པཎ་ཆེན་རིན་པོ་ཆེ་རྒྱ་གཞུང་གིས་འཇུ་བཟུང་བྱས་ནས་ལོ་༢༠ འཁོར་བ།

ཟླ་འདིའི་ཚེས་༡༧ ཉིན་པཎ་ཆེན་སྐུ་ཕྲེང་༡༡ པ་རྒྱ་ནག་གཞུང་གིས་བཙན་ཁྲིད་རྗེས་གར་སོང་ཆ་མེད་དུ་གྱུར་ནས་ལོ་༢༠ འཁོར་བའི་ཉིན་མོ་དང་སྟབས་བསྟུན། བོད་དོན་གདུང་སེམས་མཉམ་བསྐྱེད་ཀྱི་ཉིན་མོར་སྲུང་བརྩི་བྱས་ཡོད་པ་རེད།

དེ་ཡང་ཕྱི་ཟླ་༥ པའི་ཚེས་༡༧ ཉིན་གྱི་སྔ་དྲོ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག དྷ་ས་མེག་གྷན་ཉིན་མོའི་སློབ་གྲྭའི་ནང་པཎ་ཆེན་རིན་པོ་ཆེ་དང་འབྲེལ་བའི་མཛད་སྒོ་ཞིག་འཚོགས་པ་དང་། ལོ་སྔོན་མ་ནས་བཀའ་ཤག་གིས་པཎ་ཆེན་རིན་པོ་ཆེ་འཇུ་བཟུང་གི་ཉིན་མོ་དེ་བོད་མིའི་གདུང་སེམས་མཉམ་བསྐྱེད་ཀྱི་ཉིན་མོར་གཏན་འབེབས་བྱས་ཡོད་པ་ལྟར། ཉིན་དེར་སྤྱི་འཐུས་ཚོགས་གཙོ་སྤེན་པ་ཚེ་རིང་སོགས་ཀྱིས་གཏམ་བཤད་གནང་ཡོད་པ་རེད།

པཎ་ཆེན་སྐུ་ཕྲེང་༡༠ སྐུ་གཤེགས་རྗེས་༡༩༩༥ ལོའི་ཕྱི་ཟླ་༥ ཚེས་༡༤ ཉིན་༧གོང་ས་མཆོག་གིས་པཎ་ཆེན་བཅུ་པའི་ཡང་སྲིད་དུ་དགེ་འདུན་ཆོས་ཀྱི་ཉི་མ་ངོས་འཛིན་བྱས་ནས་ཉིན་གསུམ་གྱི་རྗེས། རྒྱ་ནག་གཞུང་གིས་ཁོང་གི་ཕ་མ་ནང་མི་དང་བཅས་པ་བཙན་ཁྲིད་བྱས་ནས། གར་སོང་ཆ་མེད་དུ་གྱུར་པ་དང་། དེའི་སྐབས་ཁོང་དགུང་ལོ་༦ ཡིན་པས་རྒྱལ་སྤྱིའི་ནང་གི་ཆབ་སྲིད་བཙོན་པ་ཆུང་ཤོས་དེ་ཆགས་ཡོད་པ་རེད། དེ་ནས་རྒྱ་ནག་གཞུང་གིས་བོད་ཕྲུག་གཞན་ཞིག་པཎ་ཆེན་གྱི་ཡང་སྲིད་དུ་ངོས་འཛིན་བྱས་ཏེ། པཎ་ཆེན་རྒྱལ་མཚན་ནོར་བུའི་ཞེས་མིང་བཏགས་ཏེ། གསོ་སྐྱོང་བྱེད་བཞིན་ཡོད་པ་རེད།

