ལོ་ཉི་ཤུ་ལྷག་གི་རིང་བོར་བརླག་ཏུ་ཤོར་བའི་སྟོན་པའི་དབུ་བརྙན་ཞིག་གསར་ཏུ་རྙེད་སོན་བྱུང་།

ལོ་ཉི་ཤུའི་སྔོན་རྒྱ་ནག་ནས་བོར་བརླག་ཏུ་ཤོར་བའི་མི་ལོ་ཆིག་སྟོང་ལྔ་བརྒྱ་ལྷག་གི་ལོ་རྒྱུས་ལྡན་པའི་སྟོན་པ་བཅོམ་ལྡན་འདས་ཀྱི་སྐུ་འདྲའི་དབུ་བརྙན་ཉེ་ཆར་ཐའེ་ཝན་ནས་རྙེད་སོན་བྱུང་ཡོད་འདུག

མི་ལོ་ཉི་ཤུ་སྔོན་གྱི་ཕྱི་ལོ་༡༩༩༦ ལོར། རྒྱ་ནག་ཧི་པེ་ཡུག་ཅུས་དགོན་པ་ནས་ཕྱི་ལོ་༥༥༦ ལོར་བཞེངས་པའི་སྟོན་པའི་སྐུ་འདྲའི་དབུ་བརྙན་རྐུ་ལ་ཤོར་ཡོད་པ་དང་། སྐུ་འདྲ་དེ་ནི་རྒྱ་ནག་རྒྱལ་ཁབ་ཀྱི་རིམ་པ་དང་པོའི་རྩ་ཆེའི་རིག་དངོས་གྲས་སུ་ཚུད་ཡོད་པ་མ་ཟད། སྟོན་པའི་སྐུ་འདྲ་དེའི་དབུ་རྐུ་ལ་ཤོར་བའི་རྗེས། ཤུལ་དུ་ལུས་པའི་སྟོན་པའི་སྐུ་བརྙན་དེ་ཧི་པེ་རིག་དངོས་འགྲེམ་སྟོན་ཁང་དུ་སྲུང་སྐྱོབ་འོག་བཞག་ཡོད་འདུག

གནས་ཚུལ་ནང་ཐོན་པ་ལྟར་ན། ཐའེ་ཝན་ཧྥོ་ཧྲན་དགོན་པའི་བླ་མ་ཞིན་ཡུན་ལགས་ལ་ལོ་སྔོན་མའི་ནང་། དད་ལྡན་པ་གཉིས་ཀྱིས་མི་གཞན་བརྒྱུད་ནས་ལག་ཏུ་སོན་པའི་སྟོན་པའི་དབུ་བརྙན་ཞིག་ཕུལ་ཡོད་ཅིང་། བླ་མ་ཞིན་ཡུན་ལགས་ཀྱིས་སྟོན་པའི་དབུ་ཐོག་མར་མཇལ་དུས་ནས་སྐུ་གཟུགས་རྙེད་ཐུབ་པའི་སྨོན་ལམ་བརྒྱབ་ཡོད་འདུག འབྲེལ་ཡོད་ཆེད་ལས་མི་སྣས་བརྟག་དཔྱད་བྱས་པ་བརྒྱུད། སྟོན་པའི་དབུ་དེ་ནི་ལོ་ཉི་ཤུའི་སྔོན་ནས་རྒྱ་ནག་ཧི་པེ་ནས་བོར་བརླག་ཏུ་ཤོར་བའི་སྟོན་པའི་སྐུ་བརྙན་གྱི་དབུ་ཡིན་པ་ཤེས་རྟོགས་བྱུང་བའི་རྗེས། ཧྥོ་ཧྲན་དགོན་གྱི་བླ་མ་ཞིན་ཡུན་ལགས་ཀྱིས་རིན་མེད་ངང་སྟོན་པའི་དབུ་ཕྱིར་སྤྲོད་བྱ་རྒྱུའི་ཐག་གཅོད་གནང་ཡོད་པ་མ་ཟད། ཟླ་བ་སྔོན་མའི་ནང་རྒྱ་ནག་རིག་དངོས་ལས་ཁུངས་ཀྱིས་སྤྱི་རྒྱ་༡༤༠༠ ཡི་ལྗིད་ཚད་ཅན་གྱི་སྟོན་པའི་སྐུ་གཟུགས་རྒྱ་ནག་ནས། ཐའེ་ཝན་ཧྥོ་ཧྲན་དགོན་པའི་ནང་བོར་འདྲེན་བྱས་ཡོད་པ་དང་། ཕྱི་ཟླ་༥ པའི་ཟླ་མཇུག་ཏུ་ཧྤོ་ཧྲན་དགོན་པའི་ནང་མཛད་སྒོ་ཟབ་རྒྱས་འཚོགས་ཏེ་མི་ལོ་ཉི་ཤུ་ལྷག་གི་རིང་སྐུ་གཟུགས་དང་དབུ་ཁ་བྲལ་ཏེ། ཕྱི་རྒྱལ་དུ་ལུས་པའི་སྟོན་པ་བཅོམ་ལྡན་འདས་ཀྱི་སྐུ་འདྲའི་དབུ་དང་གཟུགས་ཟུང་སྦྲེལ་པའི་མཆོད་འབུལ་རྒྱ་ཆེར་བྱས་ཡོད་པ་རེད།

ལོ་སྔོན་མའི་ཕྱི་ཟླ་༡༢ པའི་ནང་རྒྱ་ནག་རིག་དངོས་ལས་ཁུངས་དང་ཐའེ་ཝན་ཧྤོ་ཧྲན་དགོས་པའི་ཆོས་རིག་ཐེབས་རྩ་ཁང་གཉིས་ཀྱིས་རིན་མེད་ངང་ཕྱིར་སྤྲོད་ཀྱི་གན་རྒྱ་འཇོག་ཡོད་པ་མ་ཟད། ལོ་རྗེས་མའི་དཔྱིད་ཀར་སྟོན་པའི་སྐུ་འདྲ་ཐའེ་ཝན་ཧྥོ་ཧྲན་དགོན་པ་ནས་རྒྱ་ནག་ཧི་པེ་རུ་གདེན་འདྲེན་ཞུ་རྒྱུ་ཡིན་འདུག།

གསར་འགོད་པ་ཏྲེ་ཧོར་ཐུབ་བསྟན།