རྒྱལ་ཚོགས་སུ་བོད་ཀྱི་འགྲོ་བ་མིའི་ཐོབ་ཐང་སྐོར་བགྲོ་གླེང་།

སུད་སི་ཡི་གྲོང་ཁྱེར་རྗི་ན་ཝ་རུ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ཚོགས་འདུ་བསྐོངས་ཏེ། བོད་གཙོས་པའི་རྒྱ་ནག་གི་གྲངས་ཉུང་མི་རིགས་ས་ཁུལ་གྱི་འགྲོ་བ་མིའི་ཐོབ་ཐང་རྡོག་རོལ་གནད་དོན་སྐོར་བགྲོ་གླེང་གནང་འདུག

ཕྱི་ཟླ་༣ པའི་ཚེས་༡༧ རེས་གཟའ་ཟླ་བའི་ཉིན་རྗི་ནི་ཝ་རུ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས། བོད་གཙོས་པའི་རྒྱ་ནག་གི་གྲངས་ཉུང་མི་རིགས་ས་ཁུལ་གྱི་འགྲོ་བ་མིའི་ཐོབ་ཐང་གནད་དོན་སྐོར་བགྲོ་གླེང་གནང་ཡོད་པ་དང་། འགྲོ་བ་མིའི་ཐོབ་ཐང་ལས་འགུལ་མི་སྣ་དག་གིས་བོད་ནང་དུ་བྱུང་བཞིན་པའི་རང་སྲེག་དང་ཆབ་སྲིད་བཙོན་པར་སྡུག་སྦྱོང་མནར་གཅོད་ཀྱི་དོན་རྐྱེན་ལ་སེམས་འཚབ་ཡོད་སྐོར་བརྗོད་ཡོད་པ་མ་ཟད། བོད་མི་རྣམས་གང་བྱུང་བཀག་ཉར་དང་། འདྲི་གཅོད། ཁྲིམས་ཐག་གཅོད་པ། སྡུག་སྦྱོང་མནར་གཅོད་གཏོང་བ། གར་སོང་ཆ་མེད་དུ་གྱུར་བཅུག་པ་སོགས་ནི་རྒྱ་ནག་གཞུང་གིས་བོད་མི་ཐོག་བཀོལ་བཞིན་པའི་རྒྱུན་ལྡན་གྱི་བྱེད་ཐབས་ཤིག་ཏུ་གྱུར་ཡོད་སྐོར་བརྗོད་ཡོད་པ་རེད།

རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་སྲིད་ཇུས་དང་ལག་བསྟར་འགན་འཛིན་ཨེ་ལཱེན་གྷེ་ཊ་ (Elena Gaita) ལ་རྒྱ་གར་གྱི་ANI གསར་ཁང་གིས་བཅར་འདྲི་སྐབས། མཉམ་འབྲེལ་རྒྱལ་ཚོགས་ཀྱི་སྙན་ཐོ་ཞིག་གི་ནང་དུ་ཕྱི་ལོ་༢༠༠༩ ནས་བཟུང་བོད་མི་༡༤ བཀག་ཉར་སྐབས་མནར་གཅོད་འོག་འདས་གྲོངས་སུ་གྱུར་པ་དང་། བོད་མི་༡༣༧ གྱིས་རང་ལུས་མེར་སྲེག་བཏང་བའི་ཐོ་འགོད་བྱས་ཡོད་པ་རེད་ཅེས་དང་། ཕྱི་ལོ་༢༠༡༢ ལོ་དང་༢༠༡༣ ལོའི་ལོ་འགོར་ཞི་ཅིན་ཕིང་གིས་དབང་ཆ་བཟུང་ནས་བཟུང་། ང་ཚོས་བོད་ནང་གི་འགྲོ་བ་མིའི་ཐོབ་ཐང་སྡུག་ཏུ་འགྲོ་བཞིན་པ་མཐོང་ཐུབ་ཅིང་། འགྲོ་བ་མིའི་ཐོབ་ཐང་ཇེ་སྡུག་ཏུ་ཕྱིན་པ་དང་ཕྱོགས་མི་འདྲ་བ་མང་པོ་དང་འབྲེལ་བ་ཡོད། དེའི་ཁྲོད་མི་མང་དང་ཆབ་སྲིད་ཀྱི་ཐོབ་ཐང་། དཔལ་འབྱོར། སྤྱི་ཚོགས་དང་རིག་གནས་ཐོབ་ཐང་སོགས་དང་། ཆོས་ལུགས་རང་དབང་ནི་ང་ཚོའི་སེམས་འཚབ་ཆེ་ཤོས་ཀྱི་གནད་དོན་ནང་གི་གཅིག་ཡིན་པ་བཞིན། སྨྲ་བརྗོད་རང་དབང་དང་འདུ་འཛོམས་རང་དབང་གི་གནད་དོན་ཕྱོགས་ལ་ང་ཚོས་རྒྱུན་དུ་དོ་སྣང་དང་གནས་ཚུལ་སྤེལ་བཞིན་ཡོད་ཅེས་བརྗོད་འདུག།

གསར་འགོད་པ་ཏྲེ་ཧོར་ཐུབ་བསྟན།