མི་༣༥ རྡོག་རྫིས་བཏང་སྟེ་བསད།

རྒྱ་ནག་ཧྲང་ཧེ་གྲོང་ཁྱེར་གྱི་ཐང་ཆེན་ཞིག་ཏུ་ཕྱི་ལོ་༢༠༡༥ གསར་ཚེས་ལ་སྐར་མ་༢༥ ཙམ་ཡོད་པའི་སྐབས། མི་ཚོགས་ཀྱིས་འཚང་ཀ་བརྒྱབ་སྟེ་མི་༣༥ ཙམ་རྡོག་རྫིས་བཏང་ནས་བསད་ཡོད་པ་དང་། མི་༤༥ ལྷག་ལ་རྨས་སྐྱོན་བཟོས་ཡོད་པ་རེད།

རྒྱ་ནག་གི་ས་ཆ་གང་སར་ཕྱི་ལོ་གསར་ཚེས་ལ་རྣམ་པ་འདྲ་མིན་གྱི་སྒོ་ནས་རྟེན་འབྲེལ་ཞུ་བཞིན་པ་དང་། ཧྲང་ཧེ་གྲོང་ཁྱེར་གྱི་ཁྲན་དབྱི་ཞེས་པའི་ཐང་ཆེན་དུ་མི་ཚོགས་ཧ་ཅང་མང་པོ་འཛོམས་ཏེ། ཕྱི་ལོ་གསར་ཚེས་ཀྱི་དགའ་སྟོན་ལ་རོལ་བཞིན་པའི་སྐབས་ཀྱི་མཚན་མོའི་ཆུ་ཚོད་༡༡ དང་སྐར་མ་༣༥ གཡས་གཡོན་ཙམ་ལ། ཁང་རྩེག་ཐོག་ཀ་ནས་མི་ཚོགས་དཀྱིལ་དུ་ཤོག་དངུལ་རྫུན་མ་གཡུགས་པའི་རྐྱེན་བྱས་ནས། མི་ཚོགས་ཀྱིས་ཤོག་དངུལ་སྒྲུག་པར་འཚང་ཀ་བརྒྱབ་སྟེ་རྡོག་རྫིས་ཀྱི་རྐྱེན་ཆགས་དེ་བྱུང་བ་ཞིག་ཡིན་པ་དང་། དོན་རྐྱེན་དེའི་ཁྲོད་བུད་མེད་༢༠ དང་བྱིས་པ་ཁ་ཤས་ཚུད་པའི་ཁྱོན་མི་༣༥ ཙམ་འདས་གྲོངས་གྱུར་པ་མ་ཟད། མི་༥༠ མ་ཟིན་ཙམ་ལ་རྨས་སྐྱོན་ཕོག་ཡོད་པ་རེད།

དེ་བཞིན་ཕྱི་ཟླ་༡ པོའི་ཚེས་༡ ཉིན་གྱི་ཞོགས་པར། མི་ཧ་ཅང་མང་པོ་ཧྲང་ཧེ་གྲོང་ཁྱེར་གྱི་སྨན་ཁང་ཆེ་ཤོས་ཁག་གི་ནང་དུ་འཛོམས་ཏེ། རྒྱ་ནག་གཞུང་གི་འབྲེལ་ཡོད་ལས་ཁུངས་ཀྱིས་སྐྱོན་ཆག་དེའི་གནས་ཚུལ་ར་སྤྲོད་དང་གསལ་བཤད་ཡོང་བར་སྒུག་བཞིན་པ་དང་། རྨས་སྐྱོན་ལྗིད་མོ་ཕོག་པའི་ནད་པོ་མང་པོ་ཞིག་ད་དུང་སྨན་ཁང་དུ་སྨན་བཅོས་བྱེད་བཞིན་ཡོད་འདུག།

གསར་འགོད་ཏྲེ་ཧོར་ཐུབ་བསྟན།