གསུམ་བཅུ་དུས་དྲན་ཉིན་བྲག་འགོ་རུ་མེ་མདའ་བརྒྱབ།

ཁ་སང་གསུམ་བཅུ་དུས་དྲན་ཉིན་ཏྲེ་ཧོར་བྲག་འགོ་རྫོང་མདའ་མདོ་ཡུལ་ཚོ་ནས་ཡིན་པའི་ཕོ་སར་གསུམ་ལྷ་བསང་གཏོང་དུ་སོང་བའི་ལམ་བར་ནས་ཉེན་རྟོག་པས་མེ་མདའ་བརྒྱབ་སྟེ། མི་གཅིག་ལ་རྨས་སྐྱོན་བཟོས་པ་དང་གཞན་གཉིས་བྲོས་ཐུབ་ཡོད་འདུག

དེའང་འབྲེལ་ཡོད་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་བོད་མིའི་རང་དབང་སྒེར་ལངས་ཐེངས་ང་དྲུག་པའི་ཉིན་དེ་རང་ལ་ཁམས་ཏྲེ་ཧོར་བྲག་འགོ་རྫོང་མདའ་མདོ་ཡུལ་ཚོ་འབྲོང་རུ་གྲོང་ནས་ཡིན་པའི་ཕོ་སར་གསུམ། ས་གནས་དེའི་ཡུལ་ལྷ་གཞི་བདག་ལ་ལྷ་བསང་གཏོང་ཆེད་འཕྲུལ་རྟའི་སྟེང་རླུང་རྟ་མང་པོ་བཏགས་ཏེ་བསྐྱོད་བཞིན་པའི་ལམ་བར་ནས་ཉེན་རྟོག་པས་བཀག་ཡོད་ཀྱང་། ཡུལ་ལྷ་གཞི་བདག་ལ་ལྷ་བསང་གཏོང་བ་ནི་བོད་མིའི་ཆོས་ལུགས་ཀྱི་སྲོལ་རྒྱུན་ཞིག་ཡིན་སྟབས། དོགས་པ་རྣམ་རྟོག་མེད་པར་མུ་མཐུད་དུ་འཕྲུལ་རྟ་གཞོན་ཏེ་ལམ་དུ་བསྐྱོད་པའི་སྐབས། ཉེན་རྟོག་པས་གློ་བུར་དུ་མེ་མདའ་བརྒྱབ་སྟེ་འབྲོང་རུ་བྲག་ཁ་ཚང་གི་བུ་རྟ་མགྲིན་ལ་མེ་མདའ་ཐེབས་པ་དང་། གཞན་གཉིས་བྲོས་ཏེ་ཉེན་རྟོག་པའི་ལག་ནས་ཐར་ཐུབ་པ་བྱུང་ཡོད་འདུག

འབྲེལ་ཡོད་ཀྱིས་མཁོ་སྤྲོད་གནང་བའི་པར་རིས་ལས་མངོན་པ་ལྟར་ན། འབྲོང་རུ་བྲག་ཁ་ཚང་གི་བུ་རྟ་མགྲིན་གྱི་རྐང་པའི་བརླ་ཡི་དམའ་སར་མེ་མདའ་ཐེབས་འདུག་པ་དང་། ད་ལྟའི་ཆར་རྒྱ་ནག་གཞུང་གིས་ས་གནས་ཀྱི་བརྡ་འཕྲིན་བརྒྱུད་ལམ་ཁག་ལ་དམ་དྲག་བྱེད་བཞིན་ཡོད་སྟབས། ཁོང་གི་རྨས་སྐྱོན་ཚབས་ཆེ་ཆུང་དང་སྨན་བཅོས་ཀྱི་མཐུན་རྐྱེན་རག་མིན་སོགས་ཤེས་རྟོགས་མེད་ཅིང་། བོད་མི་གཞན་གཉིས་གང་དུ་ཡོད་མེད་ཀྱི་གནས་སྟངས་ཀྱང་ཁ་གསལ་མི་འདུག

གསར་འགོད་པ་ཏྲེ་ཧོར་ཐུབ་བསྟན།