ཆབ་སྲིད་ཚོགས་པ་གཅིག་པུ་དེ་ཡིན།

བོད་ཀྱི་རྒྱལ་ཡོངས་མང་གཙོ་ཚོགས་པའི་འགན་འཛིན་ལྷན་ཚོགས་ཐེངས་བཞི་པ་དེ་ཕྱི་ཟླ་༤ ཚེས་༢༥ཉིན་རྒྱ་གར་བྱང་ཕྱོགས་ཨུ་ཏར་ཁཱན་མངའ་སྡེ། སྡེ་ར་ལྡུན་གྱི་ཁྱབ་ཁོངས་སུ་གནས་པའི་བོད་མིའི་གཞིས་སྒར་བདེ་སྐྱིད་གླིང་དུ་འཚོགས་ཡོད་པ་རེད།

མང་གཙོ་ཚོགས་པའི་རྒྱུན་ལས་བསྟན་འཛིན་རྣམ་མཛེས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། མཛད་སྒོ་དེར་གདན་ཞུའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཀརྨ་ཡེ་ཤེས་དང་།དམིགས་བསལ་སྐུ་མགྲོན་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་སྐུ་ཚབ་ཡེ་ཤེས་བསྟན་འཛིན། ས་གནས་དེའི་གཞུང་འབྲེལ་དང་གཞུང་འབྲེལ་མིན་པའི་ཆོས་སྡེ་སྒྲིག་འཛུགས་ཁག་གི་གནད་ཡོད་མི་སྣ་བཞི་བཅུ་ལྷག་མཉམ་ཞུགས་བྱས་ཡོད་པ་རེད།

ད་ཐེངས་ཀྱི་ཚོགས་ཆེན་དེར་ཚོགས་པའི་འཛིན་སྐྱོང་ལས་དོན་དང་དམིགས་ཡུལ།ལྷག་པར་སྐབས་རྗེས་མའི་བཀའ་སྤྱིའི་འོས་བསྡུ་ཆེན་མོ་དབུ་འཛུགས་མ་བྱས་པའི་གོང་དུ་བཀའ་སྤྱིའི་འོས་གཞི་འདོན་ཕྱོགས་བཅས་ཀྱི་ཐད་བགྲོ་གླེང་དང་གྲོས་ཆོད་གཏན་འབེབས་བྱ་རྒྱུ་རེད་འདུགལྷན་ཚོགས་དེར་བོད་ཀྱི་རྒྱལ་ཡོངས་མང་གཙོ་ཚོགས་པའི་ས་གནས་ཁག་བཅུ་དྲུག་གི་ཚོགས་བཅར་བ་དང་དབུས་རྒྱུན་རྣམས་ཚང་འཛོམས་བྱུང་ཡོད་པ་རེད།

མཛད་སྒོའི་སྐུ་མགྲོན་གྱི་གཙོ་བོ་བོད་མི་མང་སྤྱི་འཐུས་ཀརྨ་ཡེ་ཤེས་ཀྱིས་བོད་ནང་ནས་རྒྱ་གཞུང་ལ་ངོ་རྒོལ་ལས་འབུལ་ཤུགས་ཆེན་བྱུང་བ་དང་། རྒྱ་གཞུང་གི་དམ་དྲག་ཆེན་པོ་ཡོད་སྐོར་དང་འབྲེལ་གསུང་དོན། “ང་ཚོ་ཕྱི་ཕྱོགས་སུ་གནས་པའི་བོད་མི་རྣམས་ཀྱིས་ཀྱང་།ཕྱིའི་ལྕགས་རི་དང་ནང་གི་ནོར་བུ་ལྟ་བུའི་༸གོང་ས་ཡིད་བཞིན་ནོར་བུའི་བཀའ་སྒྲུབ་རྒྱུ་དང་།ཁོང་གིས་མི་མང་ལ་གསོལ་རས་བསྩལ་བའི་བོད་ཀྱི་མང་གཙོ་ཡར་རྒྱས་དང་མི་མང་རང་རང་གིས་འགན་ཁྱེར་ཏེ་སོ་སོའི་རྐང་པའི་ཐོག་ལང་ཐུབ་པ་བྱེད་རྒྱུ་དེ་གལ་ཆེན་པོ་རེད།བོད་ཀྱི་མང་གཙོའི་ཐོག་ལས་འགན་ཁྱེར་བཞིན་པའི་བོད་ཀྱི་རྒྱལ་ཡོངས་མང་གཙོ་ཚོགས་འདིའང་ཕྱི་ལོ་༡༩༩༤ལོར་༸གོང་ས་མཆོག་གི་བཀའ་དགོངས་འོག་ཆེད་དུ་བཙུགས་གནང་བ་ཞིག་རེད།མང་གཙོའི་ལྟ་གྲུབ་དང་མཐུན་པའི་སྒྲིག་འཛུགས་འདི་བོད་མི་ཡོངས་ལ་དབང་བ་ཞིག་དང་།གཞུང་འབྲེལ་མ་ཡིན་པའི་ཚོགས་པའི་ནང་ནས་བོད་ཀྱི་རྒྱལ་ཡོངས་མང་གཙོ་ཚོགས་པ་དང་བོད་ཀྱི་གཞོན་ནུ་ལྷན་ཚོགས་གཉིས་ནི།ཆོལ་ཁ་དང་ལུང་ཚན།ལས་རིགས་དང་ཕོ་མོ་དབྱེར་མེད་ཀྱི་ཚོགས་པ་ཤིན་ཏུ་རྩ་ཆེན་ཞིག་ཏུ་གྱུར་ཡོད།མི་ཚང་མའི་འདོད་པ་སྐོང་ཐུབ་རྒྱུ་ཁག་པོ་རེད།འོན་ཀྱང་།སྐྱོན་བརྗོད་བྱེད་ངེས་ཚོས་ཀྱང་གང་ཟག་གི་ངོ་བོ་ལ་མ་བལྟས་པར་ལས་དོན་གྱི་ཐོག་ནས་སྐྱོན་བརྗོད་དང་སྐྱོན་སེལ་བྱ་རྒྱུ་དེ་དངོས་ཡོད་ཀྱི་དགོས་མཁོ་གལ་ཆེན་ཞིག་ཆགས་ཡོད།” ཅེས་སོགས་གསུངས་ཡོད་པ་རེད།

