མང་གཙོའི་ནུས་ཤུགས་སྲ་བརྟན་གྱི་བཞུགས་མོལ་ལྷན་ཚོགས།

སྤྱིར་རྒྱ་གར་ནི་རང་བཙན་ཐོག་ནས་རང་དབང་དང་མང་གཙོ་ལྡན་པའི་རྒྱལ་ཁབ་ཅིག་ཏུ་གྱུར་ཡོད་མོད། འོན་ཀྱང་ད་ལྟའང་རྒྱ་གར་དུ་སྐུ་ཞབས་རྗོའུ་རྗར་ཧྥར་ནན་ཌི་སི་ལྟ་བུའི་སྙིང་སྟོབས་ཆེ་བའི་སྐྱེས་བུ་གང་མང་ཞིག་དགོས་པ་ནི་ཁ་ཚ་དགོས་གཏུགས་ཀྱི་གནད་དོན་ཞིག་རེད་ཅེས་༧གོང་ས་མཆོག་གིས་གསུངས་སོང་།

དེ་ཡང་ཟླ་འདིའི་ཕྱི་ཚེས་༢༢ དང་༢༣ བཅས་ཉིན་གཉིས་རིང་ཨེ་ཤི་ཡའི་ནང་མང་གཙོའི་ནུས་ཤུགས་ཆེ་རུ་གཏོང་བ་ཞེས་པའི་བརྗོད་གཞིའི་ཐོག རྒྱལ་སྤྱིའི་བཞུགས་མོལ་བགྲོ་གླེང་ཞིག་འཚོག་བཞིན་ཡོད་པ་དང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་བཞུགས་མོལ་ཐོག་སྐུ་མགྲོན་གཙོ་བོར་ཆིབས་བསྒྱུར་བསྐྱངས་སོང་།

བཞུགས་མོལ་གྱི་ཚོགས་ཐུན་དང་པོར་སྐུ་ཞབས་རྗའོ་རྗར་ཧྥིར་ནན་ཌི་སི་(George Fernandes) ཡི་རླབས་ཆེན་གྱི་མཛད་རྗེས་དྲན་གསོ་དང་འབྲེལ ༧གོང་ས་མཆོག་གིས་སྐུབས་ཞབས་ཁོང་གི་མཛད་རྗེས་ལ་དུས་ནམ་ཡང་ཡིད་རང་བསྔགས་བརྗོད་གནང་གི་ཡོད་ཅེས་དང་། ཁོང་ནི་༧གོང་ས་མཆོག་གི་སེམས་ཐག་ཉེ་བའི་གྲོགས་པོ་རྙིང་པ་ཞིག་ཀྱང་ཡིན་ཞེས་གསུངས། ༧གོང་ས་མཆོག་གིས་མུ་མཐུད་དུ་གསུངས་དོན། རང་དབང་ལ་དགའ་མཁན་ནི་འགྲོ་བ་མི་ཙམ་མ་ཡིན་པར། མཐའ་ན་སེམས་ཅན་གྱིས་ཀྱང་རང་དབང་(Freedom) ལ་དགའ་བོ་བྱེད་ཀྱི་ཡོད། དཔེར་ན། ཁྱོད་ཀྱིས་ཁྱིམ་དུ་ཁྱི་ཞིག་བརྩེ་བས་གསོ་སྐྱོང་བྱེད་ཀྱི་ཡོད་རུང་། ནང་གི་སྒོ་ཕྱེས་མ་ཐག་ཁྱི་དེ་འཕྲལ་དུ་ཕྱིར་ཐོན་ཏེ། ཕར་རྒྱུག་ཚུར་རྒྱུག ཡར་མཆོངས་མར་མཆོངས་སོགས་བྱས་པ་དེས་རང་དབང་ལ་རང་བཞིན་གྱི་དགའ་ཞིང་དེར་སྤྱོད་པའི་རྣམ་འགྱུར་སྟོན་གྱི་ཡོད་པ་རེད་ཅེས་གསུངས།

༧གོང་ས་མཆོག་གིས་གསུངས་བཤད་ཀྱི་མཇུག་ཏུ་གསུངས་དོན། དེ་རིང་གི་འདི་ལྟ་བུའི་རྒྱལ་སྤྱིའི་མང་གཙོ་འཕེལ་རྒྱས་དང་མང་གཙོའི་ལམ་ལུགས་རྒྱུན་གནས་སྲ་བརྟན་ཡོང་ཆེད་དུ་དམིགས་པའི་བཞུགས་མོལ་བགྲོ་གླེང་གི་ལས་འགུལ་ནང་། གླིང་ཆེན་ཨ་ཧྥི་རི་ཀ་དང་ཨ་རབ་ཁུལ་ནས་མང་གཙོ་དོན་གཉེར་བ་གང་མང་མཉམ་ཞུགས་གནང་ཐུབ་པ་བྱུ་རྒྱུ་གལ་འགངས་ཤིན་ཏུ་ཆེ་ཚུལ་སོགས་ཀྱི་བཀའ་སློབ་ལམ་སྟོན་བཅས་གནང་བྱུང་།

