ཉེས་མེད་འོས་གཞིའི་ཐོབ་ཐང་འཕྲོག་པའི་ཁ་མཆུ་ཐག་གཅོད།

དབུས་འོས་བསྡུ་ལས་ཁང་གིས་འགན་དབང་ལག་བསྟར་ཚུལ་བཞིན་མ་བྱས་པར་དབུས་འོས་བསྡུའི་འགན་འཛིན་འཇམ་དཔལ་ཆོས་བཟང་ལ་ཉེས་ཆད་ཧིན་སྒོར་༢༠༠༠༠ དང་། ཀ་ཐ་མན་གྲུ་ས་གནས་འོས་བསྡུའི་ལས་དོན་སྒྲིག་མཐུན་མ་བྱུང་བར་ས་གནས་འོས་བསྡུའི་འགན་འཛིན་བདུད་འདུལ་རྡོ་རྗེ་ལ་ཉེས་ཆད་ཧིན་སྒོར་༡༠༠༠༠ ཀོང་པོ་དོན་གྲུབ་ཀྱིས་བོད་མིའི་སྒྲིག་འཛུགས་སྣང་མེད་ཀྱིས་བལ་ཡུལ་སྐོར་སྲུང་ལས་ཁུངས་སུ་སྙན་ཞུ་ཕུལ་ཏེ་འོས་བསྡུའི་ལས་དོན་ལ་འགོག་རྐྱེན་བཟོ་རྩིས་བྱས་པར་ཉེས་ཆད་ཧིན་སྒོར་༧༠༠༠ བཅས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་བཅད་ཁྲ་བཏང་འདུག

ཟླ་༧ ཚེས་༢༣ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་ཁ་མཆུ་ཞུ་སྦྱོར་དེབ་འགོད་ཨང་༡༨ བལ་ཡུལ་མཆོད་འཇོར་ས་གནས་མགོ་འཛིན་འོས་བསྡུའི་སྐོར་གྱི་ཁ་མཆུའི་བཅད་ཁྲ་ཞིག་ཕྱིར་བསྒྲགས་བྱས་པ་ལྟར་ན། བལ་ཡུལ་མཆོད་འཇོར་ཁུལ་གྱི་སྐབས་བཞི་པའི་ས་གནས་མགོ་འཛིན་འོས་བསྡུའི་སྐབས། ཀ་ཐ་མན་གྲུ་ས་གནས་འོས་བསྡུ་ལས་ཁང་གིས། ཀོང་པོ་དོན་གྲུབ་ཀྱིས་དེ་སྔོན་ཟློས་གར་ཚོགས་པའི་ཅ་དངོས་ཚོང་བཅོལ་བཞག་པའི་རྩིས་འཕྲོད་མེད་སྟབས། ས་གནས་མགོ་འཛིན་གྱི་འོས་ཁོངས་སུ་ཞུགས་རྒྱུའི་ཆ་རྐྱེན་ཚང་མེད་ལུགས་བརྗོད་ནས་དངོས་གཞིའི་འོས་མིའི་ཁོངས་ནས་ཕྱིར་འཐེན་བྱས་ཡོད་འདུག

ཀོང་པོ་དོན་གྲུབ་ཀྱིས་ས་གནས་འོས་བསྡུ་ལས་ཁང་ལ་སྙན་ཞུ་ཕུལ་ཏེ་དོན་དག་དེར་བསྐྱབ་ཞིབ་དགོས་པའི་རེ་སྐུལ་ཞུས་ཡོད་པ་མ་ཟད། དྷ་རམ་ས་ལའི་དབུས་འོས་བསྡུ་ལས་ཁང་ལའང་དེ་བཞིན་རེ་སྐུལ་ཞུས་ཡོད་ཀྱང་། དབུས་འོས་བསྡུ་ལས་ཁང་གིས་ལན་འབྱོར་བའི་ནང་། “འོས་བསྡུའི་ལས་དོན་བྱེད་ཕྱོགས་ཐོག་ཉིད་ཀྱི་ཞུ་སྦྱོར་དང་འདྲ་མཚུངས་ས་གནས་ཁ་ཤས་ལ་ཡོང་གི་ཡོད་སྟབས། ས་གནས་འོས་བསྡུའི་འགན་འཛིན་དང་འབྲེལ་ཡོད་ཚོགས་མི་རྣམས་ནས་སྐབས་དེར་ཞིབ་འཇུག་ཐག་གཅོད་ཇི་ལྟར་བྱུང་མིན་ས་གནས་དེའི་འགན་ཁུར་གནང་མཁན་རྣམས་ནས་ལེགས་པ་ཞིབ་ཕྲ་ཤེས་རྟོགས་ཡོད་པར་སོང་། ས་གནས་ཀྱིས་ཇི་ལྟར་ཐག་གཅོད་བྱེད་པ་ཞིག་ལ་དབུས་འོས་བསྡུ་ལས་ཁང་ནས་དམིགས་བསལ་ཐེ་བྱུས་བྱེད་སྲོལ་མེད”ཅེས་ལན་སྤྲད་ཡོད་འདུག

