ལྡི་ལིར་གཞོན་ལྷན་གྱི་ལས་འགུལ་བ་སློབ་མ་བཅུ་བཀག་ཉར་བྱས་འདུག

ཟླ་འདིའི་ཚེས་༡༧ ཉིན་རྒྱ་ནག་གི་སྲིད་འཛིན་ཞི་ཅིན་ཕིང་རྒྱ་གར་གྱི་མངའ་སྡེ་གྷུ་ཇི་ར་ཐིའི་ནང་ལ་འབྱོར་ཡོད་པ་དང་། བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་ལྡི་ལིར་ངོ་རྒོལ་སྐད་འབོད་ལས་འགུལ་ཞིག་གོ་སྒྲིག་ཞུས་ཡོད་པ་རེད།

དེ་ཡང་ཕྱི་ཟླ་༩ ཚེས་ ༡༢ ཉིན་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་རྒྱ་གར་སྲིད་བློན་མོ་དྷིའི་ལ་རྒྱ་ནག་གི་སྲིད་འཛིན་ཞིའི་ཅིང་ཕིང་མཉམ་དུ་བོད་དོན་གླེང་སློང་གནང་སྐྱོང་ཡོང་བའི་ཞུ་སྙན་ཞིག་ཕུལ་ཡོད་པ་དང། ཚེས་༡༧ ཉིན་རྒྱ་ནག་གི་སྲིད་འཛིན་ཞིའི་ཅིང་ཕིང་རྒྱ་གར་ལ་འཚམས་གཟིགས་ལ་ཕེབས་ལ་སྟབས་བསྟུན། བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་གིས་རྒྱ་གར་ རྒྱལ་ས་ལྡི་ལིའི་རམ་ལི་ལ་ནས་ཇཱན་ལྡར་མན་ལྡར་བར་སྐད་འབོད་ཀྱི་ལས་འགུལ་ཞིག་སྤེལ་འཆར་བྱས་ཀྱང་། ཉིན་དེའི་ཞོགས་པ་སྐད་འབོད་ལས་འགུལ་ནང་མཉམ་ཞུགས་བྱེད་མཁན་གྱི་བོད་མི་རྣམས་བསམ་ཡས་གླིང་གཞིས་སྒར་དུ་རྒྱ་གར་ཉེན་རྟོག་པ་ཕོན་ཆེ་བསླེབས་ནས་བསམ་ཡས་གླིང་གཞིས་སྒར་ཉེ་འགྲམ་གྱི་ཟམ་པའི་འོག་ནས་བཀའ་འགོག་གིས་བསྐྱོད་ཐུབ་མེད་པ་རེད།

འོན་ཀྱང་མི་མང་རྣམས་ཀྱིས་ཉེན་རྟོག་པས་བཀག་འགོག་བྱས་མིན་མ་ལྟོས་པར་བསམ་ཡས་ གླིང་གཞིས་སྒར་ཉེ་འགྲམ་དུ་སྐད་འབོད་བརྒྱབ་ཡོད་པ་དང། ཨ་རིར་གནས་བཞུགས་རྒྱ་རིགས་མང་གཙོ་དོན་གཉེར་བ་དང་བོད་དོན་རྒྱབ་སྐྱོར་བ་རྩོམ་པ་པོ་རོ་སེ་ཐིང་གིས་མི་མང་ལ་གཏམ་བཤད་གནང་ཡོད་པ་རེད།དེ་བཞིན་བོད་དོན་རྒྱབ་སྐྱོར་བ་དང་རྩོམ་པ་པོ་རྒྱ་གར་བ་སྐུ་ཞབས་ཝི་ཇའི་ཁེ་རན་ཏིའི་དང་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་གཉིས་ཀྱིས་མི་མང་ལ་ གཏམ་བཤད་གནང་། གཞན་ཡང་གཞོན་ལྷན་གྱི་གོ་སྒྲིག་འོག་ལྡི་ལིའི་ས་གནས་གཞོན་ནུའི་སློབ་ཕྲུག་བཅུས་རྒྱ་ནག་གཞུང་འཚབ་ཁང་མདུན་དུ་སྐད་འབོད་ཀྱི་ལས་འགུལ་སྤེལ་ཡོད་པ་དང། སྐབས་དེར་རྒྱ་གར་ཉེན་རྟོག་པས་སློབ་མ་བཅུ་པོ་འཛིན་བཟུང་གིས་ཆ་ན་ཁྱ་པུ་ རི་ཉེན་རྟོག་ལས་ཁུངས་ (Chanakyapuri Police Station)སུ་བཀག་ཉར་བྱས་ཡོད་འདུག

སྐབས་དེར་སློབ་མ་རྣམས་ཀྱིས་བོད་ལ་རང་དབང་དགོས་པ་དང་། དབང་བསྒྱུར་དང་བཙན་གནོན་མཚམས་འཇོག་དགོས་པའི་སྐད་འབོད་རྒྱབ་ཡོད་པ་རེད།།
http://ibnlive.in.com/news/protibet-activists-protest-chinese-president-xi-jinpings-visit-to-india/499689-37-64.html