བོད་ཀྱི་འབྲོག་ཁྱིའི་རིན་ཐང་ཆག་པ།

དེང་སང་བོད་ཀྱི་འབྲོག་ཁྱིའི་རིན་གོང་ཧ་ཅང་མར་ཆག་སྟེ་རྒྱ་ནག་གི་གྲོང་ཁྱེར་ཁ་ཤས་ཤིག་ཏུ་བོད་པའི་འབྲོག་ཁྱི་རྣམས་བཤས་རར་ཕབ་བཞིན་པ་དང་། དུད་འགྲོའི་རང་དབང་རྩོད་ལེན་པ་ཁག་ཅིག་གིས་དེའི་ཐད་ངོ་རྒོལ་བྱས་འདུག

སྐབས་ཞིག་ལ་བོད་པའི་འབྲོག་ཁྱི་ཆེན་པོ་དག་གིས་ཨ་སྒོར་འབུམ་གཉིས་ཙམ་ཁུག་གི་ཡོད་པ་མ་ཟད། འཛམ་གླིང་ཐོག་གི་འབྱོར་ལྡན་དང་ཚོང་པ་གྲགས་ཅན་པ་མང་པོ་ཞིག་གིས་འབྲོག་ཁྱི་གཅེས་ཉར་དང་གསོ་སྐྱོང་བྱས་ཏེ་རྒྱས་སྤྲོས་ཀྱི་མཚོན་རྟགས་ཤིག་ཏུ་གྱུར་མྱོང་ཡོད།

འོན་ཀྱང་། ཕྱི་ལོ་༢༠༡༣ ལོར་དུད་འགྲོའི་རང་དབང་རྩོད་ལེན་པ་ཁ་ཤས་ཀྱིས་རྒྱ་ནག་ཏུ་སྐྱེལ་འདྲེན་རླངས་འཁོར་ཞིག་གི་ནང་། འབྲོག་ཁྱི་༢༠ དང་ཁྱི་རིགས་གཞན་༡༥༠ ཙམ་ཞིག་བཤས་རར་འཁྱེར་ནས་འགྲོ་བཞིན་པའི་སྐབས། གློད་གྲོལ་གཏོང་ཐུབ་པ་བྱུང་ཡོད་འདུག་ཅིང་། ཁྱི་རིགས་ཉོ་ཚོང་མཁན་དག་གིས་ཁྱི་རེ་རེར་ཨ་སྒོར་༥ ལས་ཉུང་བ་སྤྲོད་དེ་ཉོས་ཡོད་པ་དང་། ཁྱིའི་པགས་པས་ཀོ་བ་རྫུན་མ་དང། དགུན་དུས་ཀྱི་ལག་ཤུབས། དེ་བཞིན་ཁ་ཟས་ཀྱི་བྲོ་རྫས་ཆེད་བེད་སྤྱོད་བྱེད་ཀྱི་ཡོད་སྐོར་དུད་འགྲོའི་རང་དབང་རྩོད་ལེན་པ་དག་གིས་བརྗོད་འདུག

ཧི་མ་ལ་ཡའི་མཐོ་སར་གནས་པའི་འབྲོག་ཁྱི་རྣམས་མི་ལོ་བཞི་ཡི་སྔོན་ལ་རྒྱ་ནག་ཕྱུག་བདག་ཚོའི་གནས་བབས་མཚོན་རྟགས་ཞིག་ཏུ་གྱུར་ཡོད་པ་དང། སྐབས་དེར་བརྒྱུད་ལམ་ཞིག་ཏུ་འབྲོག་ཁྱི་རིགས་ཚད་ལྡན་ཞིག་ལ་ཨ་སྒོར་ས་ཡ་༡།༦ གི་རིན་དུ་བཙོང་ཡོད་སྐོར་གྱི་གསར་འགྱུར་ཐོན་ཡོད་ཅིང་། གནད་དོན་དབྱེ་ཞིབ་པ་ཚོས་རིན་གོང་དེ་ཁྲོམ་དུ་ཉོ་ཚོང་ཡག་པོ་ཡོང་ཕྱིར་འུད་སྒྲོག་བྱས་པ་ཞིག་ཡིན་པ་ལས། འབྲོག་ཁྱི་ཚད་ལྡན་ཞིག་ལ་ཨ་སྒོར་༢༥༠༠༠༠ ཙམ་ལས་ཁུག་གི་མེད་སྐོར་བརྗོད་འདུག

དེང་སྐབས་འབྲོག་ཁྱི་གསོ་སྐྱོང་བྱེད་མཁན་མང་པོ་ཞིག་གིས་འབྲོག་ཁྱིའི་རིན་གོང་མར་ཆག་པའི་རྐྱེན་གྱིས་ཚོང་ལས་ནས་ཕྱིར་འཐེན་བྱེད་ཀྱི་ཡོད་པ་དང་། འབྲོག་ཁྱི་ཚད་ལྡན་སེང་གེའི་རལ་པ་ཅན་དང་རྐང་ལག་ཆེན་པོ་ཅན་དག་ལའང་ཨ་སྒོར་༢༠༠༠ ལས་མང་བ་དགོས་ཀྱི་མེད། འུ་ཐུག་པའི་གསོ་སྐྱོང་མཁན་མང་པོ་ཞིག་གིས་རིན་གོང་དེ་ལས་དམའ་བར་ཚོང་འདོད་བྱེད་ཀྱི་ཡོད། དེ་བཞིན་དེ་སྔོན་ཆབ་མདོ་དང་སི་ཁྲོན་ཞིང་ཆེན་ས་ཁུལ་གྱི་རིན་གོང་ཤིན་ཏུ་མཐོ་བའི་འབྲོག་ཁྱིའི་རིགས་དེ་དག་ཀྱང་། ད་ཆ་སྲོག་ཆགས་གཅེས་ཉར་གྱི་ཚོང་ཁང་སྤྱིར་བཏང་ཞིག་ཏུ་གྱུར་ཡོད་པ་དང། འབྲོག་ཁྱི་གསོ་སྐྱོང་མཁན་བརྒྱ་ཆ་༩༥ ཙམ་གྱིས་འཚོ་ཐབས་བརྗེ་དགོས་འཁེལ་ཡོད་སྐོར་བོད་ཀྱི་འབྲོག་ཁྱིའི་མཐུན་ཚོགས་ཀྱིས་འགྲེལ་བརྗོད་བྱས་འདུག

འབྲོག་ཁྱིའི་རིགས་ཀྱི་ཉོ་ཚོང་དར་སྲོལ་ཧ་ཅང་ཆེ་བའི་སྐབས། ཕོ་ཁྱི་རྣམས་སྨན་ཁང་དུ་བཤག་བཅོས་བྱས་ཏེ་སྟོབས་ཤུགས་ཆེ་རུ་བཏང་བ་དང་། འབྲོག་ཁྱི་མོའི་བདག་པོ་རྣམས་ཀྱིས་དངུལ་ཕོན་ཆེ་སྤྲད་དེ་ཕོ་ཁྱི་བཟང་བ་དང་རྫིག་པ་དང་མཉམ་དུ་རིགས་རྒྱུད་སྤེལ་གྱི་ཡོད་པ་རེད།

དེ་བཞིན་ཚོང་གི་ཁེ་སོང་ཆེད་འབྲོག་ཁྱི་རྣམས་ཁྱི་རིགས་གཞན་དང་མཉམ་དུ་རིགས་རྒྱུད་བསྲེ་སྦྱོར་བྱས་ཏེ། འབྲོག་ཁྱིའི་རིན་ཐང་དང་ཚོང་ཤག་ཚོའི་དགའ་མོས་ལ་ཕོག་ཐུག་ཆེན་པོ་བཏང་ཡོད་པ་མ་ཟད། འབྲོག་ཁྱིས་མི་ལ་གནོད་འཚེ་བྱས་པའི་གནས་ཚུལ་བདེན་རྫུན་འདྲ་མིན་ཐོན་པ་དང་། གཉིས་ནས་རྒྱ་གཞུང་གིས་ཉོ་ཚོང་ལ་དམ་དྲག་བྱས་སོགས་ཀྱི་རྐྱེན་པས། ཚོང་ལས་དེར་མདུན་ལམ་མེད་པ་ཞིག་ཏུ་གྱུར་ཞིང་འབྲོག་ཁྱི་གསོ་ཉར་གྱི་དར་སྲོལ་ལ་གཏོར་བརླག་ཆེན་པོ་བཏང་ཡོད།

