རྒྱ་ནག་གི་དྲ་ཉུལ་བས་ཨ་རིའི་མཐོ་རིམ་དཔོན་རིགས་སྒེར་གྱི་མྱུར་འཕྲིན་ལ་བཙན་འཛུལ།

ཕྱི་ལོ་༢༠༡༠ ལོའི་ཟླ་༤ པ་ནས་བཟུང་རྒྱ་ནག་གི་དྲ་ལམ་གསང་ཉུལ་བས་ཨ་རིའི་ཕོ་བྲང་དཀར་པོའི་མཐོ་རིམ་དཔོན་རིགས་སྒེར་གྱི་མྱུར་འཕྲིན་གློག་སྒམ་ནང་བཙན་འཛུལ་བྱས་ཡོད་པ་དང་། མིག་སྔར་དཔོན་རིགས་ཅི་ཙམ་ལ་ཤུགས་རྐྱེན་ཐེབས་ཡོད་མེད་ཁ་གསལ་ཤེས་རྟོགས་མེད་པ་རེད།

ཨ་རིའི་རྒྱལ་ཡོངས་རྒྱང་བསྒྲགས་ལས་ཁུངས་(NBC)ཀྱིས་ཕྱི་ཟླ་༨ པའི་ཚེས་༡༠ ཉིན་སྤེལ་བའི་གནས་ཚུལ་ནང་། གསར་ཁང་དེས་རྙེད་པའི་གསང་བའི་ཡིག་ཆ་ཞིག་དང་ཨ་རིའི་གསང་བའི་ལས་ཁུངས་ཀྱི་མཐོ་རིམ་དཔོན་རིགས་ཤིག་གིས་བཤད་པའི་གནས་ཚུལ་ལ་གཞིགས་ན། ཉུང་མཐཪ་ཡང་ཕྱི་ལོ་༢༠༡༠ ལོའི་ཟླ་༤ པའི་ནས་བཟུང་སྟེ། རྒྱ་ནག་གི་དྲ་ལམ་གསང་ཉུལ་བས་ཨོ་བྷ་མ་སྲིད་གཞུང་གི་མཐོ་རིམ་དཔོན་རིགས་མང་པོའི་སྒེར་གྱི་མྱུར་འཕྲིན་གློག་སྒམ་E-mail ནང་བཙན་འཛུལ་བྱས་ཡོད་འདུག་ནའང་། དཔོན་རིགས་དེ་དག་གི་གཞུང་འབྲེལ་མྱུར་འཕྲིན་གློག་སྒམ་གྱི་བདེ་འཇགས་སྲུང་སྐྱོབ་ཚད་མཐོ་བའི་རྐྱེན་གྱིས་བཙན་འཛུལ་བྱ་ཐུབ་མེད་པ་དང་། རྒྱ་ནག་གི་གསང་ཉུལ་བས་བཙན་འཛུལ་ཐེབས་པའི་ཨ་རིའི་དཔོན་རིགས་དེ་དག་སུ་ཡིན་ཁྱབ་བསྒྲགས་བྱས་མེད་པ་མ་ཟད། ཨ་རིའི་བདེ་སྲུང་ལས་ཁུངས་ཀྱིས་དེའི་སྐོར་ལན་འདེབས་ཁ་གསལ་བྱས་མེད་པ་རེད།

