དབུས་གཞོན་ལྷན་དང་ས་གནས་ཁག་བརྒྱད་ཀྱི་རྒྱུན་ལས་བར་གྲོས་མོལ།

ཟླ་འདིའི་ཕྱི་ཚེས་༦ ཉིན་རྒྱ་གར་ལྷོ་ཕྱོགས་སྦེལ་ཀོབ་བདེ་སྐྱིད་སླར་གསོའི་ཚོགས་ཁང་ནང་། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚོགས་གཞོན་དང་ཟུང་དྲུང་། དེ་བཞིན་དཔལ་འབྱོར་འགན་འཛིན་བཅས་དང་། རྒྱ་གར་ལྷོ་ཕྱོགས་སྦེལ་ཀོབ་དང་ཧུན་སུར། གོ་ལི་གྷལ། མོན་གྷོ། བྷིང་གྷ་ལོར།   སྤོན་ཊ་དང་ལ་དྭགས། ཌ་ལ་ཧོ་སི་བཅས་ཀྱི་བོད་ཀྱི་ས་གནས་གཞོན་ནུ་ཁག་བརྒྱད་ཀྱི་ཚོགས་གཙོ་གཙོས་རྒྱུན་ལས་བཅས་ཁྱོན་མི་གྲངས་༥༠ མ་ཟིན་ཙམ་ཞིག་ལྷན་འཛོམས་ཀྱི་ཐོག བོད་ཀྱི་གཞོན་ནུའི་ལངས་ཕྱོགས་ཆིག་སྒྲིལ་ཡོང་སླད་གྲོས་མོལ་ཚོགས་འདུ་ཞེས་པ་ཞིག་འཚོགས་ཡོད་པ་རེད།

དེ་ཡང་༢༠༡༣ ལོར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་༡༥ པའི་ཐོག་བོད་ཀྱི་གཞོན་ནུའི་རང་བཙན་གྱི་ལངས་ཕྱོགས་ལ་བཅོས་འགྱུར་དགོས་མིན་གྱི་ཐད་བསམ་ཚུལ་མི་མཐུན་པ་བྱུང་བར་བརྟེན།   བོད་ཀྱི་གཞོན་ནུ་ལྷན་ཚོགས་ནས་ཕྱིར་ཐོན་བྱས་པའི་ས་གནས་གཞོན་ལྷན་ཁག་བརྒྱད་ཡོད་པ་རྣམས་དང་། བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིདབར་ཆིག་སྒྲིལ་གྱི་ནུས་པ་ཧ་ཅང་ཉམ་དམས་སུ་སོང་ཡོད་པ་མ་ཟད།   ད་ཐེངས་ལངས་ཕྱོགས་མི་མཐུན་པའི་དཀའ་རྙོག་དེ་སེལ་ཆེད་དུ་ལྷན་ཚོགས་བྱས་པ་ཡིན་འདུག

དབུས་བོད་ཀྱི་གཞོན་ནུ་ལྷན་ཚོགས་ཀྱིས་ལོ་ངོ་གཅིག་དང་ཕྱེད་ལྷག་ཙམ་གྱི་རིང་དཀའ་ངལ་དེ་དག་སེལ་ཆེད་དུ་ འབད་བརྩོན་རིམ་པ་བྱས་ཡོད་ནའང་། གྲུབ་འབྲས་གང་ཡང་མ་ཐོན་པར་བརྟེན། ད་ཐེངས་དབུས་གཞོན་ནུ་ལྷན་ཚོགས་ཀྱིས་ངོས་ནས་འབོད་སྐུལ་རིམ་པ་བྱས་པ་གཞིར་བཟུང་གི་ས་གནས་སུ་ཚོགས་འདུ་འདི་གོ་སྒྲིག་ཞུས་པ་ཞིག་ཡིན་སྐོར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་རྟ་མགྲིན་སྲིད་གཅོད་ཀྱིས་གསར་འགོད་པར་འགྲེལ་བརྗོད་གནང་སོང་།

