བོད་ཞུ་བའི་ཤུགས་རྐྱེན་ཞེས་པའི་དཔེ་དེབ།

ཟླ་འདིའི་ཚེས་༡༦ ཉིན་གྱི་ཕྱི་དྲོ་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག སྐུ་ཞབས་མཱེ་ཁེལ་(Michael Buckley )གྱིས་བརྩམས་པའི་བོད་ཀྱི་ཁོར་ཡུག་གནས་སྟངས་སྐོར་གྱི་དེབ་“བོད་ཞུ་བའི་ཤུགས་རྐྱེན་” (Meltdown in Tibet )ཞེས་པའི་དེབ་དེ་དབུ་འབྱེད་བྱས་ཡོད་པ་རེད།

དེབ་དེའི་ནང་དུ་རྒྱ་ནག་གིས་བོད་ཀྱི་ཁོར་ཡུག་ལ་གཏོར་བཤིག་ཚབས་ཆེན་བཏང་བའི་རྐྱེན་གྱིས་བོད་ནང་གི་དཀའ་ངལ་སྐོར་དང་། དེས་འཛམ་གླིང་གི་ཁོར་ཡུག་ལ་གནོད་སྐྱོན་ཐེབས་ཀྱི་ཡོད་སྐོར། དེ་བཞིན་བོད་ནང་གི་ཆུ་དང་ཤིང་ནགས་ལ་གཏོར་བཤིག་དང་། གཏེར་ཁ་སྔོག་འདོན། འབྲོག་པའི་གནས་སྟངས་སོགས་ཀྱི་སྐོར་འཁོད་ཡོད་པ་རེད།

དེ་བཞིན་ཁོང་གིས་ཁོར་ཡུག་གཏོར་བཤིག་སྐོར་གྱི་དངོས་བྱུང་གློག་བརྙན་ཐུང་ཐུང་ཞིག་ཀྱང་བཟོས་འདུག་ལ། བོད་ནང་གི་ཁོར་ཡུག་རྒྱ་ནག་གཞུང་གིས་གཏོར་བཤིག་བཏང་བར་བོད་མི་ཚོས་ངོ་རྒོལ་བཀག་འགོག་བྱས་ན། གཞུང་གིས་བཙོན་འཇུག་དང་བཀག་ཉར། གཅར་རྡུང་སོགས་བྱེད་ཀྱི་ཡོད་པས། བོད་མི་ཚོར་བྱེད་ཐབས་གང་ཡང་མེད་པར་དཀའ་ངལ་འོག་ཏུ་ཡོད་པ་རེད་ཅེས་རྩོམ་པ་པོས་འགྲེལ་བརྗོད་གནང་སོང་།

སྐུ་ཞབས་མཱེ་ཁེལ་ནི་ཁེ་ན་ཌ་ནས་ཡིན་པ་དང་། བོད་ནང་དུ་ཐེངས་མང་སོང་ནས་ཁོར་ཡུག་སྐོར་ལ་ཞིབ་འཇུག་བྱས་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།