དཀྱིལ་ཤར་ཡུལ་གྲུ་ཁག་ནང་དམག་འཁྲུག་མཚམས་འཇོག་ཐབས་བྱེད་དགོས།

“༧གོང་ས་མཆོག་གིས་ཡུ་རོབ་ཀྱི་སྐྱབས་བཅོལ་བའི་དཀའ་ངལ་སེལ་བའི་ཐབས་ལམ་ཡག་ཤོས་ནི་དཀྱིལ་ཤར་ཡུལ་གྲུ་ཁག་ནང་དམག་འཁྲུག་མཚམམས་འཇོག་ཐུབ་ཐབས་བྱེད་དགོས་པ་ཡིན། ཡུ་རོབ་ཀྱིས་བྲོས་བྱོལ་བ་ཚང་མ་སྐྱབས་བཅོལ་ལེན་ཐབས་བྲལ་བ་རེད་”ཅེས་གསུངས་འདུག

ཟླ་འདིའི་ཚེས་༡༤ ཉིན་གྱི་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ༧གོང་ས་མཆོག་དབྱིན་ཡུལ་གྱི་གཙུག་ལག་སློབ་གཉེར་ཁང་ཨོས་ཕོརཊ (oxford)ཏཱ་ལའི་བླ་མའི་བྱམས་བརྩེ་ལྟེ་གནས་ཁང་ཞེས་པ་ཞིག་དབུ་འབྱེད་དུ་ཕེབས་ཡོད་པ་རེད།

སྐབས་དེར་གསར་འགོད་པ་ཞིག་གིས་ཡུ་རོབ་ཀྱིས་སྐྱབས་བཅོལ་བའི་དཀའ་ངལ་ལ་གདོང་ལེན་བྱེད་སྟངས་ཐད་མཐོང་ཚུལ་གང་ཡོད་སྐོར་དྲིས་པར། ༧གོང་ས་མཆོག་གིས། འཇར་མན་གྱིས་གདོང་ལེན་ཤིན་ཏུ་ཡག་པོ་བྱས་སོང། དེ་བཞིན་ཨོ་སི་ཋོ་རི་ཡས་ཀྱང་ཡག་པོ་བྱས་སོང། ཡིན་ཡང་སྐྱབས་བཅོལ་བ་ཚང་མ་ཡུ་རོབ་ནང་དུ་ལེན་ཐབས་བྲལ་བ་ཡིན་པས། ད་ལྟ་གནས་སྐབས་ལ་སྐྱབས་བཅོལ་བ་ཚོར་རོགས་པ་བྱེད་ཐུབ་རུང། མཐར་ཐུག་ལ་ཁོ་ཚོའི་ལུང་པའི་ནང་གི་དམག་འཁྲུག་མཚམས་འཇོག་བྱེད་ཐབས་ལ་འབད་དགོས་པ་ཡིན་པ་དང། ཕུགས་རྒྱང་རིང་པོའི་ནང་ཁ་ཆེའི་ལུང་པ་དེ་དག་གི་ནང་ཞི་བདེ་ལྷིང་འཇགས་ཡོང་ཐབས་ལ་བསམ་བློ་གཏོང་རྒྱུ་གལ་ཆེ་ཞེས་གསུངས་འདུག

དེ་བཞིན་དེ་སྔོན་༧གོང་ས་མཆོག་གིས་རང་ཉིད་ཏཱ་ལའི་བླ་མའི་ཡང་སྲིད་མཐའ་མ་དེ་ཆགས་སྲིད་སྐོར་གསུངས་སྐབས། རྒྱ་ནག་གཞུང་གིས་དེ་ལ་ངོ་རྒོལ་བྱས་ཡོད་པའི་ཐོག་ལ་དྲིས་སྐབས། ཁོང་གིས་བཞད་གད་ངང་ཡང་སྲིད་ལ་ཡིད་ཆེས་མེད་མཁན་དང། བོད་ཀྱི་རིག་གཞུང་ལ་ལྟ་ཚུལ་ཡག་པོ་མེད་མཁན་རྒྱ་ནག་དམར་ཤོག་གཞུང་དེས། ངའི་ཡང་སྲིད་སྐོར་ལ་ང་ལས་སེམས་འཚབ་ཆེ་བ་བྱེད་ཀྱི་ཡོད་པ་འདྲ་ཞེས་གསུངས་འདུག
ཐེངས་འདིར་༧གོང་ས་མཆོག་དབྱིན་ཡུལ་དུ་ཟླ་འདིའི་ཚེས་༢༢ བར་མཛད་འཆར་ཡོད་པ་ཡིན་འདུག

སྐལ་བཟང་དོན་གྲུབ།