དགུ་བཅུ་གསུམ་ཚོགས་པའི་རྒྱུན་ལས་ཁ་སྐོང་འོས་འདེམས།

བོད་ཀྱི་དགུ་བཅུ་གསུམ་ལས་འགུལ་ཚོགས་པའི་རྒྱུན་ལས་མི་༡༡ གིས་དགོངས་པ་ཞུས་ཏེ། ཨོ་སི་ཁྲུ་ལིར་ཡར་འགྲོ་རྒྱུ་ཡིན་པས། དྷ་སར་ཛ་དྲག་ཚོགས་ཆེན་ཞིག་འཚོགས་ཏེ། ཟླ་འདིའི་ཚེས་༢༥ ཉིན་རྒྱུན་ལས་ཁ་སྐོང་འོས་འདེབས་བྱས་ཡོད་པ་རེད།

དེ་ཡང་འདི་ལོར་བོད་ཀྱི་ཆབ་སྲིད་བཙོན་པ་དང་འབྲེལ་ཡོད། འབྲེལ་ཆགས་ཁག་གི་ནང་ནས་མི་ཉིས་བརྒྱ་ལྷག་ཨོ་སི་ཁྲུ་ལི་ཡར་སྐྱབས་བཅོལ་དུ་ལེན་རྒྱུའི་རྒྱན་ཤོག་འཕངས་སྟེ། དེའི་ནང་དགུ་བཅུ་གསུམ་གྱི་རྒྱུན་ལས་མི་༡༥ ནང་ནས་༡༡ ལ་རྒྱན་ཤོག་ཐོབ་པར་བརྟེན། ཕྱི་ཟླ་༥ ཚེས་༢༤ ནས་ཉིན་གཉིས་རིང་དྷ་སར་དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ་ཛ་དྲག་ཚོགས་ཆེན་ཞིག་འཚོགས་ཏེ། རྒྱུན་ལས་གསར་པ་༡༡ འོས་འདེམས་བྱས་ཡོད་པ་རེད།

དགུ་བཅུ་གསུམ་ལས་འགུལ་ཚོགས་པར་ཕྱི་རྒྱལ་ཁག་དང་རྒྱ་བལ་འབྲུག་གསུམ་བསྡོམས་པའི་ཚོགས་མི་༦༠༠ ལྷག་ཡོད་པ་དང་། དེའི་ནང་ནས་ཚོགས་མི་བརྒྱ་ལྷག་ཚོགས་ཞུགས་བྱས་ཡོད་པ་རེད།

རྒྱུན་ལས་གསར་པ། ༡ རྒྱལ་ཐང་སྤྲུལ་སྐུ། ༢ རྡོ་རྗེ་ཚེ་རིང་། ༣ ཟླ་བ་བཀྲ་ཤིས། ༤ ཨ་ཚོགས་ཀླུ་མཁར་བྱམས། ༥ པ་སངས་དབང་རྒྱལ། ༦ སངས་རྒྱས། ༧ བློ་བཟང་བསྟན་འཛིན། ༨ བློ་བཟང་ཉི་མ། ༩ འཆི་མེད་རྡོ་རྗེ། ༡༠ བཀྲ་ཤིས་རྒྱལ་པོ། ༡༡ ངག་དབང་ཁྲི་རལ་བཅས་གསར་དུ་འདེམས་ཐོན་བྱུང་ཡོད་པ་དང་། ཚོགས་གཙོ་པ་སངས་དང་། ཚོགས་གཞོན་ལྷ་རྒྱལ་རི་རྣམ་རྒྱལ་སྒྲོལ་གཉིས་རང་འཇགས་དང་། དྲུང་ཆེ་རྒྱུན་ལས་ནང་ཁུལ་ནས་འོས་འདེམས་བྱེད་ཀྱི་ཡིན་པ་རེད།

དམིགས་བསལ་ཛ་དྲག་ཚོགས་འདུ་འཚོགས་དགོས་པའི་དམིགས་ཡུལ་སྐོར་ཚོགས་པ་དེའི་ཚོགས་གཙོ་པ་སངས་ཀྱིས་གསར་འགོད་པར་འགྲེལ་བརྗོད་གནང་བ་ལྟར་ན། རྒྱུན་ལས་ཁ་སྐོང་འོས་འདེབས་ཆེད་དང་། བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ནས་མཐུན་རྐྱེན་རྒྱབ་སྐྱོར་འོག།དགུ་བཅུ་གསུམ་གྱི་ཚོགས་མི་མང་པོ་ཞིག་ཨོ་སི་ཁྲུ་ལི་ཡར་གཏོང་གི་ཡོད་པས། མ་འོངས་པར་ཚོགས་མི་ཡོང་ཁུངས་དང་མ་འོངས་ལས་དོན་བྱེད་ཕྱོགས་སྐོར་ལ་གྲོས་བསྡུར་དང་། དེ་བཞིན་རྒྱུན་ལས་སྐབས་བདུན་པའི་ཚོགས་ཆེན་ཐོག་གྲོས་གཞི་གྲོས་འཆར་ག་རེ་དགོས་མིན། དགུ་བཅུ་གསུམ་ལས་འགུལ་ཚོགས་པ་བཙུགས་ནས་ལོ་༢༥ འཁོར་གྱི་ཡོད་པས། དེའི་སྐབས་ག་རེ་བྱེད་དགོས་མིན་སྐོར་ལ་གྲོས་བསྡུར་བྱས་ཡོད་པ་རེད། །