ཨུ་རུ་སུས་རྒྱལ་ཚོགས་ཀྱི་གྲོས་གཞི་ལ་ངོ་རྒོལ་བྱས།

མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཚོགས་སྟེང་མཱ་ལེ་ཞི་ཡའི་གནམ་གྲུ་HM17 རྟགས་ཅན་གྱི་མཁའ་སྐྱོན་ཐད་རྒྱལ་སྤྱིའི་ནག་ཉེས་ཁྲིམས་ར་འཚོག་རྒྱུའི་གྲོས་གཞི་ལ་ཨུ་རུ་སུས་རྒྱབ་སྐྱོར་བྱས་མེད་པ་དང་། རྒྱ་ནག་ཚུད་པའི་རྒྱལ་ཁབ་གསུམ་གྱིས་འོས་སྟོང་པ་འཕེན་ཡོད་འདུག

མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ཚོགས་མི་རྒྱལ་ཁབ་༡༥ ཡོད་པའི་ནང་གི་༡༡ གིས་མཱ་ལེ་ཞི་ཡའི་གནམ་གྲུ་རྟགས་ཅན་གྱི་མཁའ་སྐྱོན་ཐད་རྒྱལ་སྤྱིའི་ནག་ཉེས་ཁྲིམས་ར་འཚོག་རྒྱུའི་གྲོས་གཞི་ལ་རྒྱབ་སྐྱོར་བྱས་ཡོད་པ་དང་། རྒྱ་ནག་ཚུད་པའི་ཨན་གྷི་ལཱ་དང་ཝན་ཛུ་ལཱ་རྒྱལ་ཁབ་གསུམ་གྱིས་འོས་སྟོང་པ་འཕེན་ཡོད་འདུག་ལ། ཨུ་རུ་སུས་གྲོས་གཞི་དེར་ངོ་རྒོལ་བྱས་ཡོད་པ་རེད།

ལོ་སྔོན་མའི་ཕྱི་ཟླ་༧ པའི་ནང་ནེ་རྡི་ལན་ཌི་ཡི་རྒྱལ་ས་ཨམ་སི་ཌར་ནས་མཱ་ལེ་ཞི་ཡའི་རྒྱལ་ས་ལུམ་པུ་རུ་འཕུར་བའི་མཱ་ལེ་ཞི་ཡའི་འགྲུལ་བསྐྱོད་གནམ་གྲུ་MH17 རྟགས་ཅན་ཡུག་རེན་གྱི་མངའ་ཁོངས་སུ་མཁའ་སྐྱོན་བྱུང་སྟེ། གནམ་གྲུའི་ནང་དུ་༢༩༨ ཡོད་པ་ཆ་ཚང་གི་ཚེ་སྲོག་ཤོར་ཡོད་ཅིང་། ནུབ་ཕྱོགས་རྒྱལ་ཁབ་ཁག་གིས་མཁའ་སྐྱོན་དེ་ནི་ཡུག་རེན་ཤར་ཕྱོགས་ཨུ་རུ་སུའི་ཕྱོགས་གཏོགས་ཀྱི་དྲག་སྤྱོད་པས། ཨུ་རུ་སུས་མཁོ་སྤྲོད་བྱས་པའི་མེ་སྒྱོགས་ཀྱིས་གཏོར་སྐྱོན་བཏང་པ་ཡིན་པའི་བདེན་དཔང་ཡོད་སྐོར་བརྗོད་ཡོད་ཀྱང་། ཡུག་རེན་ཤོག་ཕྱོགས་ཨུ་རུ་སུའི་ཕྱོགས་གཏོགས་ཀྱིས་ཁས་ལེན་བྱས་མེད།

མཱ་ལེ་ཞི་ཡའི་གཞུང་གིས་རྒྱལ་སྤྱིའི་ཁྲིམས་ཐོག་ནས་ཐེངས་དེའི་མཁའ་སྐྱོན་གྱི་འགན་ཁུར་མཁན་སུ་ཡིན་བརྩད་གཅོད་དགོས་པའི་རེ་སྐུལ་ཡང་ཡང་བྱས་ཡོད་པ་དང་། མཱ་ལེ་ཞི་ཡའི་རེ་འདུན་དེར་ནེ་རྡི་ལན་ཌར་དང་ཡུག་རེན། བྷེལ་རྗམ། ཨོ་སུ་ཁྲུ་ལ་ཡ་བཅས་ཀྱིས་རྒྱབ་སྐྱོར་བྱས་ཡོད་པ་རེད།

ཨུ་རུ་སུའི་ཕྱོགས་ནས་མཁའ་སྐྱོན་དེ་ནི་ཨུ་རུ་སུའི་ཕྱོགས་གཏོགས་ཡུག་རེན་གྱི་དྲག་སྤྱོད་གྱེན་ལངས་ཤོག་ཁག་གིས་བཟོས་པ་ཡིན་པའི་ཁས་ལེན་བྱས་མེད་པ་དང་། དེ་ལས་ལྡོག་སྟེ་ཡུག་རེན་སྲིད་གཞུང་གིས་བྱས་ཉེས་ཡིན་སྐོར་བརྗོད་ཡོད།།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།