འགྲོ་བ་མིའི་ཐོབ་ཐང་ལྷན་ཚོགས་ཐོག་བོད་དོན་སྙན་ཞུ་ཞིག་ཕུལ་ཡོད་པ་རེད།

སུད་སིའི་གྲོང་ཁྱེར་ཇི་ནི་ཝར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལོ་འཁོར་ལྷན་ཚོགས་ཐེངས་༢༧ ཕྱི་ལོ་༢༠༡༤ ཟླ་༩ ཚེས་༨ ཉིན་འཚོག་བཞིན་ཡོད་པ་དང་། རྒྱལ་སྤྱིའི་བོད་དོན་ལས་འགུལ་ཁང་ནས་གཞུང་གིས་བོད་མིའི་ཐོག་བཟུང་དང་འཛིན་བཞིན་པའི་གདུག་རྩུབ་ཅན་གྱི་སྲིད་བྱུས་རྣམས་མཚམས་འཇོག་ཡོང་ཐབས་ལ་འབད་བརྩོན་གནང་རོགས་ཞེས་སྙན་ཞུ་ཞིག་ཕུལ་ཡོད་པ་རེད།

དེ་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་འགན་འཛིན་སྐུ་ཞབས་ཧུ་སན་ལ་འཕྲིན་ཡིག་ཅིག་ཕུལ་བའི་ནང་འཁོད་དོན། སྐུ་ཉིད་ཀྱིས་ལས་ཡུན་དེའི་རིང་བོད་དང་རྒྱ་ནག་ནང་ཆེད་ཕེབས་གནང་དགོས་པ་མ་ཟད། རྒྱ་ནག་གཞུང་ནས་བོད་ནང་ཁྲིམས་འགལ་གྱི་བོད་མི་གང་བྱུང་འཛིན་བཟུང་བཀག་སྐྱིལ་དང་། གར་སོང་ཆད་མེད་འགྱུར་བཞིན་པའི་གནད་དོན་རྣམས་འཕྲལ་མར་མཚམས་འཇོག་ཡོང་ཐབས་ལ་འབད་བརྩོན་གནང་དགོས་པའི་རེ་འདུན་ཞུ་བཞིན་ཡོད། སྤྱིར་བཏང་ཕྱི་ལོ་༢༠༠༩ ནས་བོད་ནང་རང་ལུས་མེར་སྲེག་གི་གནས་ཚུལ་ཐོན་པ་ནས་བཟུང་། རྒྱ་ནག་གཞུང་གིས་བོད་མིའི་ཐོག་དྲག་གནོན་སྔར་ལྷག་བྱེད་ཤུགས་ཆེ་རུ་བཏང་ཡོད། ལྷག་པར་སྲིད་འཛིན་ཞི་ཅིན་ཕིང་གིས་གནད་དོན་དེ་དག་ལ་གདོང་ལེན་ཆེད་རང་ལུས་མེར་སྲེག་གཏོང་མཁན་རྣམ་པའི་ནང་མི་ཉེ་འབྲེལ་སོགས་ཉེས་ཅན་དུ་ངོས་འཛིན་བྱས་ཏེ། བཙན་དབང་གིས་བོད་མི་ཁག་གཅིག་འཛིན་བཟུང་བཀག་སྐྱིལ་དང་མང་དག་ཅིག་གར་སོང་ཆད་མེད་དུ་གྱུར་བའི་གནས་ཚུལ་འཐོན་བཞིན་ཡོད། དེར་བརྟེན་ལས་འགུལ་ཁང་དེའི་འགན་འཛིན་ངོས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་། འགན་འཛིན་བཅས་ནས་རྒྱ་ནག་གཞུང་གིས་བོད་མིའི་ཐོག་བཟུང་དང་འཛིན་བཞིན་པའི་གདུག་རྩུབ་ཅན་གྱི་སྲིད་བྱུས་རྣམས་མཚམས་འཇོག་ཡོང་ཐབས་ལ་འབད་བརྩོན་གནང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་འཁོད་འདུག

ལྷན་ཚོགས་དེ་བཞིན་ཕྱི་ཚེས་༨ ནས་༢༦ བར་འཚོག་གི་ཡོད་པ་དང་། དེའི་ཁྱབ་ཁོངས་སུ་ཕྱི་ཚེས་༡༢ ཉིན་འཛམ་གླིང་ས་ཕྱོགས་གང་སར་བཙན་དབང་འོག་གར་སོང་ཆད་མེད་དུ་འགྱུར་བཞིན་པའི་གནད་དོན་ཐོག་ཞིབ་འཇུག་གནང་མཁན་རྒྱལ་ཚོགས་ཀྱི་ཚན་པའི་ལོ་འཁོར་སྙན་ཐོ་བསྐྱར་ཞིབ་ཀྱི་ལས་རིམ་ཞིག་ཀྱང་འཚོག་གི་ཡོད་སྟབས། རྒྱལ་སྤྱིའི་བོད་དོན་ལས་འགུལ་ཁང་དང་ཧ་སན་འགྲོ་བ་མིའི་ཐོབ་ཐང་ཟུང་འབྲེལ་ཐོག་རྒྱལ་ཚོགས་ཀྱི་ཚན་པ་དེའི་བགྲོ་གླེང་གི་ལས་རིམ་ཞིག་ཏུ་བོད་མི་གར་སོང་ཆད་མེད་དུ་གྱུར་དང་འགྱུར་བཞིན་པའི་སྐོར་བསྒྲགས་གཏམ་ཞིག་ཀྱང་སྒྲོགས་སྦྱང་བྱེད་རྒྱུ་ཡིན་པ་རེད།།