གྱོད་ཡ་ཞུ་སྦྱོར་བ་ཀོང་པོ་བུ་དོན་གྲུབ་ཀྱིས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་འོས་བསྡུ་ལས་ཁང་ནས་ཉེས་མེད་འོས་གཞིའི་ཐོབ་ཐང་འཕྲོག་སོང་ཞེས་ཞུ་གཏུགས་བྱས་ཡོད་པ་མ་ཟད། ཁོང་ལ་འོས་མིའི་ཆ་རྐྱེན་ཚང་ཡོད་ལུགས་བསྐྱར་དུ་འགྲེལ་བཤད་བྱས་ཡོད་ཀྱང་ས་གནས་འོས་བསྡུའི་ལས་ཁང་གིས་ངོས་ལེན་བྱས་མི་འདུག ཕྱི་ལོ་༢༠༡༣ ཟླ་༩ ཚེས་༢༡ ཉིན་སྐབས་བཞི་པའི་བལ་ཡུལ་མཆོད་འཇོར་ས་གནས་མགོ་འཛིན་གྱི་སྔོན་འགྲོའི་འོས་བསྡུའི་ཁྲོད་ཀོང་པོ་དོན་གྲུབ་ལ་འོས་ཤོག་མང་པོ་ཐོབ་ཡོད་ཀྱང་། ཚེས་༢༨ ཉིན་གྱི་དངོས་གཞིའི་འོས་བསྡུ་མ་བྱས་སྔོན་ལ་ས་གནས་འོས་བསྡུ་ལྷན་ཁང་གིས་ཀོང་པོ་དོན་འགྲུབ་ལ་འོས་མིའི་ཆ་རྐྱེན་ཚང་མེད་ལུགས་བརྗོད་དེ་དངོས་གཞིའི་འོས་མིའི་ཁོངས་ནས་ཕྱིར་འཐེན་བྱས་ཡོད་འདུག ཚེས་༢༦ ཉིན་བསྟན་འཛིན་ཞུ་བ་ཞིག་གིས་ཟློས་གར་ཚོགས་པའི་བུ་ལོན་བལ་སྒོར་འབུམ་༢ དེ་ཕྱིར་སྤྲད་ཡོད་འདུག

ཐེངས་འདིར་ཆེས་མཐོའི་ཁྲིམས་ཞིབ་ཁང་གིས་ཐག་བཅོད་བྱས་པའི་བཅད་ཁྲའི་ནང་། ཀོང་པོ་དོན་གྲུབ་ཀྱིས་ཟློས་གར་གྱི་ཅ་དངོས་བཅོལ་ཡུལ་བསྟན་འཛིན་རྡོ་རྗེ་ཡིན་པ་ཁུངས་སྐྱེལ་ཐུབ་མེད་པའི་ངོས་འཛིན་དང་། འོས་བསྡུའི་འགན་འཛིན་གྱིས་བརྗོད་པ་ལྟར་ཟློས་གར་གྱི་ཅ་དངོས་བཅོལ་ཡུལ་ཀོང་པོ་དོན་གྲུབ་ཡིན་པའི་ངོས་འཛིན་བྱས་ཤིང། ལྡོག་གཏུག་སྐབས་ཀོང་པོ་དོན་གྲུབ་ཀྱིས་ས་གནས་སྐོར་སྲུང་ལས་ཁུངས་ལ་སྙན་ཞུ་ཕུལ་མེད་པ་ཁུངས་སྐྱེལ་ཐུབ་མེད་པ་མ་ཟད། བཙན་བྱོལ་བོད་མིའི་སྒྲིག་འཛུགས་ལ་ལྟོས་མེད་ཀྱིས་གནས་ཡུལ་སྐོར་སྲུང་ལས་ཁུངས་སུ་སྙན་ཞུ་ཕུལ་ཏེ་འོས་བསྡུའི་ལས་དོན་ལ་འགོག་རྐྱེན་བཟོ་རྩིས་བྱས་པར་ཀོང་པོ་དོན་གྲུབ་ཆད་པ་ཧིན་སྒོར་༧༠༠༠ བཅད་པ།

