ཨི་རག་གི་གྲོང་ཁྱེར་ཞིག་འཇིགས་སྐུལ་དྲག་སྤྱོད་པའི་ལག་ཏུ་ཤོར།

ཨི་རག་གི་གྲོང་ཁྱེར་རཱ་མཱ་ཌི་ISIS དྲག་སྤྱོད་པས་བཙན་བཟུང་བྱས་པའི་ཁྲོད། དམག་མི་དང་ཡུལ་མི་ཉུང་མཐར་༥༠༠ ཙམ་རྐྱེན་ལམ་དུ་བཏང་པ་དང། ཡུལ་མི་༨༠༠༠ ལྷག་རང་ཁྱིམ་ནས་བྲོས་བྱོལ་དུ་འགྲོ་དགོས་བྱུང་ཡོད་འདུག

ཟླ་འདིའི་ཕྱི་ཚེས་༡༨ ཉིན་གསར་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨི་རག་གི་དམག་དཔུང་དང་ISIS ཁ་ཆེའི་འཇིགས་སྐུལ་དྲག་སྤྱོད་གཉིས་བར་དམག་འཐབ་ཡུན་རིང་བྱས་པའི་རྗེས། ཟླ་འདིའི་ཕྱི་ཚེས་༡༧ ཉིན་དྲག་སྤྱོད་ཚོགས་པས་ཨི་རག་གི་གྲོང་ཁྱེར་རཱ་མཱ་ཌི་བཙན་བཟུང་བྱས་ཏེ། ཨ་རིས་རྒྱབ་སྐྱོར་བྱས་པའི་ཨི་རག་སྲིད་གཞུང་གི་དམག་རྣམས་གྲོང་ཁྱེར་ནས་ཕྱིར་འཐེན་བྱེད་དགོས་བྱུང་ཡོད་འདུག
སྲིད་གཞུང་གི་མགྲིན་ཚབ་པ་ཧེ་མུར་(Muhannad Haimor) གྱིས་ཉིན་གསུམ་ནང་ཚུད་དུ་དམག་འཁྲུག་དེའི་ཁྲོད། དམག་མི་དང་མི་མང་ཁྱོན་སྡོམ་ཉུང་མཐར་ཡང་མི་༥༠༠ ཙམ་རྐྱེན་འདས་སུ་ཕྱིན་ཡོད་ཅིང་། ཡུམ་མི་༨༠༠༠ ཙམ་གྲོང་ཁྱེར་བཞག་ནས་བྲོས་བྱོལ་དུ་སོང་ཡོད་པའི་ཚོད་དཔག་བྱེད་བཞིན་ཡོད་སྐོར་བརྗོད་འདུག

གཞུང་འབྲེལ་དཔོན་རིགས་ཤིག་གིས་འགྲེལ་བརྗོད་བྱས་པ་ལྟར་ན། ད་ལྟའི་ཆར་དྲག་སྤྱོད་ཚོགས་པས་སྡེབ་གསོད་བྱས་པའི་ཨི་རག་གི་དམག་མི་དང་། ཡུལ་མི་རྣམས་ཀྱི་ཕུང་པོ་རྒྱ་ལམ་སྟེང་གང་བྱུང་འདོར་ཏེ་ལྷག་ཡོད་པ་དང། གྲོང་ཁྱེར་གྱི་ཁོར་ཡུག་འཇིགས་སྣང་ལྡན་པ་ཞིག་ཏུ་གྱུར་ཡོད་སྐོར་བརྗོད་འདུག

སྲིད་གཞུང་གི་དམག་དཔུང་རྣམས་གྲོང་ཁྱེར་ནས་ཕྱིར་འཐེན་བྱས་པའི་རྗེས། ཨི་རག་གི་སྲིད་བློན་ཧེ་ཌར་(Haider al-abadi) གྱིས་བདེ་སྲུང་ཉེན་རྟོག་པ་དང་དམག་མི་རྣམས་ཨན་བྷར་མངའ་སྡེའི་ས་ཚིགས་བརྒལ་ཏེ་འགྲོ་མི་ཆོག་པ་དང། ཨན་བྷར་གྱི་ས་ཚིགས་དེ་དག་སྲུང་སྐྱོབ་ཡག་པོ་དགོས་པའི་བཀའ་ཁྱབ་བཏང་ཡོད་འདུག

