སྤྲུལ་སྐུ་བསྟན་འཛིན་བདེ་ལེགས་ཀྱི་ཞབས་རིམ་བཀག་འགོག

ཕྱི་ཟླ་༦ཚེས་༢ནས་བཟུང་། རྒྱ་ནག་གི་བཙོན་ཁང་དུ་ཡོད་པའི་སྤྲུལ་སྐུ་བསྟན་འཛིན་བདེ་ལེགས་ཀྱི་གདན་ས། ཁམས་ཉག་ཆུ་རྫོང་། ནཱ་ལེནྜ་ཐེག་ཆེན་བྱང་ཆུབ་ཆོས་གླིང་དུ། མཁན་སྤྲུལ་སེར་སྐྱ་འདུ་འཛོམས་ཀྱིས་སྤྲུལ་སྐུའི་ཆེད་དུ་ཞབས་རིམ་གསོག་སྒྲུབ་ཞུ་ཡི་ཡོད་ནའང་། རྒྱ་ནག་གཞུང་གིས་བཀག་འགོག་བྱས་ཡོད་འདུག

སྤྲུལ་སྐུ་བསྟན་འཛིན་བདེ་ལེགས་ནི་༢༠༠༢ ལོའི་ཕྱི་ཟླ་༤ པའི་ཚེས་༧ ཉིན་རྒྱ་གཞུང་གིས་འཇུ་བཟུང་བྱས་པ་དང་། ༢༠༠༢ལོའི་ཕྱི་ཟླ་༡༢ པའི་ཚེས་༢ཉིན་དར་རྩེ་མདོ་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་ལ་འབར་རྫས་འགད་གཏོར་གྱི་ཉེས་མིང་འོག་ཁྲིམས་བཅད་ཡོད་པ་རེད།

དེ་ཡང་སེར་སྨད་བློ་དགས་གནས་ཚུལ་མཁོ་སྤྲོད་གནང་བའི་ནང་འཁོད་དོན། ཕྱི་ལོ་༢༠༡༤ ཕྱི་ཟླ་༦ ཚེས་༢ ནས་བཟུང་།སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གདན་ས། ཁམས་ནཱ་ལེནྜ་ཐེག་ཆེན་བྱང་ཆུབ་ཆོས་གླིང་དུ། མཁན་པོ་དང་མཁན་ཟུར།དགེ་བཤེས། བླ་སྤྲུལ། དགེ་བསྐོས།བོད་རིགས་འགོ་ཁྲིད།མི་མང་བཅས་ལྷན་འཛོམས་ཀྱིས།སྤྲུལ་སྐའི་ཞབས་རིམ་ཉིན་མང་པོར་གསོག་བསྒྲུབ་བྱེད་རྩིས་ཡོད་ཀྱང་། ཉིན་གཅིག་མ་གཏོགས་འདོན་མ་བཅུག་པར་ཉག་ཆུ་རྫོང་གི་འགོ་ཁྲིད་ནས་ཡུལ་ཚོའི་འགོ་ཁྲིད་ལ་ཁ་པར་བཏང་སྟེ་བཙན་བཀག་བྱས་འདུགད་དུང་འགོ་ཁྲིད་ཚོས་འབྲེལ་ཡོད་དགོན་པ་དང་ཡུལ་མི་གནད་ཡོད་མི་སྣ་མང་པོ་ཞིག་ལ་སྡིགས་ར་དང་སྦྲགས།གནས་ལུགས་ཅི་ཡང་མ་བཤད་པར་གཤེ་གཤེ་མང་པོ་བཏང་འདུག

ས་གནས་དགེ་འདུན་པ་དང་མང་ཚོགས་རྣམས་སེམས་ཤུགས་སྔར་ལྷག་ཆེར་བསྐྱེད་ཀྱིས། དུས་རྒྱུན་ལྐོག་ནས་རིན་པོ་ཆེ་གཟིམ་ཤག་ཉམས་གསོ་ཅུང་ཟད་བྱེད་ཀྱི་ཡོད་ཀྱང་། ད་ལན་ལོ་མང་རིང་རྒྱ་གཞུང་གི་བཙན་བཀའ་འོག་ཉམས་ཆག་ཆེན་པོར་ཕྱིན་པའི་སྤྲུལ་སྐུ་རིན་པོ་ཆེ་མཆོག་གི་གཟིམས་ཤག་ཉམས་གསོ་བྱེད་བཞིན་པ་རེད་འདུགདེར་རྒྱ་གཞུང་གིས་དངོས་ལྐོག་ཅི་རིགས་ནས་བཀག་འགོག་བྱ་རྒྱུར་སྔོན་དཔག་བྱེད་བཞིན་ཡོད་མོད། རྒྱ་གཞུང་གི་སྡིགས་ར་ལ་ཇི་མི་སྙམ་པར་མང་ཚོགས་ཀྱིས་བློ་བརྟན་འགྱུར་མེད་ཀྱིས་གཟིམས་ཤག་བསྐྱར་གསོའི་ཨར་ལས་འགོ་བཙུགས་བྱས་ཏེ་རིན་པོ་ཆེེ་ཕེབས་རྒྱུར་རེ་སྒུག་བྱེད་བཞིན་ཡོད་པ་རེད།

