བྲག་འགོ་ཡི་བཙུན་མ་ཞིག་གིས་རང་ལུས་མེར་སྲེག

བྲག་འགོ་རྫོང་ཏྲེ་ཧོར་བྲག་སྲས་གྲོང་ནས་ཡིན་པའི་བཙུན་པ་ཡེ་ཤེས་མཁའ་འགྲོ་ཡིས་རྒྱ་གཞུང་ལ་ངོ་རྒོལ་གྱི་རང་ལུས་མེར་སྲེག་བཏང་ཡོད་པ་དང་། སྐབས་དེར་ཁོང་མོས་༧གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་ཞེས་སོགས་སྐད་འབོད་གནང་ཡོད་པ་རེད།

ཨོ་སི་ཊོ་ལི་ཡར་གནས་སྡོད་ཏྲེ་ཧོར་ཀརྨ་ལགས་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ཟླ་༤ པའི་ཚེས་༨ རེས་གཟའ་ལྷག་པའི་ཉིན་གྱི་ཞོགས་པའི་ཆུ་ཚོད་དགུ་ཡན་མན་ཙམ་ལ། དཀར་མཛེས་རྫོང་དགོན་པའི་ཉེ་འདབས་ཀྱི་ཁྲོམ་གཞུང་སྐུ་འབུམ་ཞབས་ཞེས་པའི་རྫོང་ཉེན་རྟོག་ལས་ཁུངས་དང་ཉེ་ས་ཞིག་ཏུ། ༧གོང་ས་མཆོག་བོད་དུ་གདན་འདྲེན་ཞུ་དགོས། བོད་ལ་རང་དབང་དགོས། ༧ གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག་ཅེས་སྐད་འབོད་བྱེད་བཞིན་སྐུ་ལུས་མེར་སྲེག་གཏོང་ཡོད་འདུག སྐབས་དེར་ཉེན་རྟོག་པས་མེ་གསོད་ཡོ་བྱད་ཀྱིས་མེ་བསད་དེ་ཁྲིད་ཕྱིན་པའི་རྗེས། ཤི་གསོན་གྱི་གནས་ཚུལ་ཁ་གསལ་ཤེས་རྟོགས་ཐུབ་མེད་ཀྱང་། སྐབས་དེར་ས་གནས་ནས་དངོས་སུ་མཐོང་མཁན་ཕལ་ཆེར་བས་བཙུན་མ་ཁོང་སྐུ་གྲོངས་ཡོད་པའི་ཚོད་དཔག་བྱེད་བཞིན་ཡོད་པ་མ་ཟད། ཕྱི་ཚེས ༩ ཉིན། ཉེན་རྟོག་པས་ནང་མི་སྐད་གཏོང་སྟེ་བཙུན་མ་ཡེ་ཤེས་མཁའ་འགྲོ་སྐུ་གྲོངས་ཟིན་སྐོར་བརྗོད་ཡོད་པ་རེད།

ཁམས་བྲག་འགོ་རྫོང་ཏྲེ་ཧོར་བྲག་སྲས་གྲོང་བྲག་སྲས་ཚང་གི་བཙུན་མ་ཡེ་ཤེས་མཁའ་འགྲོ་ནི་ངང་སྒང་ཇོ་མོ་དགོན་གྱི་བཙུན་མ་ཡིན་ཞིང་། འདི་ལོར་རང་ལོ ༤༧ ཡིན་པ་དང་། ཕའི་མིང་ལ་ཤེས་རབ་དང་ཨ་མའི་མིང་ལ་བསོད་ནམས་སྒྲོན་མ་ཟེར། བཙུན་མ་ཡེ་ཤེས་མཁའ་འགྲོ་ལགས་ལོ་མང་རིང་ཇོ་མོ་དགོན་དུ་བསྙེན་མཚམས་ལ་བཞུགས་མྱོང་ཡོད་པ་དང་། ནམ་རྒྱུན་ཉམ་ཆུང་ཚུལ་མཐུན་དང་རྒྱུན་དུ་བོད་དོན་ཐོག་དོ་སྣང་ཆེན་པོ་ཡོད་མཁན་ཞིག་ཡིན་འདུག དེ་བཞིན་གནས་ཚུལ་མཁོ་སྤྲོད་བས་འགྲེལ་བརྗོད་གནང་བ་ལྟར་ན། ཕྱི་ལོ་༢༠༠༨ ལོར་བོད་ས་ཡོངས་སུ་ཞི་རྒོལ་ལས་འགུལ་བྱུང་སྐབས་ངང་སྒང་ཇོ་མོ་དགོན་གྱི་བཙུན་མ་ཚོས་སྣེ་ཁྲིད་དེ། བྲག་འགོ་ཏྲེ་ཧོར་རུ་རྒྱ་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་ཤུགས་ཆེན་སྤེལ་ཡོད་ཅིང་། ངོ་རྒོལ་ལས་འགུལ་དེའི་ཁྲོད་དུའང་བཙུན་མ་ཡེ་ཤེས་མཁའ་འགྲོ་ཡོད་པས། ཐེངས་འདིའི་རང་ལུས་མེར་སྲེག་གི་ངོ་རྒོལ་དེ་ནི་ཁོང་མོའི་རྒྱ་གཞུང་ལ་ངོ་རྒོལ་ཐེངས་གཉིས་པ་ཆགས་ཡོད་འདུག  དེ་བཞིན་མེར་སྲེག་གི་དོན་རྐྱེན་དེ་བྱུང་རྗེས་དཀར་མཛེས་ཁྲོམ་གཞུང་དུ་ཉེན་རྟོག་པས་འཇིགས་སྐུལ་དང་དམ་དྲག་སོགས་དམིགས་བསལ་གང་ཡང་མེད་པར་རྒྱུན་ལྡན་བཞིན་ཡིན་པ་རེད།།

གསར་འགོད་པ་ཏྲེ་ཧོར་ཐུབ་བསྟན།