ཨ་རིའི་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལ་ཆེད་དུ་དམིགས་ཏེ། ཨ་རིའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ཀྲུའུ་ཧེ་ཆོན་གྱིས་རྒྱ་ནག་གསར་འགྱུར་ལས་ཁུངས་ཀྱི་གསར་འགོད་པར། “རྒྱ་ནག་སྲིད་གཞུང་དང་དེའི་ཁྱབ་ཁོངས་ཀྱི་མི་སྣས་ལས་ཀ་དེའི་རིགས་མི་གཉེར་བ་མ་ཟད། དྲ་ལམ་གསང་ཉུལ་བའི་རྣམ་པ་ཅི་ལྟ་བུ་ཞིག་གི་ལས་ཀ་ཡིན་ནའང་འཛུལ་ཞུགས་མི་བྱ། རྒྱལ་མཚམས་ལས་བརྒལ་བའི་དྲ་ལམ་གསང་ཉུལ་བའི་ཚུར་རྒོལ་ལ་རྡུང་རྡེག་གཏོང་བར་རྒྱལ་སྤྱིའི་སྤྱི་ཚོགས་ཀྱི་མཉམ་འབྲེལ་ལ་ཤུགས་སྣོན་རྒྱག་དགོས་པ་ལས། གཞི་མེད་ཀྱི་སྐྱོན་འཛུགས་བྱས་པ་དང་། སྐད་སྦུག་གི་ཕྱི་འབྲེལ་ལ་བརྟེན་ནས་གནད་དོན་གང་ཡང་ཐག་གཅོད་བྱ་མི་ཐུབ་”ཅེས་བརྗོད་འདུག

ཝ་ཤིང་ཌོན་རིག་མཛོད་སྲོལ་རྒྱུན་ཐེབས་རྩ་ཁང་ཨ་ཤེ་ཡ་ཞིབ་འཇུག་ལྟེ་གནས་ཁང་གི་མཐོ་རིམ་ཉམས་ཞིབ་པ་ཁྲན་པི་ཡིས་བརྗོད་དོན། ཐེངས་འདིའི་ཡིག་སྒམ་བཙན་འཛུལ་དོན་རྐྱེན་དེ་ཧ་ཅང་ཚོར་བ་རྣོ་བའི་གནས་ཚུལ་དང་འབྲེལ་བ་ཡོད་སྲིད་ཀྱང་། ཁྱོན་ཡོངས་ནས་ཤུགས་རྐྱེན་ཇི་ལྟར་ཐེབས་ཡོད་མེད་ཞིབ་ཕྲའི་གནས་ཚུལ་ཁྱབ་བསྒྲགས་བྱས་པའི་རྗེས་ད་གཟོད་ཁ་ཚོན་གཅོད་ཐུབ་པ་ཞིག་རེད།

སྲོལ་རྒྱུན་ཐེབས་རྩ་ཁང་གི་ཁྲན་པི་ཡིས་བརྗོད་རྒྱུར། “ཨ་རིའི་མཐོ་རིམ་དཔོན་རིགས་སྒེར་གྱི་གློག་སྒམ་ལ་བཙན་འཛུལ་བྱས་པའི་དོན་རྐྱེན་གྱིས་མི་རྣམས་སེམས་འཚབ་བསླངས་ཡོད། གལ་ཏེ་མི་ཞིག་གིས་ཁྱོད་ཀྱི་འགྲོ་འདུག་བྱ་བྱེད་ཆ་ཚང་ལ་རྒྱུས་ལོན་བྱུང་པ་ཡིན་ན། ཁྱོད་ཀྱིས་རྒྱལ་ཁའི་ངང་སྲིད་ཇུས་ཤིག་གཏན་འབེབས་བྱ་ཐབས་བྲལ། དེར་བརྟེན་ནས་དོགས་སློང་བྱས་ཡོད་པ་ནི། ང་ཚོའི་བརྡ་འཕྲིན་བདེ་འཇགས་ལ་བདེ་འཇགས་ཅི་ཙམ་ཡོད་དམ་ཞེས་པ་སོགས་ཡིན། དོན་རྐྱེན་དེ་བྱུང་པའི་དུས་ཚོད་དང་ཧི་ལ་རི་ཁི་ལི་ཌོན་གྱིས་མོ་རང་སྒེར་གྱི་ཡིག་སྒམ་སྤྱོད་དེ་གཞུང་དོན་བསྒྲུབས་པའི་སྐབས་དང་ཁེལ་ཡོད་སྟབས། མི་རྣམས་ལ་རང་བཞིན་གྱིས་དྲི་བ་གཅིག་སླེབས་ཡོང་བ་ནི། ཁི་ལི་ཌོན་གྱི་ཡིག་སྒམ་ལའང་དེ་ལྟ་བུའི་དྲ་ལམ་བཙན་འཛུལ་ཐེབས་མེད་དམ་ཞེས་པ་དེ་ཡིན།”