༧གོང་ས་མཆོག་གིས་གསུངས་བཤད་གནང་གྲུབ་རྗེས། བགྲོ་གླེང་ནང་འཛུལ་བཞུགས་གནང་མཁན་ཚོགས་མི་ཁག་ཅིག་གི་དྲི་བ་ཁ་ཤས་ལ་བཀའ་ལན་དུ། ངོས་རང་བོད་ནང་ཡོད་དུས་སྔར་གྱི་ལུགས་རྙིང་དེ་མ་འགྲིག་པ་མཐོང་སྟེ་དེ་དག་བཅོས་བསྒྱུར་བྱེད་འདོད་ཀྱིས་བསམ་བློ་ཡོད་ཀྱང་། དུས་ལོག་བྱུང་ནས་རྒྱ་གར་དུ་འབྱོར་རྗེས་རིམ་པས་༧རྒྱལ་བ་གོང་ས་ལྔ་པ་ཆེན་པོ་མཆོག་ནས་བཟུང་༧རྒྱལ་བ་སྐུ་ཕྲེང་རིམ་བྱོན་གྱིས་ཆོས་སྲིད་གཉིས་ཀྱི་ཐུགས་འགན་བཞེས་པའི་ལམ་ལུགས་དེ་འགྱུར་བ་གཏོང་འགོ་བཙུགས་པ་རེད། དེ་དང་འབྲེལ་ནས་ཁོང་གིས་མུ་མཐུད་དུ་གསུངས་དོན། ཕྱི་ལོ་༢༠༠༡ ནས་ངོས་རང་ཕྱེད་རྒན་ཡོལ་ལྟ་བུར་ཆགས་པ་དང་། རྗེས་སུ་ཕྱི་ལོ་༢༠༡༡ ནས་བཟུང་འདས་པའི་ལོ་ངོ་བཞི་བརྒྱ་ཙམ་གྱི་རིང་དུ་དར་བའི་ཆོས་སྲིད་གཉིས་ཀྱི་མཚད་འགན་གཅིག་ལྕོགས་སུ་བཞེས་སྲོལ་ལམ་ལུགས་དེ་དགའ་ཞིང་དྭང་དུ་བླངས་ནས་མཇུག་སྒྲིལ་དང་། སྐུ་དབང་དེ་མང་གཙོ་ནས་ཐད་ཀར་འོས་འདེམས་བྱས་པའི་སྲིད་སྐྱོང་ལ་རྩིས་སྤྲོད་གནང་བ་རེད་བཅས་གསུངས་སོང་།

ཐེངས་འདིའི་བཞུགས་མོལ་ལྷན་ཚོགས་ཐོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་དཔལ་ལྡན་མཁས་དབང་བློ་བཟང་སེང་གེ་མཆོག་གིས་གཙོས་ཐེ་ཝན་གྱི་སྐུ་ཚབ་དོན་གཅོད་དང་། དེ་བཞིན་རྒྱལ་ས་ལྡི་ལི་མངའ་སྡེའི་བློན་ཆེན་གཞོན་པ་མཱ་ནི་ཤི་སི་སོ་ཌི་ཡ་(Manish Sisodia) མཆོག་དང་། འཛམ་གླིང་ནོ་ཝེལ་ཞི་བདེའི་གཟེངས་རྟགས་བཞེས་མཁན་སྐུ་ཞབས་ཁཱེ་ལཱ་ཤི་ས་ཐི་ཡཱར་རྡི་(Kailash Satyarthi) མཆོག་བཅས་བོད་མིའི་ཚོགས་སྡེ་ཁག་ཅིག་གི་འཐུས་མི་དང་། དེ་བཞིན་རྒྱ་གར་དང་གཞན་ཕྱི་རྒྱལ་ཡུལ་གྲུ་ཁག་མང་པོ་ཞིག་ནས་གཞུང་འབྲེལ་མིན་པའི་ཚོགས་པ་འདྲ་མིན་གྱི་སྐུ་ཚབ་འཐུས་མི་༢༧༠ ཙམ་ནས་མཉམ་ཞུགས་གནང་ཡོད། ཉིན་གཉིས་རིང་གི་མང་གཙོ་འཕེལ་རྒྱས་དང་སྲ་བརྟན་དགོས་ཕྱོགས་ཐད་ཀྱི་བཞུགས་མོལ་ལྷན་ཚོགས་དེ་གཙོ་བོ་ཨ་རིའི་རྒྱལ་ཡོངས་མང་གཙོར་རོགས་དངུལ་ཚོགས་པ་དང་(NED) སུ་ཌན་གྱི་སྲིད་གཞུང་གཉིས་ནས་རྒྱབ་སྐྱོར་གནང་ཡོད་པ་དང་། དེ་བཞིན་ཆིག་སྒྲིལ་ལྟེ་གནས་ཁང་། རྒྱལ་སྤྱིའི་སྒེར་བདག་ཁེ་ལས་ཚོགས་པ། རྒྱལ་ཡོངས་སྤྱི་མཐུན་ལྟེ་གནས་ཁང་། རྒྱལ་ཡོངས་མང་གཙོ་ལྟེ་གནས་ཁང་བཅས་ཀྱིས་གོ་སྒྲིག་དང་རྒྱབ་སྐྱོར་གནང་ཡོད་འདུག།

གསར་འགོད་པ་ཕྱིང་དཀར་ཚེ་རིང་དོན་འགྲུབ།