བོད་ཀྱི་གཞོན་ནུ་ལྷན་ཚོགས་ནས་ལོགས་སུ་ཐོན་པས་ས་གནས་ཁག་བརྒྱད་ཀྱི་གཞོན་ནུའི་འབྲེལ་མཐུད་པ་རྒན་པ་སྦེལ་ཀོབ་བོད་ཀྱི་གཞོན་ནུའི་ཚོགས་གཙོ་བྱ་ཉལ་ཚེ་རིང་ལྷ་སྐྱབས་ཀྱིས་ཚོགས་འདུ་ཚོགས་དགོས་པའི་གལ་གནད་སྐོར་དང་།   ལྷག་པར་དུ་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་དགོངས་བཞེས་ལམ་སྟོན་དང་བོད་མིའི་སྒྲིག་འཛུགས་ཀྱི་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས། བོད་ཆགས་འཇིག་ཛ་དྲག་གནས་སྟངས་སོགས་གང་ཅིའི་གནས་སྟངས་ཐོག་དགོངས་པ་ཆེ་བཞེས་ཀྱིས་བོད་ཀྱི་གཞོན་ནུའི་རང་བཙན་ལངས་ཕྱོགས་དེ་མུ་མཐུད་མཁྲེགས་འཛིན་མི་བྱེད་པར། བོད་ཀྱི་གཞོན་ནུའི་ཚོགས་མིའི་མངོན་འདོད་དང་མཐུན་པར་ཤར་བསྐྱོད་གནང་ཐུབ་པ་ཡིན་ན་ཕན་ཐོགས་ཡོང་རྒྱུ་ཡིན་སྐོར་འགྲེལ་བརྗོད་གནང་སོང་།

ཚོགས་འདུ་ཉིན་དང་པོ་དབུ་བཙུགས་ཀྱི་ཐོག་ས་གནས་ཁག་བརྒྱད་ཀྱི་གཞོན་ནུའི་འབྲེལ་མཐུད་པ་སྦེལ་ཀོབ་ས་གནས་གཞོན་ནུའི་ཚོགས་གཙོ་བྱ་ཉལ་ཚེ་རིང་ལྷ་སྐྱབས་དང་འབྲེལ་མཐུད་པ་གཞོན་པ་ཀེ་ལེ་གྷལ་ས་གནས་གཞོན་ནུའི་ཚོགས་གཙོ་ཚེ་རིང་རྡོ་རྗེ་ཅུང་གཉིས་ཀྱིས་ཚོགས་འདུ་རྒྱུད་རིམ་དང་འབྲེལ་བའི་སྐོར་གསུང་བཤད་གནང་བ་དང་། ཕྱོགས་མཚུངས་དབུས་བོད་ཀྱི་གཞོན་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ དང་ཚོགས་གཞོན་རྟ་མགྲིན་སྲིད་གཅོད་གཉིས་ཀྱིས་གཏམ་བཤད་གནང་རྗེས། རིམ་པས་ཚོགས་བཅར་བ་རྣམས་པས་དགོངས་འཆར་བཏོན་ཡོད་པ་རེད།

ཕྱི་ཚེས་༧ ཉིན་བོད་ཀྱི་གཞོན་ནུའི་དབུས་སྤྱི་ཁྱབ་རྒྱུན་ལས་རྣམ་པ་དང་ས་གནས་ཁག་བརྒྱད་ཀྱི་བོད་ཀྱི་གཞོན་ནུའི་རྒྱུན་ལས་རྣམ་་པའི་དབར་གྱི་ལང་ཕྱོགས་གཅིག་འགྱུར་ཡོངས་ཐབས་སུ་གྲོས་མོལ་ཚོགས་འདུ་ཚོགས་གནང་བ་དེ་འཇུག་སྒྲིལ་བྱུང་ཡོད་པ་རེད།       ཐེངས་འདིའི་ཚོགས་འདུའི་ཐོག་བོད་ཀྱི་གཞོན་ནུའི་ཡན་ལག་ས་གནས་ཁག་བརྒྱད་ཀྱི་རྒྱུན་ལས་རྣམ་པས་དགོངས་ཚུལ་ཞིབ་ཚག་གསུངས་ཡོད་པ་དང་འབྲེལ་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་ས་གནས་ཁག་བརྒྱད་ཀྱི་ས་གཞོན་རྒྱུན་ལས་རྣམས་པར་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་ནང་འཛུལ་ཞུགས་བྱས་ཏེ། དགོངས་ཚུལ་ཇི་ཡོད་རྣམས་བོད་ཀྱི་གཞོན་ནུའི་འགན་འཛིན་ལྷན་ཚོགས་དང་ཚོགས་ཆེན་གྱི་ནང་མཉམ་སྤུངས་བྱས་ཏེ་སྒྲིག་གཞི་བསྐྱར་བཅོས་བྱ་རྒྱུའི་མང་གཙོའི་འགྲོ་ལུགས་དང་མཐུན་པ་ཞིག་གནང་དགོས་པས་འབོད་སྐུལ་བྱས་ཡོད་འདུག

