འཛམ་གླིང་འཁྲུག་ཆེན་གཉིས་པའི་སྐབས་ཀྱི་ཉི་ཧོང་གི་བྱས་ཉེས་ལ་འགྱོད་བཤགས།

ཉི་ཧོང་གི་སྲིད་བློན་ཨ་བྷི་ཡིས་བདུན་ཕྲག་གཅིག་རིང་ཨ་རིར་རྒྱལ་དོན་འཚམས་གཟིགས་གནང་བཞིན་པའི་སྐབས་ཀྱི་རེས་གཟའ་ལྷག་པའི་ཉིན། ཨ་རིའི་གྲོས་ཚོགས་སུ་གཏམ་བཤད་བྱས་ཡོད་པ་དང་། ཁོང་གིས་འཛམ་གླིང་འཁྲུག་ཆེན་གཉིས་པའི་སྐབས་ཀྱི་ཉི་ཧོང་གི་བྱས་ཉེས་ལ་འགྱོད་བཤགས་ཤུགས་དྲག་ཞུས།

ཨ་བྷི་ནི་ཨ་རིའི་གྲོས་ཚོགས་སུ་གཏམ་བཤད་གནང་མཁན་གྱི་ཉི་ཧོང་གི་སྲིད་བློན་ཐོག་མ་ཆགས་ཡོད་པ་དང་། ཁོང་གིས་གྲོས་ཚོགས་སུ་གཏམ་བཤད་སྐབས་དབྱིན་སྐད་སྤྱད་དེ། ཊོ་ཁིའོ་ཡིས་འཛམ་གླིང་འཁྲུག་ཆེན་གཉིས་པའི་སྐབས་ཉི་ཧོང་གིས་ཨེ་ཤི་ཡ་མི་མང་གི་ཐོག་ཏུ་འདྲེན་པའི་སྡུག་བསྔལ་ལ་སྣང་ཆུང་གཏན་ནས་གཏོང་མི་སྲིད་སྐོར་བརྗོད་ཡོད་ནའང་། ཁོང་གིས་དངོས་སུ་དགོངས་སེལ་མ་ཞུས་པར། སྲིད་བློན་སྔ་མ་རྣམས་ཀྱི་བཤད་སྟངས་བསྐྱར་བརྗོད་གནང་ཡོད།

ཐེངས་འདིའི་ལོ་རྒྱུས་རང་བཞིན་ལྡན་པའི་གྲོས་ཚོགས་ཀྱི་གཏམ་བཤད་དེའི་ནང་། སྲིད་བློན་ཨ་བྷི་ཡིས་ཚོགས་ཞུགས་པ་རྣམས་ལ་ཐུགས་རྗེ་ཆེ་ཞེས་ཞུས་པ་དང་འབྲེལ། ཨ་རི་དང་ཉི་ཧོང་གི་འབྲེལ་ལམ་སྲ་བརྟན་རྒྱུན་འཛིན་དང་འཁྲུག་ཆེན་གཉིས་པའི་སྐབས་འདས་གྲོངས་སུ་གྱུར་པའི་ཨ་རི་བ་རྣམས་ཀྱི་ཆེད་དུ་མྱ་ངན་གུས་འདུད་ཞུས་པ་དང་། ཨ་རི་དང་ཉི་ཧོང་ཕྱོགས་གཉིས་ནས་ད་ལོར་འཁྲུག་ཆེན་གཉིས་པ་མཇུག་བསྒྲིལ་ཏེ་ལོ་༧༠ འཁོར་བའི་དུས་དྲན་སྲུང་བརྩི་ཞུ་འཆར་ཡོད་སྐོར་བརྗོད་ཡོད་པ་རེད།

ཨ་རིར་བདུན་ཕྲག་གཅིག་རིང་དངོས་སུ་འཚམས་གཟིགས་གནང་བཞིན་པའི་སྲིད་བློན་ཨ་བྷི་ཡིས་ཨ་རི་དང་ཉི་ཧོང་གི་ད་ལྟའི་འབྲེལ་ལམ་ནི། འདས་པའི་དུས་ཚོད་ནམ་ཞིག་དང་བསྡུར་ནའང་ཧ་ཅང་འགྱུར་མེད་སྲ་བརྟན་ཡིན་ཞིང་། ཊོ་ཁིའོ་དང་ཨ་རི་གཉིས་གཡུལ་ས་གཅིག་གི་ཐོག་ཏུ་ལངས་ཏེ་སའི་གོ་ལའི་ཁ་གཏད་ལ་གདོང་ལེན་བྱ་རྒྱུ་ཡིན་ཞེས་བརྗོད་འདུག

ཨ་རི་དང་ཉི་ཧོང་རྒྱལ་ཁབ་གཉིས་ཀྱི་འགོ་ཁྲིད་ཀྱིས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་༡༢ ལས་གྲུབ་པའི་ཚོང་འབྲེལ་གྲོས་འཆར་ཞིག་ལ་ཁས་ལེན་བྱས་ཏེ། ཞི་བདེ་རྒྱ་མཚོ་ལས་བརྒལ་བའི་ཚོང་འབྲེལ་གྲོས་ཆོད་བཞག་ཐུབ་པ་བྱུང་ཡོད་འདུག ཨ་རིའི་སྲིད་འཛིན་ཨོ་བྷ་མས་གྲོས་ཆོད་དེ་བཞག་པར་རྒྱལ་ཁབ་གཉིས་ཀའི་ནང་འགལ་རྐྱེན་འཕྲད་ཡོད་པའི་ཁས་ལེན་བྱས་ཡོད་པ་དང་། གྲོས་ཆོད་དེ་ནི་ཨ་བྷ་མའི་སྲིད་འཛིན་གཉིས་ལས་ཁུར་སྐབས་ཀྱི་ལས་རིམ་ནང་གི་རྨང་རྡོ་ལྟ་བུ་ཞིག་ཏུ་གྱུར་ཡོད་པ་རེད།

ཨ་རི་དང་ཉི་ཧོང་རྒྱལ་ཁབ་གཉིས་ཀས་སྲུང་སྐྱོབ་ལས་དོན་གྱི་མཉམ་འབྲེལ་སྟོབས་ཤུགས་ཆེ་རུ་གཏོང་རྒྱུར་མོས་མཐུན་བྱས་ཡོད་ཅིང་། དེ་ནི་རྒྱ་ནག་གི་སྟོབས་ཤུགས་མུ་མཐུད་ཆེ་རུ་འགྲོ་བཞིན་པར་ཆེད་དུ་ལན་འདེབས་བྱས་པ་ཡིན་པའི་ངོས་འཛིན་རྒྱ་ཁྱབ་བྱེད་བཞིན་ཡོད།།

གསར་འགོད་པ་ཏྲེ་ཧོར་ཐུབ་བསྟན།