ཀྲུའུ་ཡོང་ཁང་ལ་ཁྲིམས་བཤེར་བྱ་གཏན་འཁེལ་བ།

རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་ཟུར་པ་ཀྲུའུ་ཡོང་ཁང་གི་ནག་ཉེས་ཐའེ་ཅིན་གྲོང་ཁྱེར་མི་མང་ཁྲིམས་ཁང་ལ་རྩིས་སྤྲོད་བྱས་ཏེ་ཁྲིམས་བཤེར་བྱ་གཏན་འཁེལ་ཡོད་འདུག

ཕྱི་ཟླ་༤ པའི་ཚེས་༣ ཉིན་རྒྱ་ནག་མི་མང་ཆེས་མཐོའི་ཁྲིམས་ཁང་གི་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། རྒྱ་ནག་དབུས་ཆབ་སྲིད་སྡེ་ཚན་གྱི་རྒྱུན་ལས་ཟུར་པ་དང་དབུས་སྲིད་ཁྲིམས་ལྷན་ཁང་གི་དམར་ཤོག་དྲུང་ཆེ་ཟུར་པ་ཀྲུའུ་ཡོང་ཁང་གི་ལྐོག་ཟ་རུལ་སུངས་དང་། དབང་ཆ་ལོག་སྤྱོད། བསམ་བཞིན་དུ་རྒྱལ་ཁབ་ཀྱི་གསང་བ་ཕྱིར་བསྒྲགས་བཅས་ནག་ཉེས་གསུམ་ལ། རྒྱ་ནག་མི་མང་ཆེས་མཐོའི་ཁྲིམས་ཁང་ནས་དཔྱད་ཞིབ་ལེགས་པར་གྲུབ་སྟེ། ཁྲིམས་ལྟར་ཐའེ་ཅིན་མི་མང་ཁྲིམས་ཁང་གི་ཡན་ལག་ཁྲིམས་ཁང་དང་པོར་རྩིས་སྤྲོད་ཀྱིས་ཁྲིམས་བཤེར་བྱ་རྒྱུ་ཡིན་པ་རེད།

ཀྲུའུ་ཡོང་ཁང་གི་ནག་ཉེས་ཁྲིམས་གཏུགས་ཡི་གེའི་ནང་འཁོད་དོན། “ནག་ཉེས་འཛུགས་ས་ཀྲུའུ་ཡོང་ཁང་གིས་རྒྱ་ནག་རྡོ་སྣུམ་སྤྱི་ཁྱབ་བཟོ་གྲྭའི་འགན་འཛིན་གཞོན་པ་དང་། སི་ཁྲོན་ཞིང་ཆེན་དམར་ཤོག་དྲུང་ཆེ། དབུས་ཆབ་སྲིད་སྡེ་ཚན་གྱི་རྒྱུན་ལས། སྤྱི་བདེ་ལས་ཁུངས་ཀྱི་འགན་འཛིན། རྒྱལ་སྲིད་སྤྱི་ཁྱབ་ཁང་དང་དམར་ཤོག་དབུས་ཆབ་སྲིད་སྡེ་ཚན་གྱི་རྒྱུན་ལས། དབུས་སྲིད་ཁྲིམས་ལྷན་ཁང་གི་དམར་ཤོག་དྲུང་ཆེ་བཅས་ཀྱི་འགན་ཁུར་སྐབས། རང་ཉིད་ཀྱི་ལས་གནས་བེད་སྤྱོད་དེ་མི་གཞན་གྱི་ཆེད་དུ་ཁེ་ཕན་ལེན་པ་དང་། ཁྲིམས་འགལ་གྱིས་མི་གཞན་གྱི་རྒྱུ་ནོར་འབོར་ཆེན་བླངས་པ། དེ་བཞིན་ཀྲུའུ་ཡོང་ཁང་གི་དབང་ཆ་ལོག་སྤྱོད་ལ་བརྟེན་ནས། སྤྱི་དམངས་ཀྱི་རྒྱུ་ནོར་དང་རྒྱལ་ཁབ་དང་མི་དམངས་ཀྱི་ཁེ་ཕན་ལ་གྱོང་གུན་ཚབས་ཆེ་དང་། སྤྱི་ཚོགས་ཐོག་ཤུགས་རྐྱེན་ཧ་ཅང་ངན་པ་བཟོས་ཡོད་ལ། རྒྱལ་ཁབ་ཀྱི་གསང་བ་ཉར་ཚགས་ཀྱི་ཁྲིམས་ལུགས་ལ་རྒྱབ་འགལ་བྱས་ཏེ། བསམ་བཞིན་དུ་རྒྱལ་ཁབ་ཀྱི་གསང་བ་ཕྱིར་བསྒྲགས་ སོགས་ཀྱི་གནས་ཚུལ་ཧ་ཅང་ཚབས་ཆེན་ཡིན་སྟབས། ཁྲིམས་ལྟར་ལྐོག་རྔན་བླངས་པ་དང་དབང་ཆ་ལོག་སྤྱོད། བསམ་བཞིན་དུ་རྒྱལ་ཁབ་ཀྱི་གསང་བ་ཕྱིར་བསྒྲགས་བཅས་ཀྱི་འགན་ཁུར་རྒྱུ།”

