བུད་མེད་ཐོབ་ཐང་དང་འགྲོ་བ་མིའི་ཐོབ་ཐང་ཁ་འབྲལ་ཐབས་མེད།

ཨ་རིའི་ཕྱི་སྲིད་དྲུང་ཆེ་ཟུར་པ་ཧི་ལཱ་རི་ཁི་ལིན་ཌོན་གྱིས་ཀྲུའུ་ཌར་སྤྱི་ཚོགས་འབྲེལ་མཐུད་དྲ་བའི་སྟེང། རྒྱ་ནག་ནང་བུད་མེད་ཚོར་རང་དབང་མེད་སྐོར་གྱི་འཕྲིན་ཐུང་ཞིག་སྤེལ་བའི་རྐྱེན་གྱིས་རྒྱ་ནག་གཞུང་ལ་ཕོག་ཡོད་འདུག

དེའང་ཕྱི་ཟླ་༤ ཚེས་༧ ཉིན་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། རྒྱ་ནག་སྲིད་གཞུང་གིས་བུད་མེད་ལས་འགུལ་པ་༥ ལ་སྤྱི་ཚོགས་ནང་རྙོག་གྲ་བསླངས་པའི་ཉེས་མིང་འོག་བཙོན་འཇུག་བྱས་ཡོད་པ་དང་། བུད་མེད་དེ་དག་གིས་སྤྱི་ཚོགས་ནང་ཤེས་ཡོན་གྱི་རང་དབང་དང་འདྲ་མཉམ་མེད་ཚུལ་དང། ཁྱིམ་ཚང་ནང་བུད་མེད་ཚོར་མནར་གཅོད་དང་ཐུབ་ཚོད་མྱོང་སྟེ། ཐོབ་ཐང་འདྲ་མཉམ་མེད་པའི་ངོ་རྒོལ་བྱས་ཡོད་འདུག

ཨ་རིའི་ཕྱི་སྲིད་དྲུང་ཆེ་ཟུར་པ་དང་སྲིད་འཛིན་༤༢ པ་ཁི་ལིན་ཌོན་གྱི་བཟའ་ཟླ་ལྕམ་ཧི་ལཱ་རི་ཁི་ལིན་ཌོན་གྱིས་མ་འོངས་པའི་སྲིད་འཛིན་འོས་མིའི་ལས་འགུལ་སྤེལ་བཞིན་པ་དང་དུས་མཚུངས། ཁོང་གིས་གོང་གི་གནད་དོན་དང་འབྲེལ་ཁྲེའུ་ཊར་དྲ་བའི་སྟེང། རྒྱ་ནག་ནང་བུད་མེད་ལས་འགུལ་པ་བཀག་ཉར་བྱས་པ་རྣམས་མྱུར་དུ་གློད་བཀྲོལ་དགོས་པ་དང་། གནད་དོན་དེ་དག་ནི་གཟོད་བསྲན་བྱེད་ཐབས་བྲལ་བའི་བྱ་སྤྱོད་ཅིག་ཡིན་སྐོར་བརྗོད་ཡོད་པ་རེད།

ལྕམ་ཧི་ལཱ་རི་ཁི་ལིན་ཌོན་ནི་ནམ་རྒྱུན་བུད་མེད་ཀྱི་ཐོབ་ཐང་རྩོད་ལེན་པ་ཞིན་ཡིན་པ་དང་། ཁོང་གིས་རྒྱ་ནག་ཚུད་པའི་རྒྱལ་སྤྱིའི་ཚོགས་ཆེན་མང་པོའི་ཐོག བུད་མེད་ཀྱི་ཐོབ་ཐང་ནི་འགྲོ་བ་མིའི་ཐོབ་ཐང་དང་ཁ་འབྲལ་ཐབས་མེད་ཅིང། རང་དབང་ཞེས་པ་ནི་སྦས་སྐུང་མེད་པའི་ངང་མི་མང་མཉམ་འཛོམས་དང། ལས་འགུལ་གོ་སྒྲིག བགྲོ་གླེང་བྱེད་པ། གཞུང་དང་ལྟ་བ་མི་མཐུན་པའི་གང་ཟག་ཚང་མའི་བསམ་ཚུལ་ལ་བརྩི་བཀུར་བྱེད་པའི་བྱ་སྤྱོད་ཅིག་ལ་གོ་བ་ལས། ཞི་བའི་ངང་མི་མང་གི་བསམ་ཚུལ་གྱི་སྐད་སྒྲ་ཕྱིར་འདོན་པ་ཙམ་གྱིས། བཙོན་འཇུག་བྱས་ཏེ་སྡུག་སྦྱོང་མནར་གཅོད་བཏང་བ་ནི་རང་དབང་དང་རྒྱབ་འགལ་དུ་སོང་ཡོད་སྐོར་བརྗོད་ཡོད་པ་རེད།

རྒྱ་ནག་གི་ཕྱི་སྲིད་མགྲིན་ཚབ་པ་ཧྤ་ཁྲུན་དབྱི་ཡིས་རྒྱ་ནག་ནི་ཁྲིམས་ཀྱིས་སྐྱོང་བའི་སྤྱི་མཐུན་རྒྱལ་ཁབ་ཅིག་ཡིན་ཞིང། གནད་དོན་གང་ཞིག་ཡིན་ནའང་ཁྲིམས་ལྟར་འབྲེལ་ཡོད་ཚན་ཁག་ནས་ལྟ་སྐྱོང་བྱེད་ཀྱི་ཡོད་པས། རྒྱལ་ཁབ་གཞན་གྱི་འགོ་ཁྲིད་ཚོས་རྒྱ་ནག་གི་ཁྲིམས་ལུགས་དབང་ཚད་དང་རང་དབང་ལ་གུས་བརྩི་གནང་བའི་རེ་བ་ཡོད་ཅེས་ལན་འདེབས་བྱས་ཡོད་འདུག།

གསར་འགོད་པ་བསྟན་འཛིན་ཟླ་བ།