ས་གནས་ཁག་བརྒྱད་ཀྱི་གཞོན་ནུ་ལྷན་ཚོགས་ནས་དབུ་མའི་ལམ་གྱི་ཐོག་ཤར་བསྐྱོད་གནང་རྒྱུ་ཐག་གཅོད་ཟིན་པ་དེར་འགྱུར་བ་གང་ཡང་མེད་པ་གསལ་པོ་གསུངས་ཡོད་སྐོར་དང་།   བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་འདས་པའི་ལོ་ངོ་གཅིག་དང་ཕྱེད་ཀ་ལྷག་རིང་དབུས་ས་གཉིས་ཀྱི་ལངས་ཕྱོགས་རྐྱེན་པས་དཀའ་ངལ་ཕྲད་བཞིན་པ་དེ་གསལ་ཐབས་སུ་འབད་བརྩོན་རིམ་པ་ཞུས་ཀྱང་། ད་བར་གྲུབ་འབྲས་མ་སོན་པར་དེ་མུར་ལུས་ཡོད་ཀྱང་། ད་ལན་དབུས་ས་གཉིས་ཀྱི་དབར་ལྷན་འཛོམས་ཀྱི་ཕན་ཚུན་བསམ་ཚུལ་བརྗེ་ལེན་བྱ་རྒྱུའི་གོ་སྐབས་ཞིག་བྱུང་བ་དེ་ནི་བཟང་ཕྱོགས་ཀྱི་ངོ་བོར་ངོས་འཛིན་ཞུ་བཞིན་ཡོད་སྐོར་དབུས་གཞོན་ནུའི་ཚོགས་གཞོན་རྟ་མགྲིན་སྲིད་གཅོད་ཀྱིས་འགྲེལ་བརྗོད་གནང་འདུག

ཚོགས་གཞོན་གྱིས་མུ་མཐུད་བརྗོད་པ་ལྟར་ན། ད་ཐེངས་ཀྱི་ཚོགས་ཆེན་འདིའི་ཐོག་ཚོགས་བཅར་བ་རྣམས་པས་གཞོན་ནུའི་ལངས་ཕྱོགས་དང་འབྲེལ་བའི་ས་གནས་སོ་སོའི་དགོངས་ཚུལ་བཏོན་པ་ལས་གྲོས་གཞི་དང་གྲོས་ཆོད་དམིགས་བསལ་བ་གང་ཡང་བཞག་མེད་ན་ཡང་།   ཚོགས་འདུའི་ནང་ཚོགས་བཞུགས་པ་རྣམས་པས་དགོངས་ཚུལ་གང་བཏོན་པ་ཁག་ཚོགས་དྲུང་རྣམ་པས་ཚིག་ཐོ་བཀོད་པ་གཞིར་བཟུང་གི་བོད་ཀྱི་གཞོན་ནུའི་དབུས་སྤྱི་ཁྱབ་རྒྱུན་ལས་རྣམ་པ་ཚང་འཛོམས་ཀྱི་ཐོག་གནད་དོན་དེ་དག་གི་ཐོག་གོ་བསྡུར་སྦྱངས་བཤད་གནང་ཏེ་རིམ་པས་ཐག་གཅོད་གནང་རྒྱུ་ཡིན་འདུག

དེ་བཞིན་ཚོགས་ཆེན་དེའི་ཐོག་ས་གནས་ཁག་བརྒྱད་ཀྱི་ཚོགས་གཙོ་གཙོས་པས་རྒྱུན་ལས་རྣམས་ཀྱིས་ས་གནས་སོ་སོའི་ཚོགས་མིིའི་མངོན་འདོད་དང་མཐུན་པ་དབུ་མའི་ལམ་གྱི་ཐོག་བསྐྱོད་རྒྱུའི་དགོངས་འཆར་གཅིག་མཐུན་བྱུང་བ་དེ་གསལ་འདོན་གནང་ཡོད་པ་མ་ཟད་ད་དུང་དབུས་བོད་ཀྱི་གཞོན་ནུ་ལྷན་ཚོགས་ནས་གཞོན་ནུའི་འགན་འཛིན་ལྷན་ཚོགས་དང་ཚོགས་ཆེན་ཐོག་ས་གནས་ཁག་བརྒྱད་ཀྱི་དགོངས་ཚུལ་དེ་གྲོས་གཞིར་བསྣམས་ཐུབ་པས་རེ་སྐུལ་ཡང་ཞུས་ཡོད་པ་དང་།       གཞོན་ནུའི་ས་གནས་ཁག་བརྒྱད་ནས་བོད་ཀྱིས་དབུས་གཞོན་ནུ་ལྷན་ཚོགས་ཀྱི་སྒྲིག་འཛུགས་དང་ལངས་ཕྱོགས་ལ་བརྩི་བཀུར་ཞུས་དང་ཞུ་མུས་སུ་ཡིན་སྐོར་ཡང་འབྲེལ་མཐུད་པ་བྱ་ཉལ་ཚེ་རིང་ལྷ་སྐྱབས་ཀྱིས་འགྲེལ་བརྗོད་གནང་ཡོད་པ་རེད་འདུག །
ལྷོ་ཕྱོགས་གསར་འགོད་པ་ཐུབ་བསྟན་བཀྲིས།