བོད་ཀྱི་སྐད་ཡིག

རྒྱལ་སྤྱིའི་ཨང་སྒྲིག་ཅན་གྱི་ཧི་མ་ལ་ཡའི་ཡིག་གཟུགས་དང་གཏག་ཆས་མགྱོགས་མྱུར་ངང་ཁྱབ་གདལ་དུ་གཏོང་བའི་སྐོར་གྱི་གྲོས་གཞི།
བོད་ཡིག་དེ་རྩིས་འཁོར་དང་ཨིན་ཐེར་དྲ་རྒྱའི་སྟེང་རྒྱ་ཆེར་བཀོལ་སྤྱོད་དང་འཕེལ་རྒྱས་སུ་གཏོང་བར་ཡིག་གཟུགས་དང་གཏག་ཆས་མི་འདྲ་བའི་ཤུགས་རྐྱེན་འོག་ཚད་བཀག་ཆེན་པོ་ཐེབས་ཡོད། སམ་བྷོ་ཊ་དང་པཎྜིཏ། དོན་ཡོད། ཧྥང་ཀྲིན། ཧྭ་ཀོང་སོགས་སོ་སོར་རང་ཉིད་ཀྱི་ཁྱད་ཆོས་ལྡན་པ་མ་ཟད། བཀོལ་སྤྱོད་བྱེད་མཁན་ཡང་མི་ཉུང་བ་རེ་ཡོད།འོན་ཀྱང་མིག་སྔར་ཕན་ཚུན་ཉམས་མྱོང་བརྗེ་རེས་བྱེད་པར་སྟབས་མི་བདེ་བ་དང༌། ཐོན་ཁུངས་མཉམ་སྤྱོད་བྱེད་མི་ཐུབ་ཅིང༌། ཆ་འཕྲིན་བཀོལ་སྤྱོད་བྱེད་ཚད་ཇེ་དམའ་རུ་སོང་ཡོད་ལ། ཆ་འཕྲིན་ཡང་བསྐྱར་བཀོལ་སྤྱོད་བྱེད་པའི་གོ་རིམ་ཁྲོད་མི་ཤུགས་དང་དངོས་ཤུགས། དུས་ཚོད་ཆུད་ཟོས་སོགས་ཀྱི་གནད་དོན་ལྷགས་ཡོད་པས། རྒྱ་ཆེ་བའི་སྒོ་ནས་བཀོལ་སྤྱོད་བྱེད་མི་ཐུབ་པའི་ཚད་དུ་སླེབས་ཡོད། དེ་བས་རྒྱལ་སྤྱིའི་ཨང་སྒྲིག་མེད་པའི་སམ་བྷོ་ཊ་དང་པཎྜིཏ། དོན་ཡོད་བཅས་དང༌། རྒྱལ་སྤྱིའི་ཨང་སྒྲིག་ཕྱེད་ཙམ་ཚང་བའི་ཧྥང་ཀྲིན་བཅས་ཀྱིས་བོད་ཡིག་དྲ་རྒྱའི་ཁྱབ་སྤེལ་ལས་དོན་འཕེལ་རྒྱས་ཀྱི་གོ་རིམ་ཁྲོད་བྱས་རྗེས་ཚད་ངེས་ཅན་ཞིག་བཞག་ཡོད་མོད། འོན་ཀྱང་འཕེལ་རྒྱས་ཀྱི་ཁ་ཕྱོགས་ཐད་ནས་བལྟས་ན། ད་ལྟ་དང་མ་འོངས་པའི་ཆ་འཕྲིན་ཅན་གྱི་འཕེལ་རྒྱས་དང་ཡེ་ནས་མི་འཚམ།