རྒྱ་ནག་གི་གྲོང་གསེབ་ཅིག་ཏུ་མེ་མདའ་བརྒྱབ་སྟེ་མི་ལྔ་རྐྱེན་ལམ་དུ་བཏང་།

རྒྱ་ནག་ཧི་པེ་ཞིང་ཆེན་ཚཱང་ཀྲུའུ་ཁུལ་སུའུ་ནི་རྫོང་དུ་མེ་མདའ་བརྒྱབ་པའི་དོན་རྐྱེན་ཞིག་བྱུང་སྟེ། དོགས་གཞིའི་ཉེན་ཅན་པ་དང་ཉེན་རྟོག་པ་གཉིས་ཚུད་པའི་མི་ལྔ་རྐྱེན་ལམ་དུ་བཏང་ཡོད་པ་དང་། མི་ལྔ་ལ་རྨས་སྐྱོན་ཕོག་ཡོད་པ་རེད།

རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་ཚཱང་ཁྲུའུ་གྲོང་ཁྱེར་གྱི་ཉེན་རྟོག་པ་དང་སུའུ་ནི་རྫོང་སྲིད་གཞུང་གིས་སྤེལ་བའི་གསལ་བསྒྲགས་ལུང་འདྲེན་བྱས་པ་ལྟར་ན། ཟླ་འདིའི་ཕྱི་ཚེས་༩ རེས་གཟའ་མིག་དམར་ཉིན་གྱི་ཞོགས་པར། རྒྱ་ནག་ཧི་པེ་ཞིང་ཆེན་ཚཱང་ཀྲུའུ་ཁུལ་སུའུ་ནི་རྫོང་། ཧྥུ་ཙོ་གྲོང་ཚོ་ཞི་ཧྲི་པའོ་གྲོང་སྡེའི་གྲོང་མི་ཞིག་གིས་ལག་ཏུ་མཆུ་གཉིས་ཅན་གྱི་མེ་མདའ་རིང་པོ་ཞིག་བཟུང་སྟེ། གྲོང་པའི་ནང་གི་མི་རྣམས་ལ་གང་བྱུང་མེ་མདའ་བརྒྱབ་ཡོད་འདུག

གནས་ཚུལ་ནང་འཁོད་པར་གཞིགས་ན། རང་ལོ་༥༥ ཡིན་པའི་དོགས་གཞིའི་ཉེས་ཅན་པའི་མིང་ལ་ལུའུ་ཧྲའ་རེན་ཞེས་འབོད་པ་དང་། ཉེན་རྟོག་པས་ཡུལ་དངོས་སུ་མེ་མདའ་བརྒྱབ་སྟེ་བསད་ཡོད་འདུག་པ་མ་ཟད། ཁོང་ནི་སེམས་པ་ཐང་པོ་མེད་པའི་མི་ཞིག་ཡིན་སྐོར་བརྗོད་འདུག རྐྱེན་ལམ་དུ་བཏང་པའི་ནང་དུ་རང་ལོ་༤༠ ཅན་ཞིག་དང་ལོ་ན་༧༠ ཅན་གྱི་གྲོང་ཚོ་དེའི་གྲོང་མི་གཉིས་དང་། ཉེན་རྟོག་མི་སྣ་གཉིས་ཚུད་ཡོད་པ་རེད།

རྨས་སྐྱོན་ཕོག་པའི་མི་ལྔའི་ནང་གི་མི་གསུམ་གྱི་རྨས་སྐྱོན་ཧ་ཅང་ལྗིད་མོ་ཡིན་པ་དང་། རྨས་སྐྱོན་དེ་ཙམ་ཛ་དྲག་མིན་པའི་མི་གཉིས་ལས་གྲོང་མི་གཅིག་པེ་ཅིང་གི་སྨན་ཁང་དུ་བསྐྱལ་ཡོད་འདུག་ལ། གཞན་ཉེན་རྟོག་པ་གཅིག་ས་གནས་ཀྱི་སྨན་ཁང་དུ་སྨན་བཅོས་བྱེད་བཞིན་ཡོད་འདུག་པ་མ་ཟད། གློ་བུར་བའི་དོན་རྐྱེན་དེར་མུ་མཐུད་དུ་བརྟག་དཔྱད་བྱེད་བཞིན་ཡོད་འདུག

ད་ལྟའི་ཆར་རྒྱ་ནག་འབྲེལ་ཡོད་སྲིད་གཞུང་གིས་སྤེལ་བའི་གསལ་བསྒྲགས་དེའི་ནང་དོགས་གཞིའི་ཉེས་ཅན་པ་ལུའུ་ཧྲའ་རེན་གྱི་མེ་མདའི་ཡོང་ཁུངས་བཤད་མེད་པ་མ་ཟད། ལག་དམར་བ་དང་གནོད་འཚེ་ཕོག་པའི་གྲོང་མིའི་བར་དུ་རྩོད་རྙོག་ཅི་ཡོད་ཀྱི་གནས་ཚུལ་གང་ཡང་བཀོད་མེད་པ་རེད།

སུའུ་ནི་རྫོང་ཧྥུ་ཙོ་གྲོང་ཚོ་ནི་པེ་ཅིང་ནས་རྒྱང་ཐག་སྤྱི་ལེ་༡༩༠ ཙམ་གྱི་མཚམས་སུ་ཆགས་ཡོད་འདུག།

གསར་འགོད་པ་ཏྲེ་ཧོར་ཐུབ་བསྟན།