ད་ཐེངས་ཆེས་མཐོའི་ཁྲིམས་ཞིབ་ཁང་གིས་བུ་ལོན་སྒྲུབ་མཇལ་མ་ཐུབ་པ་མ་ཡིན་པ་ཞེས་པ་དེར་འགྲེལ་བཤད་ཅིག་བསྐྱོན་ཡོད་པ་ནི། “བུ་ལོན་སྒྲུབ་མཇལ་མ་ཐུབ་པ་མ་ཡིན་པ་ཞེས་པའི་གོ་དོན་ནི་ཁྲིམས་དོན་གྱི་བྱ་རིམ་ཐོག་ནས་སོ་སོའི་ཁ་རྗེ་དབང་ཐང་གིས་གཞན་ནས་གཡར་ལེན་བྱས་པའི་བུ་ལོན་སྒྲུབ་འཇལ་གྱི་ནུས་པ་གང་ཞིག་ལ་ཁྲིམས་ཁང་རང་ནས་ཐག་གཅོད་ཚོང་རྐུབ་རྡིབ་པ་(bankruptcy)ཞེས་བརྗོད་པ་དང་། རྒྱུ་ནོར་གྱི་གནས་སྟངས་ཆ་ནས་བུ་ལོན་སྒྲུབ་འཇལ་མ་ཐུབ་པའི་སྐྱེ་བོ་གང་ཞིག་ནས་ཞུ་གཏུགས་ཀྱིས་ཁྲིམས་ཁང་ནས་བུ་ལོན་སྒྲུབ་མཇལ་མ་ཐུབ་པ་མ་ཡིན་པའི་གནས་སྟངས་མེད་པར་ཆགས་པའི་ངོས་ལེན་གནང་མེད་པ་ཡིན་ན། (Undischarged insolvent) སྐྱེ་བོ་དེ་གཞུང་གི་གནད་ཡོད་ལས་གནས་ཐོག་འོས་བསྡུའི་ལམ་ནས་འཛུལ་ཞུགས་ཀྱི་འོས་ཆོས་ཚང་གི་མེད་པ་ནི་གཞུང་གི་གནད་ཡོད་ལས་སྣེར་འོས་ཆོས་འདི་བཞག་པའི་རྒྱལ་ཁབ་ཕལ་མོ་ཆེའི་འགྲེལ་བཤད་རྒྱག་སྟངས་ཤིག་ཡིན”ཞེས་འཁོད་འདུག

གཉིས་པ། བཙན་བྱོལ་བོད་མིའི་བཅའ་ཁྲིམས་ནང་། འོས་བསྡུའི་ལས་དོན་དང་འབྲེལ་བའི་རྩོད་རྙོག་རིགས་དབུས་འོས་བསྡུ་ལྷན་ཁང་གིས་ཐག་གཅོད་བྱེད་དགོས་པ་གསལ་ཡོད་ཀྱང་། འོས་བསྡུའི་ལས་དོན་བྱེད་ཕྱོགས་ཐོག་ཉིད་ཀྱི་ཞུ་སྦྱོར་དང་འདྲ་མཚུངས་ས་གནས་ཁ་ཤས་ལ་ཡོང་གི་ཡོད་སྟབས། ས་གནས་འོས་བསྡུའི་འགན་འཛིན་དང་འབྲེལ་ཡོད་ཚོགས་མི་རྣམས་ནས་སྐབས་དེར་ཞིབ་འཇུག་ཐག་གཅོད་ཇི་ལྟར་བྱུང་མིན་ས་གནས་དེའི་འགན་འཁུར་གནང་མཁན་རྣམས་ནས་ལེགས་པར་ཞིབ་ཕྲ་ཤེས་རྟོགས་ཡོད་པར་སོང་། ས་གནས་ཀྱིས་ཇི་ལྟར་ཐག་གཅོད་བྱེད་པ་ཞིག་ལ་དབུས་འོས་བསྡུ་ལས་ཁང་ནས་དམིགས་བསལ་ཐེ་བྱུས་བྱེད་སྲོལ་མེད་”ཅེས་ལན་སྤྲད་ཡོད་སྟབས། དབུས་འོས་བསྡུ་ལས་ཁང་གིས་འགན་དབང་ལག་བསྟར་མ་བྱས་པར། འོས་བསྡུའི་འགན་འཛིན་འཇམ་དཔལ་ཆོས་བཟང་ལ་ཆད་པ་ཧིན་སྒོར་༢༠༠༠༠ བཅད་འདུག

