ཏཱ་ལའི་བླ་མའི་དབུ་མའི་ལམ་ལ་དུས་ནམ་ཡང་ཁས་ལེན་མེད་ཟེར།

རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་ཀྱི་སྐད་འཕྲིན་དྲ་ཚིགས་སྟེང་སྐལ་བཟང་ཞེས་པའི་མིང་ཐོག་ནས་རྩོམ་ཡིག་ཅིག་སྤེལ་ཡོད་པའི་ནང་། ཕྱི་ཚེས་༢༥ ཉིན་པེ་ཅིང་དུ་མཇུག་སྒྲིལ་བའི་དབུས་གཞུང་གི་“བོད་ལྗོངས་ལས་དོན་བཞུགས་མོལ་ཚོགས་འདུ་ཐེངས་དྲུག་པའི་”སྐོར་གཞུང་འབྲེལ་གྱི་འགྲེལ་བརྗོད་བྱས་ཏེ། “ཏཱ་ལའི་བླ་མ་སྐྱེ་ཕྲེང་བཅུ་བཞི་པའི་རུ་ཚོགས་ལ་ཇི་ལྟར་ལྟ་བ་”ཞེས་པའི་འགོ་བརྗོད་འོག་རྩོམ་ཡིག་ནང་། དབུས་གཞུང་གིས་ཏཱ་ལའི་བླ་མའི་དབུ་མའི་ལམ་ལ་སྔོན་མར་ཡང་ཁས་ལེན་བྱས་མེད་པ་ལ། ད་ལྟ་ཡང་ཁས་ལེན་བྱེད་བཞིན་མེད། མ་འོངས་པར་ཡང་དུས་གཏན་དུ་ཁས་ལེན་བྱ་མི་སྲིད་ཅེས་བརྗོད་འདུག

ཕྱི་ཟླ་༨ པའི་ཚེས་༢༥ རེས་གཟའ་མིག་དམར་ཉིན་རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་ཀྱིས་སྤེལ་བའི་གཞུང་འབྲེལ་རྩོམ་ཡིག་དེའི་ནང་འཁོད་དོན། “བཅོས་སྒྱུར་སྒོ་འབྱེད་བྱས་པ་ནས་བཟུང་། དབུས་གཞུང་གིས་སྔ་རྗེས་སུ་ཕྱི་ལོ་༡༩༨༠ ལོ་དང་། ༡༩༨༤ ལོ། ༡༩༩༡ ལོ། ༢༠༠༡ ལོ། ༢༠༡༠ ལོ་བཅས་ལ་བོད་ལྗོངས་ལས་དོན་བཞུགས་མོལ་ཚོགས་འདུ་ཐེངས་ལྔ་འཚོགས་ཟིན་ཞིང་། ཚོགས་འདུ་རེ་རེའི་ཐོག་བྱེད་ཐབས་གལ་ཆེན་འདོན་སྤེལ་བྱས་ཏེ། བོད་ལྗོངས་ཀྱི་དཔལ་འབྱོར་འཕེལ་རྒྱས་དང་སྤྱི་ཚོགས་ལ་བརྟན་ལྷིང་སྐུལ་འདེད་བྱས་ཡོད། ས་ཁུལ་གཅིག་གི་ལས་དོན་སྐོར་དེ་ལྟར་བར་མ་ཆད་པར་ཚོགས་འདུ་ཐེངས་མང་བསྡུ་སྐོང་བྱས་པ་ནི། དབུས་གཞུང་གི་སྤྱི་ཡོངས་ཀྱི་ལས་དོན་ཁྲོད་མང་པོ་མཐོང་རྒྱུ་མེད།”

རྩོམ་ཡིག་ནང་། “བོད་ལྗོངས་སུ་མི་རིགས་སོ་སོའི་ཉིན་རེར་གོང་འཕེལ་འགྲོ་བཞིན་པའི་ཕྱི་དངོས་པོ་དང་རིག་གཞུང་མཉམ་དུ་སྤྱི་ཚོགས་རྗེས་ལུས་ཀྱི་ཐོན་སྐྱེད་བར་གྱི་འགལ་ཟླ་གཙོ་བོ་འགྱུར་ལྡོག་ཕྱིན་མེད་ལ། རིགས་སོ་སོའི་མི་མང་དང་ཏཱ་ལའི་རུ་ཚོགས་ཀྱིས་མཚོན་པའི་ཁ་བྲལ་སྟོབས་ཤུགས་བར་གྱི་ཐུན་མོང་མ་ཡིན་པའི་འགལ་ཟླ་ཡང་འགྱུར་མེད། འགལ་ཟླ་དེ་གཉིས་ཐག་གཅོད་ཡག་པོ་བྱས་ན། ཏང་དང་རྒྱལ་ཁབ་ཀྱི་ལས་དོན་སྤྱི་ཡོངས་ལ་ཐེབས་པའི་ཤུགས་རྐྱེན་ཡང་མི་འདྲ། གལ་ཏེ་ཁ་བྲལ་ལ་ངོ་རྒོལ་གྱི་འཐབ་རྩོད་དང་མི་རིགས་མཐུན་སྒྲིལ་ཐོག་བོད་ལྗོངས་ལ་གནད་དོན་ལྷག་ཚེ། རྒྱ་ནག་གི་བཅོས་སྒྱུར་འཕེལ་རྒྱས་དང་བརྟན་ལྷིང་སྤྱི་ཡོངས་ལའང་ཤུགས་རྐྱེན་ཐེབས་ཏེ། ཁྱོན་ཡོངས་ཀྱི་འཐབ་ཇུས་གོ་སྐབས་ལ་འགོག་རྐྱེན་བཟོ་སྲིད་པས། གནད་དོན་དེ་གསལ་པོ་ཤེས་པའི་ཐོག་ནས། ཁ་ཡོད་ལག་ཡོད་ངང་ད་གཟོད་བོད་ལྗོངས་ལས་དོན་གྱི་གལ་གནད་དམ་འཛིན་བྱེད་ཐུབ།”

