༸གོང་ས་མཆོག་གི་སྐུ་པར་བཤམས་པར་དངུལ་ཆད་གཅོད་རྒྱུའི་ཉེན་བརྡ།

ཡོ་རུབ་ནང་གི་ཆེ་ཁི་(Czech) སྤྱི་མཐུན་རྒྱལ་ཁབ་ཀྱི་རྒྱལ་ས་ཕ་རལ་རྒིའི་(Prague)དཔལ་འབྱོར་དང་ཤེས་རིག ཆབ་སྲིད་ཀྱི་ལྟེ་གནས་སུ་༸གོང་ས་མཆོག་དང་ཆེ་ཁི་སྲིད་འཛིན་ཧ་ཝལ་རྣམ་གཉིས་ཀྱི་སྐུ་པར་ཆེན་པོ་ཞིག་བཤམ་པར། གཞུང་དང་གྲོང་ཁྱེར་གྱི་གནའ་མཁར་སྲུང་སྐྱོབ་ལས་ཁུངས་ཀྱིས་དེ་ནི་གནའ་ཁང་སྲུང་སྐྱོབ་ཀྱི་ཁྲིམས་ལུགས་དང་འགལ་ཚུལ་བཤད་དེ་བཀག་འགོག་བྱས་ཡོད་འདུག

དེ་ཡང་ཨ་ནུ་བསོད་ནམས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ༸གོང་ས་མཆོག་དང་ཆེ་ཁི་སྲིད་འཛིན་ཧ་ཝལ་རྣམ་གཉིས་ཀྱི་སྐུ་པར་རིང་པོ་ཞིག་ཕྱི་ལོ་༢༠༡༤ཟླ་༤ཚེས་༢༩ཉིན་ལ་བཤམ་མཁན་ནི་རྒྱུན་རིང་བོད་དོན་རྒྱབ་སྐྱོར་བ་ཡུལ་དེའི་སྤྱི་ཟུར་དང་ཁོར་ཡུག་བློན་ཆེན་ཟུར་པ།ད་ལྟའི་ཤིང་ནགས་ཚོགས་པའི་ཚོགས་གཙོ་མཱར་ཅིན་དང་ཁོང་གི་གཟའ་ཟླ་གཉིས་ཀྱིས་༸གོང་ས་མཆོག་དང་སྲིད་འཛིན་རྣམ་གཉིས་ཀྱི་སྐུ་པར་དེ་ཆེ་ཁིའི་རྒྱལ་ས་ཕ་རལ་རྒིའི་དཔལ་འབྱོར་དང་ཤེས་རིགཆབ་སྲིད་ཀྱི་ལྟེ་གནས་སུ་བཤམ་པ་མ་ཟད།པར་ངོས་སུ་”སྐུ་ཞབས་སྲིད་བློན་ལགས།ཁྱེད་ནི་ནོར་འདུགཆེ་ཁིས་བོད་ལ་རོགས་སྐྱོར་བྱེད་”ཅེས་པའི་སྦྱར་ཡིག་བྲིས་པ་ལ།གཞུང་དང་གྲོང་ཁྱེར་གྱི་གནའ་མཁར་སྲུང་སྐྱོབ་ལས་ཁུངས་ཀྱིས་དེ་ནི་གནའ་ཁང་སྲུང་སྐྱོབ་ཀྱི་ཁྲིམས་ལུགས་དང་འགལ་ཚུལ་བཤད་ཅིང་།ཉིན་ཉི་ཤུ་ཙམ་གྱི་ནང་མ་བཀོག་ཚེ།ཡོ་སྒོར་ཁྲི་བརྒྱད་ཀྱི་ཉེས་ཆད་གཅོད་ཚུལ་བསྒྲགས་ཏེ། དེར་བརྟེན་ཕྱི་ལོ་༢༠༡༤ཟླ་༦ཚེས་༢༩ཉིན་སྐུ་པར་སྒྲིག་གཤོམ་བྱ་ཡུལ་གནས་སྤོ་བྱེད་དགོས་བྱུང་འདུག

སྐབས་དེར་བོད་དོན་རྒྱབ་སྐྱོར་བ་དང་བོད་མི་རྣམས་ཀྱིས་ཆར་བ་དྲག་པོ་འབབ་པ་དང་རླངས་འཁོར་གྱི་འཚང་ཁའི་འགོག་རྐྱེན་ཡོད་མིན་ལ་མ་ལྟོས་པར། སྐུ་ཞབས་མཱར་ཅིན་གྱིས་སྣེ་ཁྲིད་བྱས་ནས་ཆུ་ཚོད་གཅིག་དང་ཕྱེད་ལྷག་ལ་སྲང་ལམ་དུ་སྐུ་པར་ཁྱེར་ནས་ཧ་ཝལ་གྱི་སྤུན་མཆེད་ཀྱི་ཁང་བའི་རྒྱབ་ཏུ་སྤོས་ཡོད་འདུག

གནས་དེ་ནི་སྔར་ལས་མི་མང་འདུ་འཛོམས་དང་སྤྲོ་འཆམ་པ་ཡོང་སའི་ལྟེ་གནས་ཤིག་ཡིན་པས།ཡང་བསྐྱར་ཆོག་མཆན་རག་རྒྱུར་དཀའ་ངལ་ཆེན་པོ་འཕྲད་རྒྱུ་ཡིན་པ་དང།དེའི་རྐྱེན་པས་བོད་དོན་རྒྱབ་སྐྱོར་བ་དང་འགྲོ་བ་མིའི་ཐོབ་ཐང་དོན་གཉེར་བ་ཚོས་ཆེ་ཁིའི་གཞུང་གི་ངོས་ནས་རྒྱ་གཞུང་ལ་བསྟུན་ཐབས་བྱས་ཏེ་བོད་ཀྱི་རང་དབང་དང་ཐོབ་ཐང་བློས་བཏང་བྱས་པ་ནི་དྲང་བདེན་མིན་པའི་སྐྱོན་བརྗོད་ཤུགས་ཆེན་པོ་བྱེད་བཞིན་ཡོད་པ་མ་ཟད།བོད་མི་དང་བོད་ཀྱི་གྲོགས་པོ་རྣམས་འདུ་འཛོམས་ཀྱིས་ངོ་རྒོལ་དང་མཛད་སྒོ་མཉམ་དུ་སྤེལ་འཆར་ཡོད་འདུག།