ཉིན་དེའི་དུས་དྲན་མཛད་སྒོའི་ཐོག་བོད་མིའི་སྒྲིག་འཛུགས་ཕྱི་དྲིལ་དྲུང་ཆེ་དྭགས་པོ་བསོད་ནམས་ཀྱིས་གཏམ་བཤད་གནང་སྐབས། རྒྱ་ནག་གཞུང་གིས་པཎ་ཆེན་རིན་པོ་ཆེ་བཙན་ཁྲིད་བྱས་པ་ངོས་ལེན་བྱས་ཡོད་ཀྱང་། ཁོང་གང་དུ་ཡོད་མེད་དང་ཁོང་གི་གནས་སྟངས་ཇི་ཡིན་ད་བར་གསང་བ་བྱས་ཡོད་པ་རེད། བྱེད་སྟངས་དེ་ནི་ཆོས་མེད་སྨྲ་བའི་རྒྱ་ནག་གུང་ཁྲན་གཞུང་གིས་བོད་བརྒྱུད་ནང་བསྟན་གྱི་སྤྲུལ་སྐུའི་ལམ་ལུགས་དེར་བཙན་ཤེད་འོག་དབང་བསྒྱུར་བྱས་ནས་ཁྲིམས་མཐུན་བཟོ་ཐབས་བྱེད་ཀྱི་ཡོད་སྐོར་གསུངས་སོང་།

དེ་བཞིན་དྲུང་ཆེ་དྭགས་པོ་བསོད་ནམས་ཀྱིས་པཎ་ཆེན་རིན་པོ་ཆེ་གཙོས་བོད་ནང་གི་ཆབ་སྲིད་བཙོན་པ་ཡོངས་རྫོགས་གློད་གྲོལ་ཐོབ་ཆེད་རྒྱབ་སྐྱོར་གནང་རོགས་ཞེས་ང་ཚོས་རྒྱལ་སྤྱིའི་ཁྱོན་ཡོངས་ལ་འབོད་སྐུལ་ཞུ་རྒྱུ་ཡིན་སྐོར་གསུངས་སོང་།

བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་གྱིས་པཎ་ཆེན་སྐུ་ཕྲེང་བཅུ་པས་རྒྱ་ནག་གཞུང་ལ་བོད་ཀྱི་དཀའ་ངལ་སྐོར་གྱི་ཡིག་འབྲི་ཁྲི་བདུན་གྱི་སྙན་ཞུ་བཏང་བ་དེར་རྒྱ་ནག་གིས་ངོས་ལེན་བྱས་ཡོད་ན། ད་ལྟའི་གནས་སྟངས་ནང་བཞིན་ཐབས་སྐྱོ་པོ་ཡོང་རྒྱུ་མིན་སྐོར་དང་འབྲེལ་བའི་གཏམ་བཤད་གནང་སོང་།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོས་པཎ་ཆེན་རིན་པོ་ཆེ་འཇུ་བཟུང་བྱས་པ་དེ་རྒྱལ་སྤྱིའི་ཁྲིམས་དང་མཐུན་གྱི་མེད་སྐོར་དང་། པཎ་ཆེན་དགེ་འདུན་ཆོས་ཀྱི་ཉི་མ་རྒྱ་ནག་གིས་སྲུང་སྐྱོབ་བྱས་ན་བཞག་ཡོད་སྐོར་རྒྱ་ནག་གིས་བཤད་ཀྱི་ཡོད་ནའང་། ད་ལྟ་གསང་བ་བྱས་ནས་འཇོག་དགོས་དོན་མེད་པར། ལོ་༡༨ ཟིན་པའི་ཕྲུ་གུར་འགྲོ་འདུག་དང་སློབ་གཉེར་སོགས་འགྲོ་བ་མིའི་རང་དབང་སྤྲོད་དགོས་སྐོར་དང་། མཉམ་འབྲེལ་རྒྱལ་ཚོགས་ཀྱི་མི་གར་སོང་ཆ་མེད་གྱུར་པའི་ཚོགས་ཆུང་དང་། ཆོས་དད་རང་དབང་སྐོར་གྱི་ཚོགས་ཆུང་། མནར་གཅོད་སྐོར་གྱི་ཚོགས་ཆུང་བཅས་ཀྱིས་པཎ་ཆེན་རིན་པོ་ཆེ་གར་སོང་ཆ་མེད་དུ་གྱུར་བར་ངོས་འཛིན་གྱི་གསལ་བསྒྲགས་སྤེལ་བ་དང་། ༢༠༡༤ ལོར་རྒྱལ་ཚོགས་ཀྱི་མི་གར་སོང་ཆ་མེད་དུ་གྱུར་བའི་ཚོགས་ཆུང་གིས་རྒྱ་ནག་ནང་འགྲོ་ཆོག་པའི་ཆོག་མཆན་ཞུས་ཏེ། པཎ་ཆེན་རིན་པོ་ཆེ་རྩད་གཅོད་བྱེད་དགོས་བརྗོད་ཡོད་ནའང་། རྒྱ་ནག་གིས་ངོ་ལེན་མ་བྱས་པའི་སྐོར་སོགས་གསུངས་སོང་།

