ཉི་ཧོང་གི་མི་ཁྲི་འགས་ཧེ་རོ་ཞི་མཱའི་རྡུལ་ཕྲན་དུས་དྲན་ཐེངས་༧༠ པ་བརྩི་སྲུང་།

དེ་རིང་ཉི་ཧོང་གི་གྲོང་ཁྱེར་ཧེ་རོ་ཞི་མཱ་རུ་འཁྲུག་ཆེན་གཉིས་པའི་སྐབས་ཧེ་རོ་ཞི་མཱར་རྡུལ་ཕྲན་གོ་མཚོན་གྱི་གཏོར་རྒོལ་བྱུང་སྟེ་མི་ལོ་༧༠ འཁོར་བའི་དུས་དྲན་སྲུང་བརྩི་ཞུས་ཡོད་པ་དང་། སྲིད་བློན་ཨ་བྷི་ཡིས་གསུང་བཤད་སྐབས་འཛམ་གླིང་ཐོག་རྡུལ་ཕྲན་གོ་མཚོན་མེད་པར་བཟོ་དགོས་པའི་འབོད་སྐུལ་བྱས་འདུག

ཕྱི་ཟླ་༨ པའི་ཚེས་༦ རེས་གཟའ་ཕུར་བུའི་ཉིན་ཧེ་རོ་ཞི་མཱའི་དྲན་གསོ་གླིང་ཀ་རུ་དུས་དྲན་མཛད་སྒོ་སྲུང་བརྩི་ཞུས་ཡོད་པ་དང་། མཛད་སྒོའི་སྟེང་ཁྱོན་མི་ཁྲི་༥།༥ ཙམ་མཉམ་ཞུགས་བྱས་ཡོད་པའི་ཁྲོད། འཛམ་གླིང་ས་ཕྱོགས་གང་སའི་རྒྱལ་ཁབ་༡༠༠ ལྷག་གི་སྐུ་ཚབ་ཕེབས་ཡོད་པ་རེད།

ཕྱི་ལོ་༡༩༤༥ ལོའི་ཟླ་༨ པའི་ཚེས་༦ ཉིན་གྱི་སྔ་དྲོའི་ཆུ་ཚོད་༨ དང་སྐར་མ་༡༥ ཐོག ཨ་རིའི་དམག་འཐབ་གནམ་གྲུ་B-29 Ainola རྟགས་ཅན་ཞིག་གིས་མཐོ་ཚད་མི་ཊར་༦༠༠ ཙམ་ཡོད་པའི་བར་སྣང་ནས་ཡུ་རེ་ནི་ཡམ་(Uranium) ཞེས་པའི་རྡུལ་ཕྲན་འབར་མདེལ་གཅིག་གཡུགས་པ་དང་། ཉིན་གསུམ་རྗེས་ཡང་བསྐྱར་ནཱ་གྷ་ས་ཀི་རུ་རྡུལ་ཕྲན་འབར་མདེལ་གཅིག་གཡུགས་ཏེ། རྡུལ་ཕྲན་འབར་མདེལ་དེ་གཉིས་ནི་འཛམ་གླིང་འཁྲུག་ཆེན་གཉིས་པ་ཁྱོན་ཡོངས་ནས་མཇུག་བསྡུ་བར་ཆ་རྐྱེན་བསྐྲུན་མཁན་གྱི་དོན་རྐྱེན་ཆེ་ཤོས་སུ་གྱུར་ཡོད་ཀྱང་། རྡུལ་ཕྲན་འབར་མདེལ་གྱིས་ཉི་ཧོང་གི་ཧེ་རོ་ཞི་མཱ་རུ་ཉུང་མཐར་ཡང་མི་ཁྲི་༡༤ ལྷག་རྐྱེན་ལམ་དུ་བཏང་ཡོད།