ཕྱི་ལོ་༢༠༡༤སྤྱི་ཟླ་༤ཚེས་༢༨ཉིན་གྱི་སྔ་དྲོར།ལི་ཐང་ཨོ་ཐོག་གི་མི་སྐྱ་ཨ་སྐལ་རྡོ་རྗེ། ངག་དབང་བློ་བཟང་།ཨ་ཕ་ནོར་བུ།བྱང་ཤར་ཀོམ་འབེ་བཅས་མི་གྲངས་བཞི། སྤྲུལ་སྐུ་བསྟན་འཛིན་བདེ་ལེགས་དང་འབྲེལ་བའི་ཞུ་སྐུལ་གྱི་ཡིག་ཆ་ཞིག རྫོང་དཔོན་བརྒྱུད་དེ་ཁུལ་དང་ཞིང་ཆེན། དབུས་སོགས་སུ་རིམ་པར་སྤྲོད་དུ་སོང་ཡང་། རྫོང་དུ་སླེབས་ལ་ཉེ་བའི་སར་ཉེན་རྟོག་པས་ལམ་སྒུག་རིམ་པ་མང་པོ་བྱས་ཏེ་ཁོང་བཞི་པོ་འཇུ་བཟུང་བྱས་ནས།འདྲི་རྟོག་དང་འབྲེལ་བཀག་ཉར་བྱས་པ་དང་། ཉིན་བདུན་གྱི་རྗེས་ཏེ། ༥ཚེས་༤ལ་ཕྱིར་མངགས་འདུག ཁོང་བཞི་ལ་མང་ཚོགས་ལ་སྐད་ཆ་འདྲ་མིན་བཤད་མི་ཆོག་ལ། བཙོན་ཁང་དུ་བཅུག་པའང་བཤད་མི་ཆོག་ཟེར། གློད་གྲོལ་དགོས་ཟེར་གྱི་མང་ཚོགས་ལ་ཁོང་ཚོར་སློབ་གསོ་སྤྲད་ཀྱི་ཡོད།ཁྱེད་ཚོས་སེམས་ཁྲལ་བྱེད་མི་དགོས་ཞེས་བཤད་འདུག

དཀའ་ངལ་དེ་དག་གི་བརྒྱུད་རིམ་ནི།

ཕྱི་ལོ་༢༠༠༩སྤྱི་ཟླ་༡༢པའི་ཚེས་༠༥ཡི་སྔོན་ནས་རིན་པོ་ཆེའི་ཞལ་སློབ་མི་གྲངས་བཞི་བཅུ་སྐོར་གཅིག་རིན་པོ་ཆེར་ཐུག་འཕྲད་དུ་བཅར་བ་རྣམས་འཇུ་བཟུང་བཀག་ཉར་བྱས། ཚེས་ལྔ་ཡི་ཕྱི་དྲོར་མགོ་ལོག་གི་ས་གནས་ཉི་ཤཱིས་ལུང་པའི་ཁར་བོད་མི་བདུན་བཅུ་སྐོར་གྱིས་ལམ་ཆེན་ཐོག་ཉལ་ནས་གོང་ཞུའི་རེ་འབོད་བྱས།

ཚེས་དྲུག་ཉིན།སྔ་དྲོར་ཞི་རྒོལ་བ་མི་གྲངས་དགུ་བཅུ་ལྷག་དགེ་བཤེས་ལུང་པ།ཞེས་པའི་ས་ཆ་དེར་མི་སྤྱོད་ལས་འདས་པའི་རྡུང་རྡེག་གནར་གཅོད་ཚད་ལས་བརྒལ་བ་བཏང་ཞིང་། དེའི་ཕྱི་དྲོར་ཨོ་ཐོག་ཧོ་ལུང་ཤཱང་གི་ཉེ་འགྲམ་གྱི་ལམ་ཆེན་སྟེང་ཞི་རྒོལ་བྱེད་མཁན་རྒན་ཁོག་ལོ་ན་༨༠སྐོར་དང་། ཕྲུ་གུ་ལོོ་ན་བདུན་བརྒྱད་ཡས་མས་ཀྱིས་གྲུབ་པའི་མི་གྲངས་བཞི་བརྒྱ་ལྷག་གིས་མཚན་གང་ལག་གཉིས་ཐལ་མོ་སྦྱར་ཏེ། ཡུལ་ཚོའི་སྲིད་གཞུང་ལ་རིན་པོ་ཆེ་གློད་གྲོལ་གྱི་རེ་སྐུལ་ཞུས་ཡོད།

