རྡུལ་ཕྲན་གནད་དོན་ལ་གྲོས་ཆོད་བཞག་ཐུབ་མི་འདུག

ཨ་རི་གཙོས་པའི་སྟོབས་ཆེན་རྒྱལ་ཁབ་ལྔ་དང་ཨི་རག་བར་རྡུལ་ཕྲན་གནད་དོན་གྱི་གྲོས་མོལ་མདུན་བསྐྱོད་བྱེད་བཞིན་ཡོད་ཀྱང་། ད་དུང་སྔར་བཞིན་གྲོས་ཆོད་བཞག་ཐུབ་མེད་པ་རེད།

ཕྱི་ཟླ་༣ པའི་ཚེས་༣༠ རེས་གཟའ་ཟླ་བའི་ཉིན། སི་སུད་ཀྱི་གྲོང་ཁྱེར་ལའོ་ལཱན་དུ་ཨ་རི་དང་དབྱིན་ཡུལ། ཨུ་རུ་སུ། འཇར་མན། རྒྱ་ནག ཧྥ་རེན་སི་བཅས་རྒྱལ་ཁབ་དྲུག་གི་ཕྱི་སྲིད་བློན་ཆེན་མཉམ་བཞུགས་ཐོག ཨི་རག་དང་ལྷན་དུ་རྡུལ་ཕྲན་གནད་དོན་སྐོར་གྲོས་མོལ་ཚོགས་འདུ་འཚོགས་བཞིན་པ་དང་། “P5+1” ཅེས་འབོད་པའི་ཨི་རག་རྡུལ་ཕྲན་གནད་དོན་གྲོལ་མོལ་གྱི་ཚོགས་ཞུགས་རྒྱལ་ཁབ་དྲུག་ནི་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོོགས་ཀྱི་རྒྱལ་ཁབ་ལྔ་དང་། འཇར་མན་རྒྱལ་ཁབ་བཅས་དྲུག་ལས་གྲུབ་པ་ཞིག་ཡིན་ཞིང་། ཚོགས་ཞུགས་རྒྱལ་ཁབ་ཁག་གིས་ཨི་རག་གིས་ཉུང་མཐར་ཡང་ལོ་གཅིག་གི་ནང་རྡུལ་ཕྲན་གོ་མཚོན་བཟོ་བྱེད་ཀྱི་རྒྱུ་ཆ་འདང་ངེས་ཐོན་སྐྱེད་མི་བྱེད་པའི་རེ་བ་བྱེད་བཞིན་ཡོད་འདུག

རེས་གཟའ་མིག་དམར་ཉིན་ནི་ཨི་རག་རྡུལ་ཕྲན་གནད་དོན་གྲོས་མོལ་གྱི་ཉིན་མཐའ་མ་ཡིན་པ་དང་། ཨ་རིའི་ཕྱི་སྲིད་བློན་ཆེན་དང་ཧྤ་རེན་སིའི་བློན་ཆེན་གཉིས་སོ་སོས་སྔར་གྱི་ལས་རིམ་གཏན་འབེབས་བསྒྱུར་བཅོས་བཏང་སྟེ། ཚོགས་འདུ་ཉིན་མཐའ་མར་གྲོས་ཆོད་བཞག་ཐུབ་པའི་འབད་བརྩོན་བྱ་རྒྱུ་ཡིན་པ་དང་། ཨ་རིའི་འབྲེལ་ཡོད་དཔོན་རིགས་ཤིག་གིས། ཨི་རག་གཙོས་པའི་ཚོགས་ཞུགས་རྒྱལ་ཁབ་ཁག་ཚང་མས་ག་ལེར་གཉིས་ཕན་གྱི་བྱེད་ཐབས་ལག་བསྟར་བྱ་རྒྱུར་མོས་མཐུན་བྱས་ཡོད་སྟབས། གལ་སྲིད་ཨ་རིག་གིས་ཆ་སྙོམས་ཀྱིས་རྡུལ་ཕྲན་འཛུགས་བསྐྲུན་ལས་གཞི་ཉུང་དུ་བཏང་པ་ཡིན་ན། འབྲེལ་ཡོད་རྒྱལ་ཁབ་ཁག་གིས་ཀྱང་དུས་ཚོད་ལྟར་ཉེས་ཆད་ཉུང་དུ་གཏོང་རྒྱུ་རེད་ཅེས་བརྗོད་འདུག

ཨི་རག་གི་རྡུལ་ཕྲན་གནད་དོན་ལོ་༡༢ ཙམ་རིང་མདུན་བསྐྱོད་བྱ་མ་ཐུབ་པར་ལུས་ཡོད་པ་དང་། ད་ལྟ་གྲོས་མོལ་ཚོགས་ཞུགས་རྒྱལ་ཁབ་ཕྱོགས་སོ་སོ་ནས་སྔར་དང་མི་འདྲ་བར་ཧ་ཅང་བློ་ཐག་ཉེ་པོས་གྲོས་མོལ་བྱེད་བཞིན་ཡོད་ཀྱང་། གྲོས་སྔར་བཞིན་བཞག་ཐུབ་མེད་པ་མ་ཟད། དཀའ་ངལ་དེ་རྡུལ་ཕྲན་གནད་དོན་ཁོ་ནའི་སྟེང་ཡོད་པ་ཞིག་མ་ཡིན་པར། ཆབ་སྲིད་ཀྱི་སྟོབས་ཤུགས་ལའང་འབྲེལ་བ་ངེས་ཅན་ཡོད་པ་ཞིག་ཡིན་པ་དང་། བརྒྱ་ཆ་བརྒྱ་གྲོས་ཆོད་བཞག་ཐུབ་པའི་ཚོད་དཔག་སུས་ཀྱང་བྱེད་མི་ཐུབ་པའི་གནས་སྟངས་འོག་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན།