རྒྱ་གར་གཞུང་གིས་བོད་ཐོག་འཛིན་པའི་སྲིད་བྱུས་དེར་འགྱུར་བ་གཏོང་དགོས།

ཤིང་སྟག་སིམ་ལའི་ཆིངས་ཡིག་བཞག་ནས་མི་ལོ་བརྒྱ་འཁོར་བའི་དུས་དྲན་སྲུང་བརྩི་ཞུ་ཆེད་རྒྱ་གར་རྒྱལ་སྤྱིའི་བསྟི་གནས་ཁང་དང་། བོད་ཀྱི་སྲིད་བྱུས་ཉམས་ཞིབ་ཁང་གཉིས་ཀྱིས་ཕྱི་ལོ་༢༠༡༤ ཟླ་༧ ཚེས་༣ ཉིན་རྒྱ་གར་གྱི་རྒྱལ་ས་ལྡི་ལིའི་ནང་བགྲོ་གླེང་ལྷན་ཚོགས་ཤིག་གོ་སྒྲིག་བྱས་ཡོད་པ་དང། དེར་སྲིད་སྐྱོང་བློ་བཟང་སེང་གེས་གཏམ་བཤད་གནང་ཡོད་པ་རེད།

དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན།  བགྲོ་གླེང་ལྷན་ཚོགས་དེའི་ཐོག མཁས་དབང་ཚོས་རྒྱ་གར་གཞུང་གིས་བོད་ཐོག་འཛིན་པའི་སྲིད་བྱུས་དེར་འགྱུར་བ་གཏོང་དགོས་པ་མ་ཟད། བོད་ཀྱི་དཀའ་གནད་སེལ་ཆེད་རྒྱ་གར་གཞུང་གིས་རྒྱ་ནག་ལ་གནོན་ཤུགས་སྤྲོད་དགོས་པའི་རེ་འདུན་ཡང་བཏོན་འདུག དེ་ཡང་སྐབས་དེར་མཁས་དབང་ཚོས་བརྗོད་དོན་ལྟར་ན། ལོ་རྒྱུས་ཐོག་ཡུན་རིང་ནས་བོད་རང་བཙན་གྱི་རྒྱལ་ཁབ་དེ་རྒྱ་གར་གྱི་ཁྱིམ་མཚེས་ ཡིན་པ་ལས་རྒྱ་ནག་དང་ནམ་ཡང་མིན། འོན་ཀྱང་སྟབས་མ་ལེགས་པ་ཞིག་ལ་དེང་སྐབས་རྒྱ་གར་གཞུང་ནས་བོད་ནང་རྒྱ་ནག་གིས་དབང་བསྒྱུར་བྱེད་བཞིན་པ་དེར་མོས་མཐུན་བྱེད་བཞིན་ཡོད་ཅེས་སོགས་ཀྱི་བསམ་ཚུལ་བཏོན་འདུག

གཞན་ཡང་སྐབས་དེར་དེ་སྔའི་རྒྱ་གར་གཞུང་གི་གསང་བའི་ལས་ཁུངས་ཀྱི་དམིགས་བསལ་འགན་འཛིན་ཟུར་པ་སྐུ་ཞབས་ཨར་ཨེན་ར་ཝིས་(R.N. Ravi) གསུང་དོན་ལྟར་ན། བོད་ཀྱི་དཀའ་གནད་མ་སེལ་བར་རྒྱ་དཀར་ནག་གཉིས་གྲོགས་པོ་ཡོང་མི་སྲིད། རྒྱ་ནག་གཞུང་གིས་བོད་མིའི་ཆེ་མཐོང་དང་མངོན་འདོད་རྣམས་ངེས་པར་དུ་བསྒྲུབ་དགོས། ང་ཚོས་རྒྱ་ནག་གཞུང་ལ་དྲན་གསོ་གཏོང་དགོས་པ་ཞིག་ལ་བོད་འདི་རྒྱ་ནག་ནང་ཁུལ་གྱི་གནད་དོན་ཞིག་མིན་པར་རྒྱ་གར་རྒྱལ་ནང་གི་གནད་དོན་ཐོག་འབྲེལ་བ་ཧ་ཅང་ཆེན་པོ་ཆགས་ཡོད། ཅེས་གསུངས་པ་མ་ཟད། རྒྱ་གར་བྷི་ཇེ་པི་ཆབ་སྲིད་ཚོགས་པའི་ཚོགས་མི་རྒན་གྲས་སྐུ་ཞབས་མུར་ལི་མ་ནོ་ ཧར་ཇོ་ཤིས་ (Murli Manohar Joshi) གསུང་དོན། དེང་སྐབས་རྒྱ་ནག་གཞུང་གིས་བཙན་དབང་འོག་བོད་ནང་རྒྱ་རིགས་མི་འབོར་ཧ་ཅང་མང་པོ་སྤོ་ཤུགས་བྱེད་བཞིན་ཡོད། རྒྱ་ནག་གཞུང་གིས་བོད་མི་རིགས་རྩ་མེད་གཏོང་རྒྱུའི་སྲིད་བྱུས་འཛིན་བཞིན་པ་དེར་དུས་རབས་༢༡ ནང་རྒྱལ་ཁབ་བསམ་ཤེས་ལྡན་པ་སུས་ཀྱང་ངོས་ལེན་བྱ་ཐབས་རྩ་བ་ནས་མེད། ཅེས་གསུངས།

ལྷན་ཚོགས་སྐབས་མཁས་དབང་མང་ཆེ་བས་དེ་སྔ་ཕྱི་ལོ་ ༡༩༡༣།༡༩༡༤ ལོར་སིམ་ལའི་ཆིངས་ཡིག་འཇོག་སྐབས་བོད་གཞུང་གིས་ཨ་རུ་ནཱ་ཅལ་ནང་རྟ་དབང་ས་ཁུལ་དེ་རྒྱ་གར་དབྱིན་ཇིའི་སྲིད་གཞུང་ལ་སྤྲད་པར་ངོས་འཛིན་གནང་བ་མ་ཟད། རྒྱ་གར་གཞུང་གིས་ཕྱི་ལོ་ ༡༩༥༤ ལོར་རྒྱ་ནག་དང་ལྷན་རྩ་དོན་ལྔ་ Panchsheel Agreement ཟེར་བ་དེར་མིང་རྟགས་བཀོད་པ་དེས་རྒྱ་ནག་གིས་བོད་ཐོག་དམག་དཔུང་བཏང་ནས་དྲག་པོས་བཙན་འཛུལ་བྱས་པ་དེ་ཁྲིམས་མཐུན་ཞིག་ལ་ངོས་ལེན་བྱས་པ་ཞིག་ཆགས་ཡོད་པར་ངོས་འཛིན་གནང་འདུག

གཞན་ཡང་སྐབས་དེར་དབྱིན་ཇིའི་རྒྱལ་ས་ལོན་ཌོན་གྱི་ཝེ་སི་མིན་སི་ཊར་གཙུག་ལག་སློབ་གྲྭའི་སློབ་དཔོན་སྐུ་ཞབས་ཌིབ་ཡེ་ཤི་ཨ་ནནྡཱས་ (Dibyesh Anand) གསུང་དོན། རྒྱ་གར་གྱི་བོད་ཐོག་འཛིན་བཞིན་པའི་སྲིད་བྱུས་འདི་དེ་སྔ་དབྱིན་ཇིའི་དབང་བསྒྱུར་འོག་ཡོད་སྐབས་ཀྱི་སྲིད་བྱུས་ནོར་འཁྲུལ་ཅན་དེའི་ཐོག་ཤར་བསྐྱོད་བྱེད་བཞིན་ཡོད་པ་ལས་རྒྱ་སྐྱེད་རིང་ལུགས་ཀྱི་བསམ་ཚུལ་དོར་མེད། ཅེས་གསུངས།
ཕྱོགས་མཚུངས་སྐབས་དེར་ཁྲིམས་རྩོད་པ་དང་རྩོམ་པ་པོ་སྐུ་ཞབས་ན་རེ་ཤ་མ་ཐུར་(Naresh Mathur) གྱིས་གསུང་དོན། རྒྱ་གར་གཞུང་གིས་སིམ་ལའི་ཆིངས་ཡིག་སྐབས་བོད་དེ་བཞིན་རང་བཙན་རྒྱལ་ཁབ་ཞིག་ཡིན་པ་དེར་རྩིས་འཇོག་གནང་དགོས། གལ་ཏེ་རྒྱ་གར་གཞུང་གིས་བོད་རང་བཙན་ཡིན་པར་ངོས་འཛིན་གནང་མ་ཐུབ་ཚེ། རྟ་དབང་རྒྱ་གར་གྱི་མངའ་ཁོངས་ཡིན་ཟེར་བར་རྒྱུ་མཚན་དེ་ཙམ་ཤོད་ས་རག་གི་མ་རེད། གང་ཡིན་བརྗོད་ན། རྟ་དབང་དེ་སིམ་ལའི་ཆིངས་ཡིག་སྐབས་བོད་རང་བཙན་གྱི་རྒྱལ་ཁབ་གཅིག་ཡིན་པའི་གནས་སྟངས་འོག་རྒྱ་གར་ལ་སྤྲད་པ་ཞིག་ཆགས་ཡོད། ཅེས་གསུངས།
དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེས་གསུང་དོན། བོད་དེ་བཞིན་ཨེ་ཤི་ཡའི་གླིང་ཆེན་ཡོངས་རྫོགས་ལ་ཧ་ཅང་གལ་ཆེན་པོ་ཞིག་ཆགས་ཡོད་པ་མ་ཟད། ལྷག་པར་ཁོར་ཡུག་དང་ས་བབ་ཆགས་ཚུལ་དང་འབྲེལ་བའི་སྲིད་བྱུས་འཛིན་སྟངས་ཐོག་རྒྱ་གར་ལ་ཧ་ཅང་གལ་ཆེན་པོ་ཆགས་ཡོད། ཅེས་གསུངས་པ་མ་ཟད། སྲིད་སྐྱོང་གིས་སྐབས་དེར་དབུ་མའི་ལམ་གྱི་སྲིད་བྱུས་འོག་བོད་ཀྱི་གནད་དོན་གསལ་རྒྱུ་ཧ་ཅང་གལ་ཆེ་ཡིན་སྐོར་གསུང་དོན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་མི་རྣམས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་སྤྲོད་དགོས། ཞེས་གསུངས་ཡོད་པ་རེད།།