NBC གསར་ཁང་གིས་སྤེལ་བའི་གནས་ཚུལ་ནང་། སི་ནའོ་ཌན་གྱིས་ཕྱིར་བསྒྲགས་བྱས་པའི་ཨ་རིའི་རྒྱལ་སྲུང་ལས་ཁུངས་ཀྱི་ཡིག་ཆ་གཞན་ཞིག་ལས་མངོན་པ་ལྟར་ན། ཕྱི་ལོ་༢༠༡༠ ལོའི་ལོ་མཇུག་ཏུ། རྒྱ་ནག་གིས་སྐབས་དེའི་ལས་ཐོག་ཨ་རིའི་མཉམ་འབྲེལ་མཐུན་ཚོགས་ཀྱི་ཚོགས་གཙོ་མེ་ཁི་མུ་ལན་(Mike Mullen) གཙོས་པའི་ཨ་རིའི་དཔོན་རིགས་བཞིའི་སྒེར་གྱི་མྱུར་འཕྲིན་ཡིག་སྒམ་ནང་བཙན་འཛུལ་བྱ་ཐབས་བྱས་ཡོད་པ་དང་། ད་ལོའི་ལོ་སྟོད་ཙམ་ལ་Der Spiegel ཡིས་དྲ་ཐོག་ཏུ་ཁྱབ་བསྒྲགས་བྱས་པའི་ཡིག་ཆའི་ནང་འཁོད་པ་ལྟར། རྒྱ་ནག་གི་གསང་ཉུལ་བས་ཨ་རིའི་དཔོན་རིགས་དེ་དག་གི་གློག་ཀླད་ནང་བསམ་བཞིན་དུ་ནད་དུག་གི་གཉེན་ཆས་གཏོང་ཐབས་བྱས་ཡོད་འདུག

NBC གསར་ཁང་གིས་བརྗོད་དོན། ཕྱི་ལོ་༢༠༠༨ ལོའི་སྲིད་འཛིན་འོས་བསྡུ་ཆེན་མོའི་སྔོན། རྒྱ་ནག་གི་དྲ་ལམ་གསང་ཉུལ་བས་ཨོ་བྷ་མ་དང་རྗོན་མའེ་ཁན་གཉིས་ཀྱི་འོས་འགྲན་རྒྱབ་སྐྱོར་རུ་ཁག་གི་མྱུར་འཕྲིན་ཡིག་སྒམ་ལ་ཚུར་རྒོལ་བྱས་ཡོད་པ་མ་ཟད། ཁ་ཤས་ལམ་ལྷོངས་ངང་བཙན་འཛུལ་བྱས་ཐུབ་ཡོད་པའི་ཁྲོད། རྗོན་མའེ་ཁན་སྒེར་གྱི་འབྲེལ་མཐུད་དྲ་རྒྱའང་ཚུད་ཡོད།

NBC གསར་ཁང་གིས་མི་རིང་སྔོན་སྤེལ་བའི་གནས་ཚུལ་ཞིག་གི་ནང་། ཨ་རིའི་བདེ་སྲུང་ལས་ཁུངས་ཀྱིས་བཟོས་པའི་གསང་བའི་ས་ཁྲ་ཞིག་གི་གསལ་བ་ལྟར་ན། རྒྱ་ནག་དྲ་ལམ་གསང་ཉུལ་བས་འདས་པའི་ལོ་ལྔའི་ནང་ལམ་ལྷོངས་ངང་ཨ་རིའི་དྲ་ལམ་ལ་བཙན་འཛུལ་ཐེངས་༦༠༠ ཙམ་བྱས་ཡོད་ཅིང་། དམིགས་འབེན་གྱི་ནང་དུ་ཨ་རིའི་སྲིད་གཞུང་དང་དམག་དོན་སྡེ་ཁག དེ་བཞིན་གྷུ་གྷི་google སོགས་ཨ་རིའི་ཁེ་ལས་ཆེ་གྲས་ཁག་ཚུད་ཡོད་པ་རེད།།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།