དེ་བཞིན་པཎ་ཆེན་རིན་པོ་ཆེའི་སྐོར་ལ་བློ་བཟང་སྦྱིན་པས་ཚིག་བརྩམས་ཏེ། གཞས་པ་བློ་བློས་གཞས་བཏང་བའི་རྐྱེན་གྱིས་རྒྱ་གཞུང་གིས་བཙོན་འཇུག་བྱས་ཡོད་སྐོར་ཚེ་རིང་མཚོ་མོས་ངོ་སྤྲོད་གནང་སོང་།

སྤྱི་འཐུས་ཚོགས་གཙོ་སྤེན་པ་ཚེ་རིང་གིས་གཏམ་བཤད་གནང་སྐབས། པཎ་ཆེན་རིན་པོ་ཆེ་སྐུ་ཕྲེང་༡༠ པའི་ཡང་སྲིད་ངོས་འཛིན་སྐབས། ༧རྒྱལ་བ་རིན་པོ་ཆེས་དངོས་ཤུགས་བརྒྱུད་གསུམ་ནས་རྒྱ་ནག་ལ་འབྲེལ་བ་བྱས་ཏེ། པཎ་ཆེན་རིན་པོ་ཆེ་གཅིག་གྱུར་གྱིས་ངོས་འཛིན་ཡོང་ཐབས་གནང་ཡོད་ནའང། རྒྱ་ནག་གིས་ངོས་ལེན་མ་བྱས་སྐོར་ངོ་སྤྲོད་གནང་བ་དང་། རྒྱ་ནག་ཆོས་མེད་སྨྲ་བའི་གཞུང་ཞིག་གིས་སྤྲུལ་སྐུའི་ཡང་སྲིད་སྐོར་ལ་ཐེ་ཇུས་བྱས་ན་འགྲིག་གི་མེད་སྐོར་གསུངས་སོང།

དེ་བཞིན་ཚོགས་གཙོས། པཎ་ཆེན་སྐུ་ཕྲེང་བཅུ་པ་བོད་ལ་བཀའ་དྲིན་ཆེ་སྐོར་དང་། ཡང་སྲིད་ལ་སྐུ་གོང་མའི་མཛད་རྗེས་མཇུག་སྐྱོང་གནང་འཇུག་དགོས་ཀྱི་ཡོད་ནའང་། ད་ལྟ་དེ་འདྲ་བྱུང་མེད་སྐོར། རྒྱ་ནག་གིས་ངོས་འཛིན་བྱས་པའི་པཎ་ཆེན་དེར་བོད་མི་ཚོས་ངོས་ལེན་བྱེད་ཀྱི་མེད་སྐོར། རྒྱལ་ནག་གིས་དྲིལ་བསྒྲགས་རྫུན་མའི་འོག་ཏུ་རྒྱལ་སྤྱིའི་མི་མང་དང་བོད་མི་མང་ཚང་མ་མི་ཚུད་པའི་རེ་བ་ཡོད་སྐོར་གསུངས་སོང་།།

གསར་འགོད་པ་ཆོས་ཉིད་འོད་ཟེར།