དེ་བཞིན་རྩོམ་ཡིག་ནང་༧གོང་ས་ཏཱ་ལའི་བླ་མ་མཆོག་དང་དབུས་བོད་མིའི་སྒྲིག་འཛུགས་སྐོར་ཆེད་དུ་དམིགས་ཏེ་བརྗོད་དོན། “མེས་རྒྱལ་ཁ་བྲལ་གྱི་ངོ་བོ་ལ་འགྱུར་ལྡོག་སོང་མེད། ཡིན་ནའང་ཐབས་ཇུས་རྒྱུན་ཆད་མེད་པར་སྒྱུར་བཅོས་གཏོང་བཞིན་ཡོད། ཏཱ་ལའི་སྐྱེ་ཕྲེང་བཅུ་བཞི་པའི་“དབུ་མའི་ལམ་”གྱིས་བོད་དེ་རྒྱ་ནག་གི་མངའ་ཁོངས་ཀྱི་ཆ་ཤས་ཤིག་ཡིན་པ་ཁས་ལེན་མི་བྱས་པ་དང་། ཕྱི་ལོ་༡༩༥༩ ལོའི་སྔོན་བོད་དེ་རང་བཙན་གྱི་རྒྱལ་ཁབ་ཅིག་ཡིན་ཚུལ་བརྗོད། རྒྱ་ནག་གི་རྩ་ཁྲིམས་ནང་གཏན་འབེབས་བྱས་པའི་རྩ་འཛིན་ལ་རྒྱབ་འགལ་གྱིས། བོད་དུ་ལག་བསྟར་བྱེད་བཞིན་པའི་སྤྱི་ཚོགས་རིང་ལུགས་ལམ་ལུགས་དང་མི་རིགས་ས་ཁུལ་རང་སྐྱོང་ལམ་ལུགས་ལ་ཁས་ལེན་མ་བྱས་པར། ཡང་བསྐྱར་གཞན་ཞིག་དགོས་ཟེར། རྒྱ་ནག་གི་སྲིད་འཛིན་ས་ཁུལ་བཅད་བགོས་ལ་ཡང་ངོས་ལེན་མེད་པར། བོད་ལྗོངས་དང་སི་ཁྲོན། ཡུན་ནན། ཀྭན་སུའུ། མཚོ་སྔོན་སོགས་བོད་རིགས་འདུས་སྡོད་ས་ཁུལ་ཡོངས་རྫོགས་གཅིག་ཏུ་སྒྲིལ་ཏེ། གཅིག་གྱུར་གྱི་སྲིད་འཛིན་ས་ཁུལ་ཞིག་འཛུགས་དགོས་པ་དང་། རྒྱལ་ཡོངས་ཀྱི་སྐམ་སའི་ས་ངོས་ཀྱི་བཞི་ཆ་གཅིག་ཙམ་ཟིན་ཡོད། “དབུ་མའི་ལམ་”ཞེས་འབོད་པ་དེ་དོན་དངོས་ཐོག་ཁ་བྲལ་རིང་ལུགས་ཀྱི་ཆབ་སྲིད་རེ་འདུན་ཞིག་ཡིན་ཞིང་། དབུ་གཞུང་གིས་སྔོན་ལ་ཡང་ཁས་ལེན་བྱས་མེད་ལ། ད་ལྟ་ཡང་ཁས་ལེན་བྱེད་བཞིན་མེད། མ་འོངས་པར་ཡང་དུས་གཏན་དུ་ཁ་ལེན་བྱ་མི་སྲིད།”