བོད་ཀྱི་རྒྱལ་ཡོངས་མང་གཙོ་ཚོགས་པའི་སྤྱི་ཁྱབ་ཚོགས་གཙོ་དགེ་ལེགས་འཇམ་དབྱངས་ཀྱིས་ཚོགས་འདུ་དབུ་འབྱེད་འབྲེལ་བའི་གསུང་བཤད་གནང་དོན།བོད་ཀྱི་རྒྱལ་ཡོངས་མང་གཙོ་ཚོགས་པ་དེ་འཛམ་གླིང་སྤྱིའི་མང་གཙོའི་ལམ་སྲོོལ་ལྟར་བོད་ཀྱི་མང་གཙོ་དར་སྤེལ་དང་རྒྱུན་འཛིན་གཙོ་བོར་དམིགས་ཏེ་སྲིད་དོན་ཚོགས་པ་ཞིག་གི་ངོ་བོར་ཆེད་འཛུགས་བྱས་པ་ཞིག་ཡིན།བོད་ཀྱི་ལོ་རྒྱུས་དང་བཙན་བྱོལ་སྤྱི་ཚོགས་ནང་མང་གཙོའི་འགྲོ་ལུགས་ཀྱི་སྲིད་དོན་ཚོགས་པ་གཅིག་པུ་ཞིག་ཡོད་པའང་ཚོགས་པ་འདི་ཉིད་ཆགས་ཡོད།ལོ་ངོ་ཉི་ཤུ་མ་ཟིན་ཙམ་གྱི་རིང་བཙན་བྱོལ་ནང་ཚོགས་པའི་ནུས་པ་དཔག་པའི་མང་གཙོའི་གོ་རྟོགས་སྤེལ་བ་སོགས་ཀྱིས་མཚོན།སྤྱི་ཚོགས་ཀྱི་བསམ་བློའི་སྣེ་ཁྲིད་མི་ཉུང་བ་ཞུས་ཡོད་ཅིང་།ལྷག་པར་བཀའ་སྤྱིའི་འོས་བསྡུའི་སྐབས་སྔ་ཕྱིར་འོས་མི་ལམ་སྟོན་སོགས་ཀྱི་ལམ་འགུལ་ལ་འགན་ཁུར་ཆེན་པོ་བླངས་ཏེ།དེ་ནི་བོད་ཀྱི་མ་འོངས་མི་རབས་ཀྱི་སེམས་ཤུགས་འཕེལ་བའི་རྐྱེན་རྩ་ནུས་ལྡན་ཞིག་ཏུ་གྱུར་ཡོད་པར་ཡིད་ཆེས་གཙང་མ་ཞུ་བཞིན་ཡོད།ཚོགས་པའི་གཞི་རྩའི་དམིགས་ཡུལ་ལྟར་བོད་ཀྱི་མང་གཙོ་དེ་ནི།༸གོང་ས་ཡིད་བཞིན་ནོར་བུའི་བཀའ་དགོངས་དང་བོད་མི་མང་གི་རེ་འདོད།གངས་ལྗོངས་སྲུང་སྐྱོབ་དང་བོད་ཀྱི་བདེན་དོན་འཐབ་རྩོད།བོད་མི་མང་གི་མ་འོངས་པའི་དམིགས་ཡུལ་བཅས་ཀྱི་ཐད།ཤིན་ཏུ་དགོས་མཁོ་ཆེ་བའི་ལམ་ལུགས་ཤིག་ཏུ་ངོས་འཛིན་གསལ་པོ་ཡོད་པའི་ཐོགཚོགས་པ་འདི་བཙུགས་ནས་ལོ་ངོ་ཉི་ཤུའི་རྗེས་ཏེ།དུས་ད་ལྟའང་བོད་ཀྱི་མང་གཙོ་ཡར་རྒྱས་དང་རྒྱུན་འཛིན་བཅས་ལ་སྨན་པའི་ལས་དོན་ཇི་སྙེད་ཅིག་བསྒྲུབས་དང་སྒྲུབ་མུས་ཡིན་སྐོར་གསུངས་སོང་།

མང་གཙོ་ཚོགས་པའི་དབུས་ས་ཟུང་འབྲེལ་གྱིས་གོ་སྒྲིག་བྱས་ཏེ།ཉིན་དེའི་དགོང་མོར་བདེ་སྐྱིད་གླིང་ས་གནས་མང་ཚོགས་ལ་༸ཀུན་གཟིགས་པཎ་ཆེན་སྐུ་གོང་མའི་མཛད་རྣམ་ཀྱི་གློག་བརྙན་ཞིག་ཀྱང་གཟིགས་འབུལ་ཞུས་ཡོད་པ་རེད།