དེ་བཞིན་ཨ་རིའི་ཕྱི་སྲིད་བློན་ཆེན་རྗོན་ཁེ་རི་(Jhon Kerry) ཡིས་ཁ་ཆེའི་འཇིགས་སྐུལ་དྲག་སྤྱོད་ཤོག་ཁག་ཕམ་པར་བརྒྱབ་ཐུབ་པའི་ཡིད་ཆེད་དང་རེ་བ་ཆེན་པོ་བྱེད་ཀྱི་ཡོད་ནའང་། འཐབ་འཛིང་དེ་དུས་ཡུན་རིང་པོར་གནས་ངེས་ཞིག་ཡིན་སྐོར་བརྗོད་འདུག

ལོ་བཅུའི་སྔོན་ཨ་རི་ལ་ཁ་གཏད་ཨི་རན་གྱི་ཤི་ཡ་(Shiite) ཁ་ཆེའི་དམག་དཔུང་མང་པོ་ཞིག ཟླ་འདིའི་ཕྱི་ཚེས་༡༨ ཉིན་གྱི་ISISདྲག་སྤྱོད་པ་རྣམས་ཨི་རག་གི་རྒྱལ་ས་རཱ་མཱ་ཌི་ནས་ཕྱིར་འབུད་བྱས་པའི་འཐབ་འཛིང་ཁྲོད་མཉམ་ཞུགས་བྱས་ཡོད་པ་དང་། ཨ་རི་དང་ཨི་རག་སྲིད་གཞུང་ཕྱོགས་ནས། ཨན་བྷར་མངའ་སྡེ་ནི་སོ་ནི་(Sunni) ཁ་ཆེའི་གྲངས་ཉུང་མི་རིགས་ཀྱི་ས་གནས་ཞིག་ཡིན་སྟབས། སོ་ནིའི་ཁ་ཆེའི་ISIS དྲག་སྤྱོད་པ་ཚོས་གནད་དོན་དེ་ཆོས་ལུགས་ཀྱི་དམག་འཁྲུག་གི་རྩོད་གླེང་ཞིག་ཏུ་ཁ་བསྒྱུར་ཏེ། ཡུལ་མི་ཚོའི་རྒྱབ་སྐྱོར་རག་ཐབས་བྱ་སྲིད་པའི་ཐད་སེམས་འཚབ་བྱེད་བཞིན་ཡོད་པ་རེད།

ཁ་ཆེའི་འཇིགས་སྐུལ་དྲག་སྤྱོད་ཚོགས་པས་དྲ་ལམ་ཁག་ཏུ། ཨི་རག་གི་དམག་དཔུང་རྣམས་རྒྱལ་ས་རཱ་མཱ་ཌི་ནས་ཕྱིར་འཐེན་བྱས་རྗེས། དམག་སྒར་དུ་འདོར་པའི་དམག་མིའི་གཞོན་འཁོར་དང། མེ་མདའ། ཁྲབ་ལྡན་འཐབ་འཁོར། མེ་ཤུགས་འཕུར་མདའ་བཅས་གོ་མཚོན་མང་པོ་ཞིག་རག་ཡོད་པའི་གནས་ཚུལ་སྤེལ་ཡོད་པ་རེད།

འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཨི་རག་གི་རྒྱལ་ས་རཱ་མཱ་ཌིར་ཟིང་འཁྲུག་བྱུང་པ་ནས་བཟུང་། ད་བར་རྒྱལ་ས་དང་དེའི་ཉེ་འཁོར་གྱི་གནས་སྡོད་ཡུལ་མི་༡༡༤༠༠༠ ཙམ་རང་ཁྱིམ་ནས་བྲོས་བྱོལ་དུ་སོང་ཡོད་པའི་གནས་ཚུལ་སྤེལ་འདུག།།

གསར་འགོད་པ་བསྟན་འཛིན་ཟླ་བ།