འབར་མའི་ནང་ས་ཡོམ་ཚད་རིམ་༦.༩ཅན་ཞིག་བརྒྱབ་པ།

རེས་གཟའ་ལྷག་པའི་དགོང་མོར་འབར་མའི་བྱང་ཕྱོགས་སུ་ས་ཡོམ་ཤུགས་དྲག་ཅིག་བརྒྱབ་སྟེ། ས་ཡོམ་དེའི་རླབས་ཤུགས་འབར་མའི་མཐའ་མཚམས་ཀྱི་རྒྱ་གར་དང་བོད་ཀྱི་ས་ཁུལ་དུའང་ཚོར་སྣང་སླེབས་ཡོད་པ་དང་། ད་ལྟའི་ཆར་མི་ཤི་རྨས་ཀྱི་གནས་ཚུལ་ཐོན་མེད་པ་རེད།

ཐེངས་འདིའི་ས་ཡོམ་འབྱུང་ས་གཙོ་བོ་དེ་འབར་མའི་གྲོང་ཁྱེར་ཆེ་ཤོས་གཉིས་པ་མཱན་ཌ་ལཱེ་ནས་ལེ་དབར་༢༢༠ ཙམ་ཡོད་པའི་ཤིང་ནགས་ཁུལ་ཡིན་ཞིང་། འབར་མའི་ས་ཁུལ་ནི་མི་གྲངས་ཉུང་ཞིང་ས་ཡོམ་ཡང་ནས་ཡང་དུ་བྱུང་ས་ཞིག་ཡིན་པ་དང་། ཡུལ་མིའི་སྡོད་ཁང་མང་ཤོས་བརྩེགས་གཅིག་ཅན་གྱི་ཁང་པ་དམའ་མོ་ཤ་སྟག་ཡིན་པ་རེད།

འབར་མའི་གྲོང་ཁྱེར་གཙོ་བོ་ཡཱེ་གྷང་གི་མི་རྣམས་ས་ཡོམ་སླེབས་པ་ཤེས་པའི་རྗེས། དངངས་སྐྲག་གིས་ཕྱིའི་གཞུང་ལམ་ཐོག་ཏུ་ཐོན་ནས་ཡོད་པ་དང་། སྐར་མ་གཅིག་ཙམ་གྱི་རིང་ཐེངས་གཉིས་ལ་ཤུགས་ཆེན་པོ་འགུལ་ཡོད་འདུག།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།