མཇུག་མཐར་བོད་རྒྱུད་ནང་བསྟན་གྱི་ལས་དོན་རྩ་འཛིན་སྐོར་རགས་ཙམ་བཀོད་ཡོད་པ་དང་། རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་ཀྱི་རྩོམ་ཡིག་དེའི་ནང་“ཆབ་སྲིད་ཐོག་མཐུན་སྒྲིལ། དད་པའི་ཐོག་བརྩི་བཀུར་”ཞེས་སྡོམ་བརྒྱབ་པ་འབྲེལ་རྩོམ་ཡིག་ནང་མུ་མཐུད་དུ་འཁོད་དོན། ཏཱ་ལའི་རུ་ཚོགས་དང་འཐབ་རྩོད་ལ་བརྟེན་ནས་མི་དམངས་མང་ཚོགས་ཀྱི་ཆོས་ལུགས་དད་མོས་རང་དབང་ཐོབ་ཐང་ལ་ཅི་དགར་ཐེ་བྱུས་དང་ཚོད་འཛིན་བྱེད་མི་རུང་། དེ་དང་དུས་མཚུངས་ངེས་པར་དུ་དགོན་སྡེ་དོ་དམ་ལ་ཤུགས་སྣོན་རྒྱག་དགོས། རང་དབང་སྒོས་རང་འགན་རང་ཁུར་གྱི་རྩ་འཛིན་རྒྱུན་འཁྱོངས་བྱས་ཏེ། རྒྱ་ཁྱབ་ངང་ཆོས་ལུགས་པའི་ནང་རྒྱལ་གཅེས་ཆོས་གཅེས་ཀྱི་སྐུ་ཚབ་མི་སྣ་གསོ་སྐྱོང་བྱེད་དགོས། སློབ་སྟོན་དང་རྒྱབ་སྐྱོར་བརྒྱུད་ཆོས་ལུགས་མི་སྣས་སྤྱི་ཚོགས་རིང་ལུགས་ཀྱི་རྩ་བའི་རིན་ཐང་ལྟ་ཚུལ་གྱི་ཐོག་ནས་འདུལ་ཁྲིམས་དང་བསྟན་བཅོས། འཆད་འགྲེལ་སོགས་ལ་ལམ་སྟོན་བྱས་ཏེ། བོད་རྒྱུད་ནང་བསྟན་དང་སྤྱི་ཚོགས་རིང་ལུགས་འཕྲོད་མཐུན་ལ་སྐུལ་འདེད་གཏོང་དགོས།”

ཉེ་ཆར་ཕྱི་ཟླ་༨ པའི་ཚེས་༡༢ ཉིན་གྱི་སྔ་དྲོར། བཞུགས་སྒར་ངྷ་ས་དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། སྲིད་སྐྱོང་བློ་བཟང་སེང་གེ་མཆོག་གིས་“དབུ་མའི་ལམ་གྱི་སྲིད་བྱུས་དང་བྱུང་རིམ་”ཞེས་པའི་དྲིལ་བསྒྲགས་ཀྱི་བརྙན་ཐུང་ཟེར་སྡེ་ཞིག་དབུ་འབྱེད་གནང་ཡོད་པ་དང་། ཟེར་སྡེ་དེའི་ནང་བཙན་བྱོལ་བོད་མིའི་དབུ་ཁྲིད་རྣམ་པས་དབུ་མའི་ལམ་གྱི་དགེ་མཚན་སྐོར་གསུངས་ཡོད་པ་མ་ཟད། ༧ས་སྐྱ་གོང་མ་རིན་པོ་ཆེ་དང་། ༧རྒྱལ་དབང་ཀརྨ་པ། ༧སྟག་ལུང་རྩེ་སྤྲུལ་རིན་པོ་ཆེ། ༧ཤར་པ་ཆོས་རྗེ། ༧སྨན་རི་ཁྲི་འཛིན། དེ་བཞིན་བོད་ཀྱི་ཆབ་སྲིད་བཙོན་ཟུར་ཁག་ཅིག་དང་། བོད་དོན་རྒྱབ་སྐྱོར་བ་དང་རྒྱལ་ཁབ་ཁག་ཅིག་གི་དཔོན་རིགས་བཅས་ལ་བཅར་འདྲིའི་ལམ་ནས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་། དེའི་དགེ་མཚན་བཅས་ཀྱི་སྐོར་འགྲེལ་བརྗོད་དང་བཀའ་ལན་གནང་ཡོད་པ་རེད།།

སྒྱུར་མཁན་གྱི་མཆན། རྒྱ་ནག་གཞུང་འབྲེལ་རྩོམ་ཡིག་དེའི་ནང་སྔར་སྲོལ་ལྟར་རྒྱ་ཡིག་གི་“ཤིན་ཙང་”ཞེས་པ་“བོད་ལྗོངས་”ཀྱི་དོན་ཡིན་པའི་མིང་ཚིག་སྤྱོད་ཡོད་ཀྱང་། གསར་འགོད་པས་སྐབས་བསྟུན་གྱིས་“བོད་ལྗོངས་”དང་“བོད་”གཉིས་ཀ་རེས་མོས་སུ་བེད་སྤྱོད་བྱས་ཡོད།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།