འཛམ་གླིང་ཐོག་བོད་ཀྱི་ཡིག་གཟུགས་རིང་ཤོས་འབྲི་མཁན་གྱི་འགྲེམས་སྟོན།

ཟླ་འདིའི་ཚེས་༡༣ ཉིན་དྷ་ས་མེག་གྷན་ཉིན་མོའི་སློབ་གྲྭའི་ནང་དུ་དབུས་གཙང་ཆོལ་ཁའི་དབུས་རྒྱུན་གྱི་གོ་སྒྲིག་འོག སྐུ་ཞབས་ལྕག་རི་ཤར་པ་འཇམ་དབྱངས་རྡོ་རྗེས་ཡིག་གཟུགས་ཀྱི་འགྲེམས་སྟོན་ཞིག་བྱས་ཡོད་པ་དང་། ཁོང་གིས་༢༠༡༠ ལོར་འཛམ་གླིང་གི་རྗེ་ནི་ཟིན་ཐོ་(Genius Record)ཞེས་པའི་ནང་ཡིག་གཟུགས་རིང་ཤོས་ཀྱི་ཟིན་ཐོ་བརྟོལ་ཡོད་པ་རེད།

འགྲེམས་སྟོན་མཛད་སྒོའི་ཐོག་སྐུ་མགྲོན་གཙོ་བོ་ཟམ་གདོང་རིན་པོ་ཆེ་དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ། དྷ་ས་ས་གནས་འགོ་འཛིན་སོགས་ཕེབས་ཡོད་པ་དང་། དབུས་གཙང་ཆོལ་ཁའི་ངོས་ནས་ཁོང་ལ་ཆེ་བསྟོད་ཀྱི་ཕྱག་རྟགས་ཤིག་གནང་བ་མ་ཟད། ཧིན་བོད་མཛའ་འབྲེལ་ཚོགས་པའི་ངོས་ནས་ཁོང་ལ་རྒྱ་གར་གྱི་ཆེ་བསྟོད་མཚོན་ཆེད་ཀྱི་ཞྭ་མོ་དང་། གཟན་གཡོགས་ཡོད་པ་རེད།

ཡིག་གཟུགས་འགྲེམས་སྟོན་དེའི་ཐོག་སྐུ་མགྲོན་གཙོ་བཀའ་ཁྲི་ཟུར་པ་ཟམ་གདོང་རིན་པོ་ཆེས་བོད་ཀྱི་ཡིག་གཟུགས་ཀྱི་བྱུང་རིམ་དང་འབྲེལ་ནས། ཐོན་མི་སཾབྷོ་ཊའི་སྔོན་བོད་ལ་ཡིག་གཟུགས་ཡོད་མེད་ཀྱི་བཤད་སྟངས་གཉིས་ཡོད་སྐོར་དང་། ཡིག་གཟུགས་སྒྱུ་རྩལ་གྱི་ཁྱད་ཆོས་སོགས་ཀྱི་ཐོག་གསུང་བཤད་གནང་སྐབས། སྐུ་ཞབས་འཇམ་དབྱངས་རྡོ་རྗེས་ཡིག་གཟུགས་ཀྱི་ཁྱད་ཆོས་དང་ཡིག་གཟུགས་ཀྱི་ལམ་ནས་སྐུ་ཐང་བྲིས་ཡོད་པ་ཁག་གི་ཁྱད་ཆོས་སོགས་གསུངས་པ་དང་། ཡིག་གཟུགས་མཁན་ཁོང་ལ་བསྟོད་བསྔགས་གནང་ཡོད་པ་རེད།