གསུམ་པ། བདུད་འདུལ་རྡོ་རྗེ་ཡིས་ཀོང་པོ་དོན་གྲུབ་ཀྱི་མིང་དངོས་གཞིའི་འོས་ཁུངས་ནས་ཕྱིར་འཐེན་བྱས་པ་དོ་བདག་གིས་ངོས་ལེན་བྱས་ལུགས་ཁུངས་སྐྱེལ་ཐུབ་མེད་པ་དང་། ཀོང་པོ་དོན་གྲུབ་ཀྱིས་ཁ་པར་བརྒྱུད་ཁོ་རང་ལ་སྡིགས་ར་སྐུལ་ཚུལ་བདུད་འདུལ་རྡོ་རྗེ་ནས་ཁུངས་སྐྱེལ་ཐུབ་མེད་པ། ས་གནས་འོས་བསྡུ་ལས་ཁང་གིས་ཀོང་པོ་དོན་གྲུབ་དངོས་གཞིའི་འོས་ཁོངས་ནས་ཕྱིར་འཐེན་བྱས་པ་དེ་འོས་བསྡུའི་སྒྲིག་གཞི་དང་འགལ་ཡོད་པར། བདུད་འདུལ་རྡོ་རྗེ་ལ་ཆད་པ་ཧིན་སྒོར་ ༡༠༠༠༠ བཅས་ཀྱི་ཐག་བཅད་འདུག

འདུད་འདུལ་རྡོ་རྗེ་ཡིས་ཀོང་པོ་དོན་འགྲུབ་འོས་མིའི་ཁོང་ནས་ཕྱིར་འཐེན་བྱེད་དགོས་དོན་ནི། ཀོང་པོ་དོན་འགྲུབ་ཀྱིས་ཟློས་གར་ཚོགས་པའི་ཧིན་སྒོར་འབུམ་༢ ལྷག་གི་ཟློས་གར་གྱི་ཅ་དངོས་ཁག་༨ ཙམ་ཞིག་ཕྱི་ལོ་༡༩༩༢ ལོ་ནས་བཅོལ་བཞག་པ་དེའི་བུ་ལོན་གཙང་མ་བཟོས་མེད་པ་དང་། དེ་གཙང་མ་བཟོས་མེད་པ་དེ་རྩིས་ཞིབ་སྙན་ཐོ་དང་། མང་ཚོགས་རྩིས་ཁྲ་ཚོགས་ཆུང་གི་སྙན་ཐོ། ཟློས་གར་གྱི་ཡིག་ཆ་བཅས་སུ་གསལ་འདུག་སྟབས། ཀོང་པོ་དོན་གྲུབ་འོས་མིའི་ཁོངས་ནས་མར་འཐེན་པ་ཡིན་སྐོར་བརྗོད་ཡོད་འདུག

རྩོད་ལན་པ་དང་པོ་འཇམ་དཔལ་ཆོས་བཟང་དང་། གཉིས་པ་ཀ་ཐ་མན་གྲུ་ས་གནས་འོས་བསྡུའི་འགན་འཛིན་ཟུར་པ་བདུད་འདུལ་རྡོ་རྗེ་གཉིས་ཀྱི་ཆད་འགེལ་དངུལ་འབབ་འབྲེལ་ཡོད་ལས་ཁུངས་ནས་གཅོག་ཆ་བྱེད་རྒྱུ་དང་། ལྡོག་གཏུག་རྩོད་ལན་པ་ཀོང་པོ་དོན་གྲུབ་ནས་ཆད་འགེལ་དངུལ་འབབ་ཐད་ཀར་ཁྲིམས་ཞིབ་ཁང་དུ་འབུལ་དགོས་པ་དང་། བཅད་ཁྲ་གཏོང་ཚེས་ནས་ཉིན་༣༠ ནང་ཚུན་དཔལ་འབྱོར་ལས་ཁུངས་སུ་ཆད་འགེལ་དངུལ་འབབ་ཕུལ་བའི་བྱུང་འཛིན་ངོ་བཤུས་ཆེས་མཐོ་ཁྲིམས་ཞིབ་ཁང་དུ་འབུལ་དགོས་ཞེས་གསལ་འདུག།