད་༢༠༡༥ ལོ་ནས་འགོ་འཛུགས་བྱས་ཏེ། མི་ཁ་ཤས་ཆུ་ནང་འཛུལ་ནས་རྒྱལ་དར་འཕྱར་བ་དང་། ཁག་ཅིག་གིས་ཁ་བའི་ནང་དང་རི་སྒང་དུ་རྒྱལ་དར་འཕྱར་བའི་ལས་འགུལ་སྤེལ་བཞིན་ཡོད་པ་རེད།

བོད་རང་བཙན་སློབ་ཕྲུག་ཚོགས་པའི་ཡན་ལག་ཡོད་སའི་རྒྱལ་ཁབ་སུམ་བཅུ་ལྷག་གཙོས། རྒྱལ་ཁབ་ཚང་མས་ནང་ལས་འགུལ་དེ་སྤེལ་ཐབས་བྱེད་ཀྱི་ཡོད་པ་དང་། ཟླ་འདིའི་ཚེས་༤ ཉིན་དྷ་སའི་ཁྲོམ་དཀྱུལ་དུ་ལྷ་སའི་ཕོ་བྲང་པོ་ཏ་ལའི་ཐོག་ནས་རྒྱ་ནག་གི་རྒྱལ་དར་མར་ཕབ་སྟེ། བོད་ཀྱི་རྒྱལ་དར་ཡར་བསྒྲེངས་འཛུགས་བྱས་པའི་སྟབས་བདེའི་འཁྲབ་སྟོན་རྒྱང་མཐོང་ནས་མཐོང་ཐུབ་པའི་ལས་འགུལ་ཞིག་སྤེལ་ཡོད་པ་རེད་ལ། དེ་བོད་མི་ཚང་མར་དུས་ཚོད་དེ་འདྲ་ཞིག་ཤར་གྱི་ཡོད་པའི་འཆར་སྣང་ཡོད་པ་དེ་མཚོན་ཆེད་དུ་ཡིན་པ་རེད།

ཟླ་འདི་ཚེས་༥ དྷ་སའི་གཙུག་ལག་ཁང་གི་ཉེ་འགྲམ་གྱི་རྩིག་ངོས་སུ་ཐང་ཀ་དང་དེང་རབས་རི་མོ་བ་ཀརྨ་སྲིད་ཆོས་ཀྱིས་བོད་ཀྱི་རྒྱལ་དར་འབྲི་ས་སོགས་ཀྱི་ལས་འགུལ་སྤེལ་ཡོད་པ་དང་། བོད་རང་བཙན་གྱི་ཉིན་མོ་རྒྱལ་དར་བསྒྲེངས་འཛུགས་ཀྱི་དངོས་གཞིའི་ལས་འགུལ་དེ་རྒྱལ་བ་སྐུ་འཕྲེང་༡༣ པས་བོད་རང་བཙན་བསྐྱར་ནན་གྱི་བསྒྲགས་གཏམ་སྤེལ་བའི་ཉིན་མོ་དང་སྟབས་བསྟུན། དྷ་ས་ཉིན་མོའི་སློབ་གྲྭའི་ནང་རྒྱལ་དར་སྐོར་དང་འབྲེལ་བའི་གཏམ་བཤད་བགྲོ་གླེང་ཞིག་གོ་སྒྲིག་བྱེད་ཀྱི་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།