མཚོ་སྔོན་དུ་གནས་སྡོད་བྱེད་པའི་མིང་ལ་མགོན་པོ་ཞེས་འབོད་པའི་འབྲོག་ཁྱི་གསོ་སྐྱོང་བྱེད་མཁན་ཞིག་གིས། བོད་པའི་འབྲོག་པ་རྣམས་ཀྱིས་གནའ་སྔ་མོ་ནས་འབྲོག་ཁྱི་དེ་མཚན་མོ་སྒོ་ཕྱུགས་རྣམས་སྤྱང་ཀི་དང་རྐུན་མའི་ཁ་ནས་སྲུང་སྐྱོབ་ཆེད་གསོ་སྐྱོང་བྱེད་ཀྱི་ཡོད་པ་དང། ཁྱི་དེའི་རིགས་རྣམས་འབའ་སྐད་ཆེ་ཞིང། སྲོག་རླུང་མང་པོ་མེད་པའི་བོད་ཀྱི་རྩྭ་ཐང་ས་ཁ་མཐོ་བོ་དང་གནམ་གཤིས་གྲང་ངར་ཅན་གྱི་ནང་དུ་སྡོད་རྒྱུར་གོམས་འདྲིས་སུ་གྱུར་ཡོད་ལ། རི་སྐྱེས་སྤྱང་ཀི་ལྟར་ལོ་གཅིག་གི་ནང་ཕྲུ་གུ་ཐེངས་གཅིག་བཙའ་ཡི་ཡོད་པ་མ་ཟད། དཔའ་དང་བློ་ཁོག་ལྡན་པའི་ངང་མི་དང། སྒོ་ཕྱུག བདག་དབང་གི་ལོངས་སྤྱོད་ཐམས་ཅད་ཉེན་ཁ་ནས་སྲུང་སྐྱོབ་བྱེད་ཀྱི་ཡོད་པས། མི་རྣམས་ཀྱི་སྤོབས་པ་ཆེན་པོ་བྱེད་འོས་པ་ཞིག་ཡིན་སྐོར་བརྗོད་འདུག

ཁོང་གིས་མུ་མཐུད་དུ། འབྲོག་ཁྱི་ལྗིད་ཚད་རྒྱ་མ་༡༦༠ ཅན་ཞིག་གསོ་སྐྱོང་ཡག་པོ་བྱེད་པར་ཉིན་རེར་ཨ་སྒོར་༥༠-༦༠ ཙམ་འགྲོ་ཡི་ཡོད་པ་དང་། གལ་སྲིད་ཁོང་ལ་མི་ཚེའི་མདུན་ལམ་གྱི་གོ་སྐབས་གཞན་ཞིག་ཐོབ་ན་ཚོང་ལས་འདི་མཚམས་འཇོག་འདོད་ཡོད་པའི་རང་ཉིད་ཀྱི་ཚོར་སྣང་བཤད་འདུག

དུད་འགྲོའི་རང་དབང་རྩོད་ལེན་པ་ལྕམ་ཕིང་གིས་ཁོང་མོ་རྒྱ་ནག་ཏུ་གནས་སྡོད་བྱས་པའི་ལོ་༢༥ ནང་ཁྱི་རིགས་འདྲ་མིན་གྱི་དར་སྲོལ་བྱུང་ཚུལ་དང། དེ་ནས་ལོ་ཁ་ཤས་རྗེས་དབྱིངས་བརླགས་ཏེ་བདག་མེད་དུ་གྱུར་བ་མང་པོ་མཐོང་རྒྱུ་ཡོད་ནའང། ཁོང་གིས་བོད་བའི་འབྲོག་ཁྱི་རྣམས་བཤས་རའི་ནང་མཐོང་ཡོང་བསམ་པ་རྩར་ནས་མ་བྱུང་ཞེས་བརྗོད་འདུག།།

གསར་འགོད་པ་བསྟན་འཛིན་ཟླ་བ།