ཉི་ཧོང་གི་སྲིད་བློན་ཨ་བྷི་ཡིས་མཛད་སྒོའི་ཐོག་གཏམ་བཤད་སྐབས། “ཧེ་རོ་ཞི་མཱའི་རྡུལ་ཕྲན་འབར་འགད་དོན་རྐྱེན་ཁྲོད་གསོན་པོར་ལུས་པ་རྣམས་ཀྱི་སེམས་ལ་གཟོད་པར་དཀའ་བའི་ན་ཟུག་ཡོད་ཀྱང་། དེ་རིང་གི་ཧེ་རོ་ཞི་མཱ་སླར་གསོ་བྱུང་སྟེ། དཔལ་ཡོན་ལྡན་པའི་རིག་གནས་ཀྱི་རྒྱལ་ས་ཞིག་ཏུ་གྱུར་ཟིན་པ་དང་། རྡུལ་ཕྲན་འབར་འགད་དུས་དྲན་ཐེངས་༧༠ པའི་དེ་རིང་། ཁོང་གིས་ངེས་པར་དུ་སླར་ཡང་འཛམ་གླིང་ཞི་བདེའི་གལ་ཆེ་རང་བཞིན་ནན་བརྗོད་བྱ་རྒྱུ་ཡིན་སྐོར་བརྗོད་ཡོད་འདུག

འོན་ཀྱང་། གསར་འགྱུར་བརྒྱུད་ལམ་ཁག་ཁ་ཤས་ནང་གནད་དོན་དབྱེ་ཞིབ་བྱས་པ་ལྟར་ན། ཨ་བྷི་ཡིས་ད་ལོའི་དུས་དྲན་གསུང་བཤད་ནང་“རྡུལ་ཕྲན་མེད་པའི་འཛམ་གླིང་”ཞེས་པའི་ཐ་སྙད་ཐེངས་གསུམ་བེད་སྤྱོད་བཏང་ཡོད་པ་དང་། ཉི་ཧོང་གིས་འགོ་ཁྲིད་དེ་རྡུལ་ཕྲན་གོ་མཚོན་གཙང་སེལ་གྱི་ལས་དོན་སྤེལ་རྒྱུའི་བསམ་ཚུལ་བཤད་ཡོད་ཀྱང་། སྔར་གྱི་བཤད་སྟངས་ལྟར་ཉི་ཧོང་གིས་རྡུལ་ཕྲན་མཚོན་ཆར་འཛིན་པའི་རྩ་བའི་སྲིད་ཇུས། ༡བཟོ་སྐྲུན་མི་བྱེད་པ། ༢བདག་འཛིན་མི་བྱེད་པ། ༣རྡུལ་ཕྲན་གོ་མཚོན་ནང་འདྲེན་མི་བྱེད་པ། བཅས་རྩ་བའི་རྩ་དོན་གསུམ་གྱི་སྐོར་ལ་གླེང་སློང་གང་ཡང་བྱས་མེད་པ་རེད།

དེ་བཞིན་དུས་དྲན་མཛད་སྒོའི་སྟེང་གི་ཕྱིའི་རྒྱལ་ཁབ་ཀྱི་སྐུ་མགྲོན་ནང་ཨ་རིའི་ཉི་ཧོང་གཞུང་ཚབ་ཆེན་མོ་ཁེ་རོ་ལིན་ (Caroline Kennedy) དང་། དམག་དོན་སྒྲིག་ཆས་སྟངས་འཛིན་དང་རྒྱལ་སྤྱིའི་བདེ་འཇགས་ཆེད་ལས་འགན་ཁུར་མི་སྣ་ཨ་རིའི་ཕྱི་སྲིད་དྲུང་ཆེ་གཞོན་པ་ལྕམ་གྷོ་ཊི་མའོ་ལར་(Gottemoeller) གཉིས་གཙོས། དབྱིན་ཡུལ་དང་ཧྥ་རན་སི། ཨུ་རུ་སུའི་སྐུ་ཚབ་ཀྱང་མཉམ་ཞུགས་བྱས་ཡོད་ནའང་། མཛད་སྒོའི་ཐོག་རྒྱ་ནག་གི་སྐུ་ཚབ་སུ་ཡང་སླེབས་མེད་པ་རེད།།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།