དེ་བཞིན་རྒྱ་ནག་མི་མང་ཆེས་མཐོའི་ཁྲིམས་ཁང་གིས་སྤེལ་བའི་ནག་ཉེས་ཁྲིམས་གཏུགས་ཀྱི་ཡི་གེའི་ནང་འཁོད་པ་ལྟར་ན། ཁྲིམས་ཞིབ་ཚན་པས་ཁྲིམས་རར་ནག་ཉེས་ཁྲིམས་བཤེར་སྐབས། རྩོད་ལེན་པ་ཀྲུའུ་ཡོང་ཁང་ལ་དག་འབུད་བྱ་རྒྱུའི་ཐོབ་ཐང་ཡོད་པ་མ་ཟད། ཞུ་སྦྱོར་བས་ཀྲུའུ་ཡོང་ཁང་ལ་འདྲི་རྩོད་བྱེད་པ་དང་ཁྲིམས་རྩོད་པའི་བསམ་འཆར་ལ་ཉན་འཇོག་བྱ་ཆོག་གི་ཡོད་པ་རེད།

རང་ལོ་༧༢ ཡིན་པའི་རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་ཟུར་པ་ཀྲུའུ་ཡོང་ཁང་ནི་རྒྱ་ནག་གི་སྲིད་འཛིན་ཞི་ཅིན་ཕིང་གི་རུལ་རྒོལ་ཁྲོད་གནས་དབྱུང་བཏང་བའི་མཐོ་རིམ་དཔོན་རིགས་ཤིག་དང་། ཕྱི་ལོ་༡༩༤༩ ལོར་རྒྱ་ནག་དམར་ཤོག་སྲིད་དབང་བཙུགས་པ་ནས་བཟུང་རུལ་སུངས་ལ་བརྟེན་ནས་གནད་དོན་ལྷགས་པའི་དཔོན་པོ་མཐོ་ཤོས་ཆགས་ཡོད་པ་རེད།

རྒྱ་ནག་མི་མང་ཆེས་མཐོའི་ཁྲིམས་ཁང་གིས་སྤེལ་བའི་གསལ་བསྒྲགས་དེའི་ནང་ཀྲུའུ་ཡོང་ཁང་གི་ནག་ཉེས་ཁྲིམས་བཤེར་གྱི་ཟླ་ཚེས་གསལ་པོ་འཁོད་མེད་པ་མ་ཟད། མིག་སྔར་ཀྲུའུ་ཡོང་ཁང་གི་གནད་དོན་དེ་ཚད་ཅི་ལྟ་བུ་ཞིག་གི་ཐོག་ནས་ཡོངས་གྲགས་ཐོག་ཁྲིམས་བཤེར་བྱ་རྒྱུ་ཡིན་མིན་ཡང་ཁ་གསལ་ཤེས་རྟོགས་མེད་པ་དང་། གནད་དོན་དབྱེ་ཞིབ་པ་འགས་ངོས་འཛིན་བྱས་པ་ལྟར་ན། རྒྱ་གཞུང་གིས་ཀྲུའུ་ཡོང་ཁང་ལ་རྒྱལ་ཁབ་ཀྱི་གསང་བ་ཕྱིར་བསྒྲགས་ཀྱི་ཉེས་འཛུགས་བྱས་ཡོད་སྟབས། ཁྲིམས་བཤེར་སྐབས་རྒྱ་ནག་དམར་ཤོག་མཐོ་རིམ་དཔོན་རིགས་ནང་ཁུལ་འཐབ་རྩོད་ཀྱི་གསང་བ་ཕྱིར་མི་ཤོར་བའི་ཆེད། ཡན་ལག་ཁྲིམས་ཁང་ཞིག་གི་ནང་དུ་སྒོ་བརྒྱབ་སྟེ་ཁྲིམས་བཤེར་བྱ་སྲིད་པ་ཞིག་ཡིན་པ་རེད།

ཕྱི་ལོ་༢༠༡༤ ལོའི་ཕྱི་ཟླ་༡༢ པའི་ཚེས་༥ ཉིན། རྒྱ་ནག་དམར་ཤོག་དབུས་ཆབ་སྲིད་སྡེ་ཚན་གྱི་ཚོགས་འདུའི་ཐོག་ཀྲུའུ་ཡོང་ཁང་དམར་ཤོག་ཚོགས་མི་ནས་ཕྱིར་ཕུད་ཐག་གཅོད་བྱས་པ་དང་། ཁོང་གི་ནག་ཉེས་ཀྱི་གནད་དོན་ཁྲིམས་ཞིབ་ཚན་པར་རྩིས་སྤྲོད་དེ་ཁྲིམས་ལུགས་ལྟར་ཐག་གཅོད་བྱ་གཏན་འཁེལ་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན།