ཁུ་བྷ་ཡིས་ཆབ་སྲིད་བཙོན་པ་༥༣ གློད་བཀྲོལ།

ལྷོ་ཨ་མེ་རི་ཁའི་དམར་ཤོག་རྒྱལ་ཁབ་ཁུ་བྷ་ཡིས་ཆབ་སྲིད་བཙོན་པ་༥༣ གློད་བཀྲོལ་བཏང་ཡོད་འདུག

ལྷོ་ཨ་རི་ཁའི་དམར་ཤོག་རྒྱལ་ཁབ་ཁུ་བྷ་ཡིས་གཞུང་དང་ལྟ་བ་མི་མཐུན་པའི་ཆབ་སྲིད་བཙོན་པ་གློད་བཀྲོལ་གྱི་གནས་ཚུལ་དེ་ནི་ཨ་རིའི་དང་ལྷན་དུ་ཟླ་འདིའི་ཕྱི་ཚེས་༢༡-༢༢ བར། ཁུ་བྷ་ཡི་རྒྱལ་ས་ཧ་བཱ་ན་རུ་གྲང་དམག་སྐབས་ནས་ད་བར་གྱི་འཁོན་འཛིན་དོར་ཏེ། མཛའ་འབྲེལ་སླར་གསོ་ཡོང་བའི་གྲོས་མོས་ཞིག་འཚོག་རྒྱུ་ཡིན་པའི་སྐབས་ཐོན་ཡོད་པ་དང། ཨ་རིའི་སྲིད་གཞུང་གི་སྐུ་ཚབ་ལྕམ་མེ་རི་ཧ་ཧྥི་(Marie Harf) ཡིས་“ང་ཚོས་བཟང་ཕྱོགས་ཀྱི་འགྱུར་ལྡོག་དེར་དགའ་བསུ་བྱེད་བཞིན་ཡོད་ལ། ཁུ་བྷ་ཡི་སྲིད་གཞུང་གིས་ཁས་ལེན་བྱས་པ་བཞིན་ལག་བསྟར་གནང་པར་དགའ་ཚོར་ཆེན་པོ་བྱུང་”ཅེས་བརྗོད་འདུག

ཟླ་འདིའི་ཕྱི་ཚེས་༡༢ རེས་གཟའ་ཟླ་བའི་ཉིན་ཨ་རིའི་ཁྲིམས་བཟོ་ལས་ཁུངས་ཁ་ཤས་ཀྱིས་ཨ་རིའི་ཕྱི་སྲིད་བློན་ཆེན་གྱི་མཚན་རྟགས་འཁོད་པའི་ཡིག་ཐོག་ཏུ། ཁུ་བྷ་ཡིས་གློད་བཀྲོལ་བཏང་བའི་ཆབ་སྲིད་བཙོན་པ་ ༥༣ ཡི་མིང་ཐོ་ཕྱིར་བསྒྲགས་བྱས་ཡོད་པ་མ་ཟད། བཙོན་པ་རྣམས་ཁུ་བྷའི་ནང་ཆབ་སྲིད་དང་སྤྱི་ཚོགས་བསྐྱར་གསོའི་སླད་བཙོན་འཇུག་བྱས་པ་ཤ་སྟག་ཡིན་སྐོར་འགྲེལ་བརྗོད་བྱས་འདུག

དེ་བཞིན་ཁུ་བྷའི་གཞུང་དང་ལྟ་བ་མི་མཐུན་པའི་འགྲོ་བ་མིའི་ཐོབ་ཐང་ཚོགས་པ་ཁག་གིས་བརྗོད་པ་ལྟར་ན། བཙོན་པ་རྣམས་ཆ་རྐྱེན་ཡོད་པའི་ཐོག་ནས་གློད་བཀྲོལ་བཏང་པ་ཞིག་ཡིན་ཞིང་། ཁུ་བྷ་ཡི་སྲིད་གཞུང་གིས་མ་འོངས་པར་གློད་བཀྲོལ་བཏང་པ་རྣམས་བསྐྱར་དུ་འཛིན་བཟུང་བྱེད་སྲིད་ལ། ཁུ་བྷ་ཡིས་ད་དུང་ཡང་ཆབ་སྲིད་བཙོན་པ་༦༠ ལྷག་བཙོན་འཇུག་བྱེད་བཞིན་པ་རེད།

ཡིནའང་ཨ་རིའི་གཞུང་ཕྱོགས་ནས་འདས་ལོའི་ཕྱི་ཟླ་༡༢ ཚེས་༡༧ ཉིན་ཁུ་བྷ་ལྷན་དུ་འབྲེལ་བ་སླར་གསོའི་གྲོས་མོལ་སྐབས་ཁས་ལེན་བྱས་པ་བཞིན། ཁུ་བྷ་ཡི་སོ་མྱུལ་ལག་དམར་བ་གསུམ་ཆ་རྐྱེན་གང་ཡང་མེད་པར་རང་ཡུལ་དུ་ཕྱིར་སློག་བྱས་ཡོད་འདུག

ཐེངས་འདིར་ཁུ་བྷ་ཡིས་ཆབ་སྲིད་བཙོན་པ་གློད་བཀྲོལ་བཏང་པ་ལས་ཨ་རི་མཉམ་དུ་འབྲེལ་བ་སླར་གསོ་བྱེད་འདོད་ཆེན་པོ་ཡོད་པའི་རྣམ་འགྱུར་བསྟན་པ་ཞིག་ཡིན་པ་དང་། དམར་ཤོག་རྒྱལ་ཁབ་ཀྱི་སྲིད་འཛིན་ཁེ་སོ་ཏྲོ་(Raul Castro) ཡིིས་ཨ་རི་དང་ཆབ་སྲིད་ཕུད་པའི་གནད་དོན་གཞན་གང་གི་ཐོག་ཏུའང་གྲོས་བསྡུར་བྱེད་འདོད་ཡོད་ཅེས་བརྗོད་ཡོད་འདུག།

གསར་འགོད་པ་བསྟན་འཛིན་ཟླ་བ།