རྒྱ་ནག་གི་མ་རྐང་ཁྲོམ་ར་མར་ཆག་པ།

འདས་པའི་བདུན་ཕྲག་གསུམ་རིང་རྒྱ་ནག་གི་མ་རྐང་ཁྲོམ་རའི་རིན་གོང་མུ་མཐུད་དུ་མར་ཟགས་ཏེ། པེ་ཅིང་སྲིད་གཞུང་གིས་རང་ནུས་གང་ཡོད་ཀྱིས་མ་རྐང་ཁྲོམ་རའི་ཉེན་ཁ་བཀག་འགོག་བྱ་ཐབས་བྱས་ཡོད་ཀྱང་། དེ་རིང་ཡང་སྔར་བཞིན་མར་ཟགས་པའི་གནས་སྟངས་འོག་ཡོད་པ་དང་། ཨེ་ཤེ་ཡའི་ས་ཁུལ་གཞན་དག་གི་མ་རྐང་ཁྲོམ་ར་མང་ཤོས་དེ་ལས་ལྡོག་ཏེ་ཡར་འཕར་ཡོད་འདུག

ཟླ་འདིའི་ཕྱི་ཚེས་༧ རེས་གཟའ་མིག་དམར་ཉིན། རྒྱ་ནག་ཧྲན་ཧེ་ཡི་མ་རྐང་ཁྲོམ་ར་ཉིན་གཅིག་སྔོན་ཡར་འཕར་བ་ལས་ལྡོག་ཏེ་ད་ལྟ་བརྒྱ་ཆ་༣།༢%མར་ཆགས་པ་དང་། ཧྲན་ཀྲན་གྱི་སྤྱིའི་མ་རྐང་ཁྲོམ་ར་བརྒྱ་ཆ་༥།༦% ལ་མར་ཆགས་ཡོད་པ་རེད།

ད་ལྟ་འབྱུང་བཞིན་པའི་མ་རྐང་ཁྲོམ་རའི་གྱོང་གུད་དེ་དག་ལ་བརྟེན་ནས་པེ་ཅིང་སྲིད་གཞུང་གིས་ཉེ་ཆར་གསར་ཏུ་མ་རྐང་ཁྲོམ་ར་སྲུང་སྐྱོབ་ཆེད་བཏོན་པའི་བྱེད་ཐབས་ལ་དོགས་པ་གསར་པ་ཞིག་སླེབས་བཞིན་ཡོད་ཅིང་། ད་ལྟའི་ཆར་རྒྱ་ནག་གི་མ་རྐང་ཁྲོམ་རའི་རིན་གོང་ཨ་སྒོར་དུང་ཕྱུར་ཁྲི་༣ ལྷག་རྩ་སྟོང་དུ་གྱུར་ཟིན་ཡོད་འདུག རྒྱ་ནག་སྲིད་གཞུང་གིས་ཉེ་ཆར་གཅིག་རྗེས་གཉིས་མཐུད་དུ་བྱེད་ཐབས་གསར་པ་མང་དག་ཅིག་ཁྱབ་བསྒྲགས་བྱས་ཏེ། མ་རྩ་འཛུགས་འཇོག་བྱེད་མཁན་རྣམས་གྱོང་གུད་ལས་གྲོལ་ཐབས་བྱས་ཡོད་པའི་ཁྲོད། ཨ་སྒོར་དུང་ཕྱུར་བཅུ་ཕྲག་འགའ་ཁྲོམ་རར་འཛུགས་འཇོག་བྱས་ཡོད་པ་མ་ཟད། གནས་སྐབས་རིང་གཞུང་དང་གཞུང་འབྲེལ་མིན་པའི་བཟོ་ལས་ཆེ་ཁག་ཁག་ལ་མ་རྐང་ཕྱིར་འཚོང་མཚམས་འཇོག་བྱས་ཡོད།

ཨེ་ཤེ་ཡའི་ས་ཁུལ་གཞན་དག་མང་ཤོས་ཀྱི་མ་རྐང་ཁྲོམ་ར་རེས་གཟའ་མིག་དམར་ཉིན་བསྐྱར་སོས་བྱུང་སྟེ། ཀྲའོ་ཁིའོ། སེཌ་ནི། ཧོང་ཀོང་། ཐའེ་པན། ཝེལ་ལི་ཌོན་སོགས་ཀྱི་མ་རྐང་ཁྲོམ་ར་ཆ་སྙོམས་ཀྱིས་ཡར་འཕར་ཡོད་འདུག

གཞན་ཡང་མིག་སྔར་གྷི་རི་སི་ལ་འཕྲད་བཞིན་བུ་ལོན་གཉེན་འཕྲང་གི་སྐབས་འདིར། ཡུ་སྒོར་མངའ་ཁོངས་ཀྱི་མ་རྐང་ཁྲོམ་ར་དང་ས་ཁུལ་གཞན་མང་པོར་ཤུགས་རྐྱེན་ཐེབས་ཡོད་པར་བརྟེན། ཡུ་སྒོར་མངའ་ཁོངས་ཀྱི་འགོ་ཁྲིད་རྣམས་ཀྱིས་ཟླ་འདིའི་ཕྱི་ཚེས་༧ རེས་གཟའ་མིག་དམར་ཉིན་འཚོག་བཞིན་པའི་ཛ་དྲག་ཚོགས་ཆེན་ལ། མ་རྩ་འཛུགས་འཇོག་བྱེད་མཁན་རྣམས་ཀྱི་དོ་སྣང་ཤུགས་ཆེན་བྱེད་བཞིན་ཡོད་པ་དང་། ཚོགས་ཆེན་དེའི་ཐོག་རྒྱལ་ཁབ་ཀྱི་དཔལ་འབྱོར་ཡོངས་སུ་རྐུབ་བརྡིབས་ཏེ་བུ་ལོན་ཆེན་པོའི་ནང་ལྷུང་ཡོད་པའི་གྷི་རི་སིའི་ཆེད། རྒྱལ་སྤྱིའི་ཁག་ཐེག་རོགས་སྐྱོར་གྱི་གྲོས་གཞི་གསར་པ་ཞིག་འདོན་སྲིད་པའི་ཚོད་དཔག་བྱེད་བཞིན་ཡོད་འདུག

གལ་ཏེ་མགྱོགས་མྱུར་ངང་ཚོང་འབྲེལ་གྱི་གྲོས་ཆོད་ཅིག་བཞག་མ་ཐུབ་པ་ཡིན་ན། གྷི་རི་སི་ལ་དེ་ལས་མང་བའི་བུ་ལོན་འཇལ་སྤྲོད་མི་ཐུབ་པའི་དཀའ་ངལ་འོག་ལྷུང་སྟེ། ཡུ་རོབ་མནའ་མཐུན་ནས་ཁ་བྲལ་ཏེ་ཡུ་སྒོར་བེད་སྤྱོད་མཚམས་འཇོག་བྱ་དགོས་ཁེལ་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན།