མང་གཙོ་ཚོགས་པའི་སྲིད་སྐྱོང་དང་སྤྱི་འཐུས་ཀྱི་འོས་མི་གྲ་སྒྲིག་ལས་འགུལ།

ཟླ་འདིའི་ཚེས་༡༦ཉིན་གྱི་སྔ་དྲོར།བོད་ཀྱི་རྒྱལ་ཡོངས་མང་གཙོ་ཚོགས་པས། དྷ་སའི་ཉེ་འགྲམ་གྱི་བཙུན་དགོན་སྒྲོལ་མ་གླིང་དུ་མང་གཙོའི་གོ་རྟོགས་སྤེལ་བའི་གཏམ་བཤད་ཀྱི་ལས་འགུལ་ཞིག་སྤེལ་ཡོད་པ་རེད།

དེ་ཡང་མང་གཙོ་ཚོགས་པའི་དྲིལ་བསྒྲགས་དྲུང་ཆེ་བསྟན་འཛིན་རྣམ་མཛེས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ལས་འགུལ་དེ་ནི་བོད་ཀྱི་རྒྱལ་ཡོངས་མང་གཙོ་ཚོགས་པའི་མང་གཙོ་ཡར་རྒྱས་ཀྱི་ལས་གཞིའི་ཁྱབ་ཁོངས་ནས་ལས་འགུལ་ཞིག་ཡིན་པ་དང། དེར་བཙུན་དགོན་དེའི་དགེ་ལས་དང་སློབ་མ་ཡོངས་རྫོགས་མཉམ་ཞུགས་བྱས་ཡོད་པ་རེད།ལས་འགུལ་དེའི་ནང་བོད་ཀྱི་ཆབ་སྲིད་ལམ་ལུགས་ཀྱི་དཔེ་དེབ་དང་མང་གཙོའི་མཚོན་དོན།མང་གཙོའི་ནང་དོན་ལྡན་པའི་འོད་སྡེར་དང་མང་གཙོ་ངོ་སྤྲོད་ཀྱི་ཡིག་ཆ་སོགས་འགྲེམས་སྤེལ་བྱས་པ་དང་། བཀའ་ཟུར་རིན་ཆེན་མཁའ་འགྲོས་བོད་ཀྱི་མང་གཙོ་དབུ་བརྙེས་པ་ནས་ཕྱི་ལོ་༢༠༠༠བར་གྱི་མང་གཙོའི་འཕེལ་རིམ་དང་ལེགས་ཞན་ཇི་བྱུང་སྐོར་དང་།ཚོགས་གཙོ་དགེ་ལེགས་འཇམ་དབྱངས་ཀྱིས་སྤྱིར་མང་གཙོ་ངོ་སྤྲོད་དང་བོད་ཀྱི་རྒྱལ་ཡོངས་མང་གཙོ་ཚོགས་པའི་འཕེལ་རིམ་ངོ་སྤྲོད།དྲུང་ཆེ་དགེ་བཤེས་སེར་སྨད་བློ་དགས་ཕྱི་ལོ་༢༠༠༡ནས་ད་ལྟའི་བར་བོད་ཀྱི་མང་གཙོའི་འཕེལ་རིམ་དང་མ་འོངས་པའི་བྱེད་ཕྱོགས་བཅས་ཀྱི་སྐོར་གཏམ་བཤད་གནང་ཡོད་པ་རེད།

མང་གཙོ་ཚོགས་པའི་ངོས་ནས་སྐབས་རྗེས་མའི་བོད་ཀྱི་འོས་བསྡུ་ཆེན་མོའི་སྐབས། སྲིད་སྐྱོང་གི་འོས་མི་༣ལས་མི་མང་བ་དང་སྤྱི་འཐུས་ཀྱི་འོས་མི་༡༥ལས་མི་མང་བ་འདོན་རྒྱུ་ཡིན་ཟེར་བ་སོགས་ཚོགས་པའི་ངོས་ནས་མ་འོངས་པའི་ལས་འཆར་འགའ་ངོ་སྤྲོད་ཟིན་པའི་མཇུག་ཏུ་དྲི་བ་དྲིས་ལན་ཡོད་པ་རེད། ད་ལྟའི་བོད་ཀྱི་མང་གཙོ་དེ་མང་གཙོ་ཡང་དག་པ་ཡིན་མིན་དང་མང་གཙོ་ཚད་ལྡན་ཇི་ལྟར་བྱ་དགོས་སྐོར། ཆབ་སྲིད་ཚོགས་པའི་ལམ་ལུགས་ཀྱི་མང་གཙོ་དང་གྲོས་ཚོགས་གོང་འོག་ལམ་ལུགས་ཀྱི་མང་གཙོ། ད་ལྟའི་སྤྱི་འཐུས་ཀྱི་སྒྲོམ་གཞིར་འགྱུར་བ་དགོས་མིན་དང་རེས་མེད་དགོན་ཁག་གི་ཆོས་བརྒྱུད་སྤྱི་འཐུས་ཤིག་ཡོང་ཐབས་ཇེ་དགེསྤྱི་འཐུས་ཀྱི་ཡོང་ཁུངས་ས་གནས་ཁག་ནས་ཡོང་དགོས་སྐོར་སོགས་སུ་དྲི་བ་དང་གླེང་སློང་སྣ་ཚོགས་ཤིག་བྱུང་ཡོད་པ་རེད།།