ཚེས་བདུན་དང་བརྒྱད་གཉིས།རིམ་བཞིན་གནས་ཚུལ་དེ་ཛ་དྲག་ཏུ་ཕྱིན་ཏེ། གཞུང་ལམ་བརྒྱུད་ནས་ཉག་ཆུང་རྫོང་དུ་ཞི་བའི་རེ་འབོད་ཆེད།རྒྱང་སྐྱོད་བྱེད་མཁན་གྱི་མི་ཚོགས་མང་དུ་སོང་ཡོད་ཅིང་། དམག་མིས་སྒོ་གང་ས་ནས་འགོག་ཐབས་བྱས་རུང་།ཞི་རྒོལ་བ་རྣམས་རིའི་མགོ་དང་ཤིང་ནགས་བརྒྱུད་དེ་ཤོར་སོང་བ་དང་། སྡེ་པ་དང་ལུང་པ་འདྲ་མིན་མང་པོ་ནས་ཡོང་བའི་ཧ་ཅང་གི་བོད་མི་ཕོན་ཆེན་ཉག་ཆུ་རྫོང་གི་མཐིལ་དུ་སླེབས་ཡོད་པ་དེ་ཚོ་ནི་ཕལ་ཆེར་ཕོ་གཞོན་མོ་གཞོན་རྐྱང་རྐྱང་ཡིན་སྟབས། དམག་མི་དང་ཉེན་རྟོག་པས་དྲག་རྡུང་གིས་རྐང་ལག་བཅག་པ་དང་ལམ་ཆེན་སྟེང་འཁྱིལ་བའི་མི་ཁྲག་རྣམས་རླངས་འཁོར་འཁྲུ་བྱེད་ཀྱི་ཆུས་ལམ་ཐོག་ཆུ་བཤལ་བཏང་དགོས་བྱུང་ཡོད། ཞི་རྒོལ་བ་ཚོས་སྟོད་ཐུང་དང་དངུལ་ཁུགལུས་ལ་ཡོད་པའི་གཡུ་བྱུ་རུ་ཆུང་ཚགས་ཡོད་རིགས་ཀྱང་བཅགས་ནས་གང་བྱུང་དུ་གཏོར་ཡོད་པ་རྣམས་རྒྱ་བོད་གཉིས་ཀའི་ཕྱོགས་ནས་དོ་སྣང་ཙམ་ཡང་བྱེད་ངེས་མི་འདུག་ཟེར།

ཚེས་དགུ་ཉིན།རོབ་རྩིས་ལྟར་ན་དགེ་བཤེས་ལུང་པ་ཞེས་པར་ཞི་རྒོལ་བ་མི་གྲངས་དྲུག་བརྒྱ་ལྷག་ཡོད་པ་དང་། ཨོ་ཐོག་གི་ཧོ་ལུང་ཡུལ་ཚོའི་བོད་མི་སུམ་བརྒྱ་ལྷག དེ་བཞིན་ཉག་ཆུ་རྫོང་གི་ལྟེ་བར་ཞི་བའི་རེ་འབོད་བྱེད་མི་སྟོང་ཕྲག་ལྔ་ནས་དྲུག་གི་བར་དུ་རོབ་རྩིས་བྱེད་ཆོགཚོང་ཁང་ཡོངས་རྫོགས་སྒོ་རྒྱབ་ནས་བོད་མི་ཞི་རྒོལ་བ་ཚོས་ཟས་མི་རག་པའི་ཐོགདྲག་དམག་གོས་ནག་ཅན་ཕོན་ཆེན་འབྱོར་ནས། ས་ཁུལ་གང་སར་རྒྱང་སྒྲགས་ཐོག་ནས་སྡིགས་ར་བསྐུལ། བོད་མི་ཚོས་ཆོད་སེམས་བརྟན་པོའི་ཐོག་ནས་རིན་པོ་ཆེར་དྲང་བདེན་གྱི་ཐག་ཆོད་ཅིག་མ་ཡོང་བར་དུ་ཕྱིར་ལོག་བྱེད་ཀྱི་མིན་ཟེར།