འཇམ་དབྱངས་རྡོ་རྗེས་ཡིག་གཟུགས་འགྲེམས་སྟོན་དེའི་སྐོར་གསར་འགོད་པར་འགྲེལ་བརྗོད་གནང་དོན། ཡིག་གཟུགས་ཀྱི་སྒྱུ་རྩལ་དང་ཡིག་གཟུགས་རིང་པོ་བྲིས་པ་དེའི་སྐོར་ལ་དབུས་གཙང་ཆོལ་ཁ་དང་རྒྱ་གར་གྱི་ཧིན་བོད་མཛའ་འབྲེལ་ཚོགས་པ་བཅས་ཀྱིས་ཆེ་མཐོང་གནང་བར་དགའ་པོ་བྱུང་སྐོར་དང་། ཁོང་ལ་ཐོག་མར་ཟམ་གདོང་རིན་པོ་ཆེས་ཡིག་གཟུགས་སླབས་མྱོང་ཡོད་སྐོར་འགྲེལ་བརྗོད་གནང་བ་དང། ཁོང་གིས། “དེང་སྐབས་ཡིག་གཟུགས་སྦྱངས་ནས་ཕན་ཐོག་གི་མ་རེད། གློག་ཀླད་རྩིས་འཕྲུལ་ཡོད་པ་དང་། དབུ་ཅན་ལས་དབུ་མེད་ཡིག་གཟུགས་སྦྱངས་ནས་ཕན་ཐོག་ཡོད་པ་མ་རེད་ཟེར་གྱི་ཡོད་རེད། ངས་བོད་ཀྱི་རིག་གཞུང་ཡིག་གཟུགས་སྒྱུ་རྩལ་དེ་བརླགས་ན་འགྲིག་གི་མེད་པར་བརྟེན། གཞོན་སྐྱེས་ཚོའི་ནང་བོད་ཀྱི་ཡིག་གཟུགས་ལ་དོ་སྣང་ཡོང་ཐབས་དང་། འཛམ་གླིང་ནང་རྒྱ་ནག་གི་ཡིག་སྒྱུ་རྩལ་གྱི་གྲལ་དུ་མཉམ་དུ་སླེབས་ཐབས་པའི་ཆེད་དུ་རེད། ངས་ཁོང་ཚོ་མཉམ་དུ་འགྲན་སྡུར་བྱེད་མྱོང་། ཁོང་ཚོ་ལས་ཡག་པ་འདུག་ལབ་ན། ཧམ་པ་ཡིན་གྱི་རེད་མོད། ང་ཚོ་རྗེས་ལུས་ཐེབས་དགོས་ཀྱི་མི་འདུག དེའི་ཐོག་ཅིག་བྱེད་ཀྱི་ཡོད་པ་གཞོན་སྐྱེས་ཚོར་དོ་སྣང་ཡོང་ཆེད་དུ་ཡིན་”ཞེས་གསུངས་སོང་།

༢༠༡༠ ལོར་འཇམ་དབྱངས་རྡོ་རྗེས་བྲིས་པའི་ཤོག་དྲིལ་རིང་མོའི་ཐོག་གི་བོད་ཡིག་ཡིག་གཟུགས་དེ་འཛམ་གླིང་གི་རྗེ་ནི་ཟིན་ཐོ་ཚོགས་པ་ཞེས་པའི་ནང་གི་ཡིག་གཟུགས་ཀྱི་ཟིན་ཐོ་གསར་ཤོས་དང་རིང་ཤོས་དེ་ཆགས་ཡོད་པ་རེད།

ཡིག་གཟུགས་དེའི་རིང་ཚད་མི་ཊར་ ༡༦༣.༢ ཡོད་པ་དང་། དེའི་ཐོག་མཁས་གྲུབ་སུམ་ཅུ་སོ་གཉིས་ཀྱིས་༧གོང་ས་མཆོག་གི་སྐུ་ཚེ་ཡུན་རིང་བརྟན་ཆེད་དང། ཐུགས་ཀྱི་བཞེད་དོན་མཐའ་དག་ལྷུན་གྱིས་འགྲུབ་པའི་ཆེད་དུ་བརྩམས་པའི་སྨོན་ཚིག་རྣམས་ཡིག་གཟུགས་ཚུགས་རིང་དང། ཚུགས་ཐུང། དེ་བཞིན་ཚུགས་མ་འཁྱུག་དང་འཁྱུག་ཡིག་སོགས་བྲིས་ཡོད་པ་རེད།
འཇམ་དབྱངས་རྡོ་རྗེ་ནི། བོད་ཀྱི་རྒྱལ་ས་ལྷ་སར་འཁྲུངས་པ་དང། རྒྱ་ནག་གིས་བོད་ལ་བཙན་འཛུལ་སྐབས་རྒྱ་གར་དུ་སྐྱབས་བཅོལ་ལ་ཡོང་། སློབ་མཐར་ཕྱིན་རྗེས་རྒྱ་གར་གྱི་འབྲས་ལྗོངས་མངའ་སྡེ་གཞུང་གི་གཞུང་ཞབས་དང། དེ་མཚུངས་བོད་གཞུང་ཟློས་གར་གྱི་འགན་འཛིན་དང། འཕགས་བོད་འབྲེལ་མཐུད་ཁང་གི་འགན་འཛིན་སོགས་གནང་མྱོང་ཡོད་པ་རེད།།