རྒྱ་ནག་ཐའེ་ཅིན་དུ་འབར་འགད་ཤུགས་ཆེན་བྱུང་སྟེ་མི་༡༧ བསད།

ཁ་སང་མཚན་མོར་རྒྱ་ནག་གི་གྲོང་ཁྱེར་ཐའེ་ཅིན་དུ་ཉེན་ཚབས་ཅན་གྱི་དངོས་ཟོག་འབར་འགད་ཀྱི་དོན་རྐྱེན་བྱུང་སྟེ། ཉུང་མཐཪ་ཡང་མི་༡༧ རྐྱེན་ལམ་དུ་བཏང་ཡོད་པ་དང་། མི་བརྒྱ་ཕྲག་འགར་རྨས་སྐྱོན་བཟོས་ཡོད་འདུག

ཕྱི་ཟླ་༨ པའི་ཚེས་༡༢ ཉིན་གྱི་མཚན་མོའི་ཆུ་ཚུད་༡༡ དང་སྐར་མ་༣༠ ཙམ་ལ། རྒྱ་ནག་བྱང་ཕྱོགས་ཀྱི་གྲུ་ཁའི་གྲོང་ཁྱེར་ཐའེ་ཅིན་དུ་ཡོད་པའི་རྒྱལ་སྤྱིའི་དངོས་ཟོག་སྐྱེལ་འདྲེན་ལྟེ་གནས་ས་ཁུལ། རུན་ཧེ་དངོས་ཟོག་སྐྱེལ་འདྲེན་བཟོ་གྲྭའི་ཉེན་ཚབས་ཅན་གྱི་དངོས་ཟོག་མཛོད་ཁང་ནང་སྔ་རྗེས་སུ་དྲག་ཤུགས་ཅན་གྱི་འབར་འགད་ཐེངས་གཉིས་བྱུང་སྟེ། ད་ལྟའི་ཆར་ཤེས་རྟོགས་བྱུང་བ་ལྟར་ན། ཡང་མཐར་ཡང་མི་༡༧ རྐྱེན་ལམ་དུ་བཏང་ཡོད་པ་དང་། མི་༤༠༠ ལྷག་རྨས་ཡོད་པའི་ནང་། མི་༣༢ ཀྱི་རྨས་སྐྱོན་ཛ་དྲག་ཡིན་པ་མ་ཟད། མེ་གསོད་རུ་ཁག་གི་མི་སྣ་༣༠ ལྷག་མེ་གསོད་ལས་དོན་ཁྲོད་བོར་བརླག་ཏུ་སོང་ཡོད་འདུག

ཐེངས་དེའི་འབར་འགད་ཀྱིས་ཉེ་འཁོར་གྱི་ཁང་རྩེག་དང་གཞུང་ལམ། ཡུལ་མིའི་སྡོད་ཁང་སོགས་མང་པོར་གནོད་སྐྱོན་ཐེབས་ཡོད་པ་མ་ཟད། རྒྱ་ནག་ས་ཡོམ་ལས་ཁུངས་ཀྱིས་བརྗོད་པ་ལྟར་ན། འབར་འགད་ཐེངས་དང་པོའི་སྐབས་ཀྱི་དྲག་ཤུགས་དེ་ས་ཡོམ་གྱི་ཤུགས་ཚད་རིམ་པ་༢།༣དང་མཚུངས་པ་དང་། ཐེངས་གཉིས་པ་དེ་ས་ཡོམ་གྱི་ཤུགས་ཚད་རིམ་པ་༢།༩དང་ཆེ་ཆུང་མཉམ་པ་ཡོད་འདུག དངོས་ཟོག་སྐྱེལ་འདྲེན་མཛོད་ཁང་གི་ནང་དུ་རྫས་འགྱུར་གྱི་ཅ་དངོས་མང་པོ་ཡོད་པ་དང་། ས་གནས་སུ་རླུང་འཚུབ་དྲག་པོ་བྱུང་ན་ད་དུང་ཡང་མུ་མཐུད་དུ་འབར་འགད་ཀྱི་ཉེན་ཁ་ཡོད་སྟབས། ཉེན་རྟོག་པ་དང་མེ་གསོད་རུ་ཁག་གིས་མེ་གསོད་ལས་དོན་ལས་ཉེན་སྐྱོབ་དང་འཚོལ་ཞིབ་ཀྱི་ལས་ཀ་གལ་ཆེར་བརྩིས་ཏེ། རྫས་འགྱུར་གྱི་དངོས་ཟོག་ཡོངས་རྫོགས་མེས་འཚིག་བཅུག་བཞིན་པ་རེད།

མིག་སྔར་ད་དུང་འབར་འགད་དེའི་བྱུང་རྐྱེན་ཁ་གསལ་ཤེས་རྟོགས་ཐུབ་མེད་ཅིང་། རྒྱ་ནག་བརྒྱུད་ལམ་ཁ་ཤས་ཀྱི་ནང་གནས་ཚུལ་སྤེལ་བ་ལྟར་ན། འབར་འགད་བྱུང་སའི་རུན་ཧེ་བཟོ་གྲྭའི་མཛོད་ཁང་ནང་དུ་མེ་ཤོར་སླ་བའི་རྫས་འགྱུར་གྱི་དངོས་ཟོག་མང་པོ་གསོག་ཉར་བྱས་ཡོད་འདུག ཕྱི་ཚེས་༡༣ ཉིན་གྱི་ཞོགས་པར་རྒྱ་ནག་ཁོར་ཡུག་སྲུང་སྐྱོབ་ལས་ཁུངས་ཀྱིས་གནས་ཚུལ་སྤེལ་བའི་ནང་། ཐའེ་ཅིན་གྱི་འབར་འགད་བྱུང་སའི་ས་ཁུལ་དེའི་མཁའ་དབུགས་ད་དུང་སྔར་བཞིན་རྒྱུན་ལྡན་གྱི་གནས་སྟངས་འོག་ཡོད་སྐོར་བརྗོད་འདུག།

ཏྲེ་ཧོར་ཐུབ་བསྟན་གྱིས་སྒྱུར་སྒྲིག་བྱས།