ཕྱི་ལོ་༢༠༡༠ཕྱི་ཟླ་༨པའི་ཚེས་༡༢ཉིན་གྱི་སྔ་དྲོ་ཆོུད་༡༡གི་རྗེས་སུ་ལི་ཐང་མཐིལ་གྱི་གྲོང་ཁྱེར་ནང་ཁྲུང་ཁྲུང་དཀར་མོའི་ཁྲོམ་ར་ནས་འགོ་འཛུགས་ཀྱིས་ཚལ་ཁྲོམ་རའི་བར་དུ། ལི་ཐང་མཚན་ཉིད་གྲྭ་ཚང་གི་གྲྭ་པ་དང་ལི་ཐང་ཨོ་ཐོག་ནས་ཡིན་པའི་གྲྭ་ས་དམར་བློ་སྦོ་ཞེས་པ་ལོ་༢༡ཅན་དང་། གྲྭ་སྐལ་བཟང་དགེ་འདུན་ཞེས་པ་ལོ་༡༦ཅན་གཉིས་ཀྱིས་ལག་ཏུ་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་ཐོགས་ཏེ། རྒྱ་གཞུང་ལ་ངོ་རྒོལ་གྱི་སྐད་འབོད་བྱས་ཡོད།

ཕྱི་ལོ་༢༠༡༡ལོའི་ཕྱི་ཟླ་༢པའི་ཚེས་༡༤དགོང་མོ་མཚན་གྱི་ཆུ་ཚོད་༡༠བའི་ཐོགལི་ཐང་གཡོན་རུ་ཧོར་རྙིང་སྡེ་བའི་གྲྭ་ཟུར་ཚེ་ཆོས་ལགས། ལི་ཐང་གི་ཧོར་རྙིང་འབྲོག་སྡེའི་བློ་ཟླ་ཚང་ཞེས་པའི་འབྲོག་པའི་ཁྱིམ་ཚང་ཞིག་ཏུ། རྒྱ་ནག་གི་དམག་མིས་ལྐོག་བཟུང་བཙན་འཁྲིད་བྱས་ཡོད།

ཕྱི་ལོ་༢༠༡༢ཀྱི་ལོ་འགོར་ལི་ཐང་རྫོང་གི་རྫོང་དཔོན་གྱིས། ༢༠༡༢ལོ་༨/༡དམག་གི་དུས་ཆེན་སྲུང་བརྩི་དང་འབྲེལ་ལི་ཐང་རྟ་རྒྱུག་དུས་ཆེན་སྔར་ལྟར་སྐྱར་གསོ་བྱེད་ཀྱི་ཡིན། སྐབས་དེ་དུས་གནས་ཚུལ་བཟོ་ངེས་སུ་ཡོད་རུང་ས་ཆ་དེ་རང་དུ་རྩ་མེད་གཏོང་གི་ཡིན།ཀྲུང་དབྱང་ནས་ཀྱང་བཀའ་ཡོད་ཚུལ་གྱིས་སྡིགས་རའི་ཁྱབ་བསྒྲགས་ཤུགས་ཆེར་བྱས། དེར་བརྟེན།༢༠༡༢སྤྱི་ཟླ་༤ཚེས་༢༠རེ་གཟའ་སྤ་སངས་གི་དགོང་མོ། ལི་ཐང་རྫོང་གི་གྲོང་ཆེན་མཐིལ་དུ་བོད་དོན་སྐོར་གྱི་ཡིག་ཆ་ཤུགས་ཆེར་བཀྲམ་པ་དང་དམག་གིས་དམ་དྲག་ཤུགས་ཆེན་བྱེད་བཞིན་ཡོད་འདུག་ལ།

༢༠༡༣ལོའི་སྤྱི་ཟླ་༢ཚེས་༡༡བོད་ལུགས་ལོ་སར་གྱི་གནམ་གང་དགོང་མོར།ལི་ཐང་ཨོ་ཐོག་སྨད་ཐལ་མའི་མི་མང་སྤྱི་ཁང་མེར་བསྲེགས་ཡོད་པ་དང་། སྤྱི་ཁང་དེ་ནི་གནས་དུས་དང་བསྟུན་ནས་རིག་གནས་འཆད་ཁྲིད་དང་མཎི་གསོ་བསྒྲུབ་སོགས་དང་། དུས་ཚིགས་ངེས་ཅན་ལ་བོད་ཀྱི་ཟློས་གར་ཁྲབ་ས་སོགས་བྱེད་ཀྱིན་ཡོད། དོན་དངོས་ནི། རྒྱ་གཞུང་འབྲེལ་ཡོད་པས་ལོ་སར་ཚེས་༡ཉིན་ཆོས་ཕྱོགས་ཀྱི་མཛད་སྒོ་ཆེན་པོ་ཞིག་བྱེད་པར་དོགས་འདྲོགས་བྱས་པས་རྐྱེན་གྱིས་རེད།།