བལ་ཡུལ་དུ་ཡང་བསྐྱར་ས་ཡོམ་རིམ་པ་༧.༣ ཅན་ཞིག་བརྒྱབ།

ཕྱི་ཟླ་༥ པའི་ཚེས་༡༢ རེས་གཟའ་མིག་དམར་ཉིན་གྱི་ཉིན་གུང་ཆུ་ཚོད་༡༢ དང་སྐར་མ་༡༥ ཙམ་ལ་བལ་ཡུལ་དུ་ཡང་བསྐྱར་ས་ཡོམ་རིམ་པ་༧.༣ ཅན་ཞིག་བརྒྱབ་ཡོད་འདུག

ཐེངས་འདིའི་ས་ཡོམ་བརྒྱབ་ས་གཙོ་བོ་དེ་རྒྱལ་ས་ཀ་ཐི་མེན་ཀྲུ་ནས་རྒྱང་ཐག་ལེ་དབར་༤༧ ཡོད་པའི་ནམ་ཆི་བྷ་ཛར་ཞེས་པའི་བལ་ཡུལ་དང་བོད་ཀྱི་ས་མཚམས། ཇོ་མོ་གླང་མའི་འདབས་རོལ་གྱི་རི་འཛེགས་ས་ཚིགས་ཀྱི་ཉེ་འཁོར་རུ་ཁེལ་ཡོད་པ་དང་། ས་ཡོམ་གྱི་རླབས་ཤུགས་དེ་བལ་ཡུལ་གྱི་མཐའ་མཚམས་རྒྱ་གར་བྱང་ཤར་གྱི་ས་ཁུལ་མང་པོའི་ནང་དང་། རྒྱལ་ས་ལྡི་ལི་རུའང་ཚོར་ཤུགས་མངོན་གསལ་དོད་པོ་སླེབས་ཡོད་པ་རེད།
ད་ལྟའི་ཆར་ཤེས་རྟོགས་བྱུང་བ་ལྟར་ན། བལ་ཡུལ་གྱི་གྲོང་གསེབ་ཅིག་གི་ནང་དུ་ཡོད་པའི་མི་ཚང་ཞིག་གི་ཁང་པ་བརྡིབས་ཏེ་མི་༤ བསད་པ་དང་། གཞན་ཁྱོན་བསྡོམས་པའི་མི་༡༨ ཙམ་འདས་གྲོངས་སུ་གྱུར་ཡོད་པའི་གནས་ཚུལ་སྤེལ་འདུག བལ་ཡུལ་གྱི་ས་མཚམས་རྒྱ་གར་བྷི་ཧར་མངའ་སྡེའི་ནང་མི་༢ གྲོངས་ཡོདཔ་རེད།