རྒྱ་གཞུང་གིས་དགེ་བཤེས་ཚུལ་ཁྲིམས་སྙན་གྲགས་ལ་ལོ་དགུའི་ཁྲིམས་ཆད།

རྒྱ་གཞུང་གིསཁམས་ནགས་ཤོད་འབྲི་རུ་རྫོང་རབ་བརྟན་དགོན་པའི་དགེ་བཤེས་ཚུལ་ཁྲིམས་སྙན་གྲགས་ལ་ལོ་དགུའི་བཙོན་འཇུག་ཁྲིམས་ཐག་བཅད་པའི་གནས་ཚུལ་གསར་དུ་ཤེས་རྟོགས་བྱུང་ཡོད་པ་རེད།

དེ་ཡང་འབྲེལ་ཡོད་ཀྱིས་གནས་ཚུལ་མཁོ་སྤྲོད་བྱེས་པ་ལྟར་ན། རྒྱ་ནག་གཞུང་གིས་ཕྱི་ལོ་༢༠༡༢ ལོའི་ཟླ་༡༢ ནང་ཁམས་ནགས་ཤོད་འབྲི་རུ་རྫོང་རབ་བརྟན་དགོན་པའི་དཔེ་ཁྲིད་དགེ་རྒན་དགེ་བཤེས་ཚུལ་ཁྲིམས་སྙན་གྲགས་ལྷ་ས་ནས་འཛིན་བཟུང་རྗེས། གར་ཡོད་ཅི་བྱུང་གི་གནས་ཚུལ་ཤེས་ཐུབ་མེད་ཀྱང་། འདི་ལོའི་ཕྱི་ཟླ་༧ ཚེས་ ༣༡ ཉིན་ཁོང་གི་ནང་མི་ཉེ་འབྲེལ་ཚོས་རྒྱ་གཞུང་གིས་ཁོང་ལྷ་སའི་ཆུ་ཤུལ་བཙོན་ཁང་དུ་བཙོན་འཇུག་བྱས་ཡོད་པ་མ་ཟད། གསང་བའི་སྒོ་ནས་ལོ་༩ བཙོན་འཇུག་ཁྲིམས་ཐག་བཅད་ཡོད་པ་དང་། བཙོན་ཁང་དུ་སྡོད་རིང་སྡུག་སྦྱོང་མནར་གཅོད་བཏང་རྐྱེན་ད་ལྟའི་ཆར་དགེ་བཤེས་ཁོང་གི་སྐུ་གཟུགས་གནས་སྟངས་ཧ་ཅང་སྐྱོ་བོ་ཆགས་ཡོད་པ་ཤེས་རྟོགས་བྱུང་ཡོད་འདུག

ད་ལྟ་ཁོང་རང་ལོ་ ༤༠ ཡས་མས་ཡིན་པ་དང་། བོད་རང་སྐྱོང་ལྗོངས་ཁམས་ནག་ཆུ་ས་ཁུལ། འབྲི་རུ་རྫོང་ཚ་ཆུ་ཡུལ་ཚོ་རབ་བརྟན་དགོན་པའི་དཔེ་ཁྲིད་དགེ་རྒན་ཡིན་འདུག ༢༠༡༢ ལོའི་ཟླ་ ༡༢ ནང་ཁོང་ལྷ་སར་ཉེན་རྟོག་པས་གློ་བུར་འཛིན་བཟུང་བྱས་ཏེ། ལོ་གཅིག་དང་ཟླ་བདུན་ལྷག་གར་སོང་ཆ་མེད་གྱུར་ཡོད་འདུག

རྒྱ་གཞུང་གིས་དགེ་བཤེས་ཚུལ་ཁྲིམས་སྙན་གྲགས་ཀྱི་ནང་མིར་ཁོང་ལ་ནག་ཉེས་ཅི་ཡོད་གསལ་བཤད་ཅི་ཡང་བྱས་མེད་པར་མ་ཟད། བཙོན་ཁང་དུ་སྡོད་རིང་སྡུག་སྦྱོང་མནར་གཅོད་ཚད་ལས་བརྒལ་བ་བཏང་སྟེ། ལུས་ཡོངས་རྨ་ཁས་ཁེངས་ཡོད་འདུག ཉེ་ལམ་ཁོང་གི་ནང་མི་ཚོས་ཁོང་ལ་སྨན་བཅོས་དང་སྐུ་གཟུགས་བདག་སྐྱོང་ཆེད་སྨན་བཅོས་མཐུན་རྐྱེན་སྤྲོད་རྒྱུ་དང་། དེ་ལྟར་མ་བྱུང་ཚེ་ནང་མིར་རྩིས་སྤྲོད་ཀྱིས་བདག་སྐྱོང་བྱེད་བཅུག་རྒྱུའི་རེ་སྐུལ་བྱས་ཡོད་ཀྱང་། ད་ཆར་ཡང་རྒྱ་གཞུང་གིས་ནང་མིར་བརྡ་ལན་སོགས་གང་ཡང་མེད་པར་ལྷག་ཡོད་པར་འགྲེལ་བརྗོད་བྱས་སོང་།།